Trump un Merz sünd schöne Jünglings

vun Behrend Böckmann

Also — äh — Jünglinge?! Un schön?????

Deit man as Läser ok mål twüschen dei Reigen läsen, so kümmt einen ünner dei Ogen, dat hier un dor Trump un Merz mit den schönen Jüngling Narcissus ut'e antike Sågenwelt vergläken warden, äben mit einen, dei in sien Speigelbild so verleiwt wier, dat dat Sähnen, so as dat Speigelbild tau sien, dormit ennen däd, dat hei in'n Blaum, in'n Narziss verwannelt wür. Un so warden hüt noch Minschen för „narzistisch“ hollen, dei sik för dei Allerbesten, Allergröttsten un Allerkläuksten hollen, dei wieder nix in'n Kopp hemm', as dat's Macht œwer anner hemm' willen, œwer nich mit anner mitfäuhlen, dei dei Schuld ümmer blot bi anner säuken, ümmer 'n Extrawust för sik verlangen, afgünstig up anner Minschen sünd un sik sülben as dei besten Minschen dickdaun, dei nå wieder nix as Anseihn sträben un sik giern bewunnern låten...

Narziss is blots in sik sülvst verleevt... Gemälde von Waterhouse (1903)

Nähmen wi blot dei Horpracht von Trump un woans hei sien Ünnerschriften inne Kamera höllt, woans hei Selenskyj in't Oval Office von't Witte Hus rünnerputzt un mit Elon Musk grient, wenn't „Amerika first“ heiten deit...

Speglein, Speglein an de Wand...

Un Merz, wenn hei in'n Speigel kiekt, denn grient hei sik sülben an un secht tau sik: Du kannst dat bäder as Muddi Merkel. Sei harr as Blockfläut ut'n Osten bi Kohl dat westlich Fläutenspäl lihrnt, wiest Maat Merz  2005  'n lange Näse, vermasselt em den Kanzlersessel un höll denn sössteihn Johr dei Tœgel inne Hand. Merz versöcht nu, Parteimaatin Merkel all dat ünnertauschuben, wat nå sien Ansicht tau wiet nå links güng un nich gaut för Düütschland wier: mit Putin  tau klüngeln un Nuurdstream II  tau bugen, nå dei Devis „Wi schaffen dat“ dei Tauwannerung von väle Frömde nich tau ünnerbinnen, dei „Eh för all“ taustimmentau, den Atomutstieg antaufangen, dei Bundswehr up Sporflamm tau hollen —— un all, dei Merz hüt för „gräune Spinner“ höllt, höll uns „Grande Dame de Politique“ Angela Merkel för normale Börger mit 'n bäten anner Ansichten.

Un Narziss Merz kiekt in'n Speigel, un sien Speigelbild secht em, wenn du mit dei AfD dat „Zustrombegrenzungsgesetz“ dörchboxt hest, denn mösst du nu up Deuwel kumm rut mit dei Gräunen un den ollen Bundsdach dat Grundgesetz angåhn un dei Schullenbrems verännern. Blot wenn dat so kümmt, denn is Düütschland Willens un inne Låch, sik tau verdeffendieren, üm wiederhen in Frieheit un Fräden tau läben. Un wieldat in'n niegen Bundsdach mihr Maaten ut'n rechten un linken Rand sitten, is 'n sik nich wiss, ob disse Maaten taustimmen warden, dat jeder Bundsbörger mit 'n Staatsschuld von bummelig 10.000 Euros belastet ward.

Ja, so as 'n Sœch taun Bier lärt ward, lärt Narziss Fiete den Wähler achter't Licht, denn hei wull ja dei Schullenbrems nich anrögen un dat nödige Geld dörch Insporungen bi taun Bispill unnödige Utgåwen för dei Demos vonne „Omas gägen Rechts“ orrer bi't Börgergeld updrieben. Dor keem denn œwer doch nich nauch tauhop, un so möt 'n dei Schullenbrems för dei nödigen dusend Milljarden lockern, dormit Stråten un Schienen as Deil von uns Infrastrukur so up Vordermann bröcht warden, dat Panzer un Kanonen gefohrlos dorhen rullen kœnen, wo's uns Frieheit un uns åbendlännisch liberale Ordnung verdeffendiern.