Dat Meloniland

vun Behrend Böckmann

Ik kenn ja kein Meloniland,
man düsse Frucht schient mi bekannt...

Bald is't inne Welt bekannt
dat gaut intünt Meloniland.
Dorhen nu Asylanten kåmen,
dei tau Hus Ritut hemm' nåhmen,
dei väl Geld hemm' dorför gäben,
dat s' in Europa bäder läben,
un ganz väle sünd sik wiss,
dat dor dei Gorn von Eden is.

O Wunner! In'n Goorn Eden schon
hüng staats ein Appel ein Meloon!

Un as 'n Schlüser wier denn funnen,
drieben's œwer väle Stunnen
œwer't Middelmeer nå Nuurd,
nå einen unbekannten Urt,
dei up Lampedusa licht,
un würklich, Land is all in Sicht;
por Sekunnen noch vergåhn
un man künn in Europa ståhn.

Hähä! Dei Hoffnung wier verfehlt!
Kiek, wo Meloon hier Körbis speelt!

So schäpern sössteihn Frömde denn
up dat Middelmeer dorhen —
doch nå Italjen keinein keem,
dor dei Marin' dei Kierls upnähm,
dei Frömden in Gewohrsåm nimmt
un allens nu ganz anners kümmt.
Sei lannt anne alban'sche Küst,
wo ein "Asyl-Hotspot" sik rüst,
ierste Frömde uptaunähmen,
dei dor mit 'n Bus ankeemen.

Hä, wat?! Ein Körbis is dat nich?
Ein Minsch is't? Dat's ja förchterlich!

Un dei sössteihn glöben't kum,
dat dat achtern hogen Tun —
ok wenn dor grient dei leiwe Sünn —
ein "dolce vita" gäben künn.
Wåhnwörpel sünd as Hüs upstellt
för Frömde ut'e ganze Welt,
dei tau viert in'n Wörpel wåhnen,
lies sinnieren un hujåhnen,
un sünd dei Frömden ierst ankåmen,
warden's in Ogenschien denn nåhmen,
ünnersöcht, ident'fiziert,
un ein-twei-drei denn registriert.

Albanien? Dor wull keinein hin!
Egaal! Nu is Meloni-ween!

Bi eins, dor hett man Bliewerecht,
doch bi twei, dor geiht dat schlecht,
ok wenn sei sik dorgägen wihren,
sei möten irgendwenn ümkihren.

So sallen uns achtdusend Bedden
vör illegål Migranten redden,
un för weck, dei ein Gefohr,
sünd Bedden achter Trallen dor.
800 Milljonen würn utgäben,
dat butenhalf dei Frömden läben,
un Meloni harr in'n Sinn:
Wi låten kein Migranten rin
ut Länner, dei as säker gellen;
dei sallen keinen Andrach stellen.
Doch in Rom seggen dei Afkåten,
Meloni süll dat leiwers låten;
dei dor würn in Gewohrsåm nåhmen,
sünd nich ut säker Länner kåmen.
"Buongiorno" — in Italjen
heit dat ok in Albanjen,
wo männigein drächt schwore Last
in den Meloni-Frömdenknast!

Tau bieten gifft't bloots ein Portschoon
von leidlich saftige Meloon!