Bald is Karne-Wahl! Maat
Jan probeert sik hüüt mal as Karnewahlist: Büttenreed to dat Ampel-Enn
Wi hebbt dree Gäst vör de Döör stahn, de wüllt uns wat vertellen. Wüllt wi ehr rinlaten? (Narrhalla-Marsch!)
Ünner en dunnern Applaus begrööt wi: De dree Ampelmännchen — de Narren Rood, Geel und Gröön!
  
Tätäää! Tätäää! Tätäää!
Wi Ampelmännchen hebbt so veel utstahn,
dat weer al nich eenfach, kunnt wi jo verklaarn.
Mennichwat is us dorbi mallöört,
en Tiedlang heff ik en Ogenklapp böört.
Denn fung dat an, in de Grütt to gahn.
Nu sünd wi to End un köönt nix mehr daan.

Wat hebbt wi us kabbelt, misstruunsch un vergrellt!
Dat kriggt een, wenn he bi us „Führung“ bestellt.
Op end is Olaf de Geduldsfaden reten,
do hett he uns Krischan achtkantig rutsmeten.
De bölkt “Dat hest du mit Afsicht mookt!“,
dorbi hett he sülbst sick de Supp inbrockt.

Un dorüm — dat weer de gröttste Schiet —
fallt de Wahlkampf in de Wiehnachtstied!
Wat wi us al wünscht, is narms nich to sehn,
ton Bispeel mol en poor niege Ideen.
De olen Parolen, de olen Gesichter,
as weern wi bi „Bares för Rares“ vun Lichter!
Tätäää! Tätäää! Tätäää!
  

Sittst du — as wi — twüschen alle Stöhl,
ik segg di, denn warrt de Moors di köhl!
De een wüllt nix weten vun Rezession
un verspreekt noch högeren Minnestlohn.
De annern wüllt wieder unverstört —
as harrn se noch nienix vun Klima höört —
mit Gas inböten, Verbrenner fohrn,
vandaag un wenn't geiht noch in 100 Johrn.

In't Kanzleramt sitt breet un kahl
en Hamburger, man nich „TS royal“.
Dat Broot is ool, de Inlaag fehlt,
wokeen hett bi den denn "Führung" bestellt?!
In Olaf sien kahlen Dööz gedeiht
doch bloß sien berühmte "Besonnenheit"!
Man bloß keen Panik, dat gifft jo to'n Glück
ok noch een annern — ut Osnabrück…
Un wenn de Partein in de Midd nix doon,
denn wählt jümmers mehr de Extremposition.
Un dat weer nich bloß en Verkehrsunfall,
nee, dat wär de Anfang vun'n heel groten Knall.
Dorum wählt dat Richtige, plietsch un gau,
ji Mannslüüd un Froons! Un Diverse! Helau!
Tätäää! Tätäää! Tätäää!
  
Narrhalla-Marsch! Un Afmarsch!
21.1.2025 |