Gedanken öber dat Mittenanner

vun Heinz Tiekötter

Egentlich hebbt wi jo all densülbigen Gott; de Muslime, de Juden un wi Christen. Ik wurr to geern mol mit em snacken. Ik much em mien Menen seggen, worüm dat mit sien Personool op de Eer nich so recht klappt.

Wenn ik di to'n Bispeel froog: Wat is di lebber, Striet un Zank orrer 'n godet Verhältnis to diene Mitminschen un to de Natur? Ik weet genau, wat du anters. Du weerst jo dösig, wenn di nix an Harmonie liggt. Un ok wenn ik 'n Muslim, 'n Juden or een vun de Natur-Relischoon froog; de Antwurt vun de Kloken weer jümmers liek: Se wüllt all in Freden leben! Se wüllt keen Bang un keen Sorgen vör de Tokunft un se wüllt in Harmonie mit anner Minschen un de Natur leben.

Man de Weg dorhen beginnt ok in uns Karken un Moscheen un bi de grote Politik. Go ik to'n Bispeel an Sünndag in de Kark, denn heur ik veel öber de Verkünnung. För de Kark is de heel wichtig. De bruukt se, üm ehre Lüüd tosomentoholln un nee to gewinnen. Un wat hebbt wi dorvun? För uns Minschen is wichtiger, dat sik bi uns wat ännert. Allens fangt bi uns vör uns egen Huusdöör an. Wi mööt doröber nodinken, op welk Ort wi uns gegensiedig behanneln. Un dor täuf ik op Anregungen un Bispeele vun de Predigers in de Kark un vun uns Politikers.

Wat mook ik mit den Frömden, de mi as neegstet in de Mööt kümmt. Woans war ik mi verholl'n? War ik em no dat beurdelen, wat he förn Kledoosch anhett, wat för'n Sprook or Dialekt he snackt, of he 'n Boort or lange Hoor or gorkene hett? Un wokeen sall den Anfang mit de Fründlichkeit moken un keen sall afteuben? He or ik. Villicht bün ik öller. Gifft mi dat Rechte or hollt mi dat vun wat af? Is de Schangs denn all vörbi, wenn ik to lang teuv, dat he endlich anfangt?

Worüm goh ik di nu all mit mien Gedanken op'n Keeks? Wi sünd doch grod anfungen, öber uns Mittenanner notodinken. Un du hest seggt, du büst intressiert an Harmonie. Dat hest du seggt!

Wenn se in de Roothüser un de Karken, in de Tempels un de Moscheen bloots nich jümmers toeerst doröber nodinken wurrn, op welk Ort se ehre Stellung, ehre Macht un ehren Influss utbuen or tominnst bewohren köönt. Wenn se sik mehr dormit befoten wurrn, op welk Ort sik dat Leben vun ehre Gemeen 'n lütt beten kommodiger gestalten lett, denn weern wi all mittenanner 'n grotet Stück wieder. Dor, an düsse Steed beneudigt wi jemmer Anregungen.

Wenn se nu dormit nich öberkoomt, köönt se uns dorvun afhollen, dat wi dat denn eenfach alleen mit'n anner versöcht? Glieks morgen fang ik dormit an! Un wat warst du moken, dormit uns Welt 'n beten wat scheuner ward?