Dat Merz-Wiesel kiekt opstunns dösig ut dei Wäsch

Son'n Schiet œwer ok!

vun Behrend Böckmann

Wat sik hüt för dei demokratisch Midd höllt, dat kann man mit 'n "Block vonne Natschonale Front" tau DDR-Tieden verglieken, in den sik dei fief DDR-Parteien (SED, DSBD, LDPD, NDPD un CDU) ünner annern politsch einig wiern, dat sei inne allerbest Sellschåp läben dään. Inne Hochschaulen un Unis geef dat Politdenker
för "Dei Geschicht vonne Arbeiterbewägung", den "Dialektischen un Historischen Materialismus" un den "Weitenschåplichen Kommunismus". Dei hemm' so as Götter vonne histsorisch Miss'schon vonne Arbeiterklass un ehrn Anspruch up'e Regierung vertellt un leeten nich tau, dat dat ok Minschen gäben künn, dei nich mit dei vonne Natschonale Front vörgäben Richtung inverståhn wiern. Woans harr'n sik wull all 1976 süss soväl Künstler gägen dei Utbörgerung von den in Ungnåd follen Liedermåker Wolf Biermann insett't? Un 'n nich taulåten Oppositschon inne DDR ward klammheimlich grötter un grötter, bet dat nå vierdig Johr DDR tau Måndachsdemos kümmt, dei Revolutschon mit Lichten för 'n bädere DDR un bäderen Sozialismus ehr Anfang nähm un sülfst dei Gägendemos von Kampfgruppen- un linienfaste Genossen disse Börgerbewägung nich uphollen künnen.
Dei Muer föllt — un so as dei Kaiser 1918 nå Holland utneiht is, möst ok Honecker utneihn un lannt nå 'n Upnåhm bi'n Preister Uwe Holmer in't brambörgsche Lobetal un denn œwer Moskau in Chile bi sien Dochter.

Œwer dat löppt nich so, as dat lopen süll: Dei Drom von'n bädere Sellschåp blifft 'n Drom, dei upbläuhten Landschaften bläben ut, dei Drang nå Utwiedung in Richtung Ost stiggt, Verspräken warden nich inhollen, Amerika is un blifft dei Fründ, Russland ward — liekers sien Verdeinst as Befreier von Auschwitz dörch dei Rode Armee — inne böse Eck stellt. Dat all wür dat Verdeinst von Kohl un sien CDU; un denn keem dat, wat kum tau glöben is: Hei ward von'n ostdüütsch Preistersdocher ut Templin op'n Pott sett! Sei hett sogor in Moskau studiert, is Physikerin, as man hüt so secht, kann düütsch, russ'sch un inglisch schnacken — dei löst Kohl af un stellt den Will-œwer-kann-nich-Kanzler Fiete Merz kolt.

Un nu 2025 is't so wiet, Fiete Merz sien Stunn schlöcht. Hei ward endlich (!!!) dei schwatte Kanzlerkannedat un will all dat wedder richten, wat in 16 Johr Merkelherrschaft den Barch rünner güng, besonners dörch ehr "Wi schaffen dat!" mit Blick up dei välen Frömden, dei 2015 so nå Düütschland wullen, as dei Ostdüütschen 1989 œwer dei ungar'sch-österrieker Grenz in'n Westen utneihten.

Un as Noch-Oppositschon ward Fiete Merz 'n "Fief-Punkte-Plan" vörleggen, woans man in Taukunft mit Frömde ümgåhn ward, dei in Düütschland nicks tau säuken hemm', un son'n, dei in Magdeborg, Aschaffenburg un annerswo för väl Leid sorcht hemm'. Un dor por SPD-Maaten in'n Bundsdach nich in'n Saal wiern, as dat taun Afstimmung kümmt, dunn nütten dei AfD-Maaten den Momang — un Fiete Merz harr dei nödigen Stimmen un sien Infäll wiern annåhmen. Hei glöwt all, hei wier dor ankåmen, wo hei hen will, un glöwt, dat hei up disse Oort ok dat "Zustrombegrenzungsgesetz" dörchpietschen künn. Tau sien eigen Verdeffendierung gifft hei den binåh stammbauk-riepen Satz von sik: "Ein richtig Entscheidung ward nich dordörch falsch, dat dei Falschen taustimmen."

Œwer dat helpt nich, dei Upschrie is grot, un dei sik för Demokraten ut'e Midd hollen, un ok dei "woke" rod-gräune Blås, gåhn mit Fiete Merz tau Gericht. Angela Merkel, dei all 2002 Fiete Merz denn Posten as Frakschonsbaas ünner de Nees wegsnappt harr (siet disse Tiet is dat Ei twüschen Merz un Merkel intwei), höllt disse Afstimmung mit Hülp vonne AfD för falsch, Luisa Neubauer näumt Merz 'n Brandstifter, Scholz schnackt von'n "historischen Tabubruch", SPD-Linker Stegner von 'n "Dammbruch", dei gnatzig Publizist Michel Friedman (ok bekannt as "Paolo Pinkel", googel dat man!) schmitt sogor dat CDU-Parteibauk hen, ut "Omas gägen rechts" warden "Omas gägen Merz". Dei Merz-CDU is also endgüllig ut dei Midd rut un op dei rechte Kant ankamen.

Dat brodelt in alle Richtungen för un gägen, doch mit sien "Zustrombegrenzungs-
gesetz" keem hei nich dörch. Sülfst inne eigen Reigen sünd wull nich all mit ehrn Baas œwerein un stimmen nich so af, as hei sik dat up'n Wech taun Kanzler wünschen däd. Villicht hett hei ok dormit spekeliert, dat em all för sien "Migrationspoletik" so as eins Günther Schabowski an'n Åbend von'n 9. Näwelmånd 1989 taujubeln würn, dei as Baas vonne Ostberliner SED-Bezirksleitung verkünnen däd, dat dei Grenzœwergäng Checkpoint Charlie, Bornholmer Stråt, Sünnenallee usw. åpen sünd un jederein ut- un ok wedder inreisen kann. Un jeder Ostdüütsche kreech in'n Westen 100 DM, un väle besinnen sik nå mihr as dörtig Johr noch, wat sei sik dorvon leist't hemm'. Düütschland wier so spendåbel, nich blot gägenœwer dei eigen Landslüd, ok gägenœwer all dei Frömden, dei in Düütschland dat Glück söchten. Œwer nu is dat Måt vull, dei Ümgang mit Frömde möt sik ännern, dor sünd dei miehrsten Börgers un ok Partein ein' Sinns. Doch nich œwer dat Wie-un-Woans — dor fallt dei "börgerliche Midd" utenein. "So nich!" hallt dat von all Sieden. Woans denn? Etwa AfD-Style?

Merz sien Fief-Pünkt-Plan taun Ümgang mit Frömde is ierst mål von'n Disch. Hett Merz sik nu sülben in't Knei schåten orrer hett dei "demokratisch Midd" den Wähler indirekt Henwies gäben, wecker Partei hei sien Stimm gäben künn?