Maat Jan will dat...

BSW verstahn

Kennt Se de BSW? Nee, nich de badischen Stadtwerke, de vun böse Klimapolitikers bedroht warrt. Ok nich de Berleburger Schaumstoffwerke, de Judomatten mookt. Ofschoonst — de kunnen wi in Tokumst good bruken, wenn Sarah Wagenknecht ehre hele Partei up't Krüüz leggt.

Jawoll, ick meen dat "Bündnis Sarah Wagenknecht". Dat weer man jüst gründt, dor kreeg dat al 12% in de Ümfragen. Dorbi weer dat noch nichmol en Partei. Hüüt is dat een.

Vörsitterin vun ehre egene Partei wull Sarah blangenbi nich warrn. Dat wör ehr to veel organisatorische Arbeit. Nich dat se op end noch en Talk-Show verpasst!!

Vörsittersche schull Mohamed Ali warrn — Fro Mohamed Ali! Nich de Muhammad Ali — ofschoonst de mit sien "This is not my war!" jüst op Sarah ehr Linie weer. Man he weer jo ok bi de "Nation of Islam", dat heet, he weer Islamist. Un dorto noch Boxer, also gewaltbereit. Asyl harr he in Düütschland nich kregen.

Dat is schood, denn gegen de Neonazis harrn wi em good bruken kunnt. Statt "Rumble in the Jungle" un "Thriller in Manila" heet dat denn "op de Schnauzen in Bauzen!". — Man nu sitt Wagenknecht doch tosamen mit Ali dem Laden vör. Un Rumble kann dat noch noog geven.

Nanu, woso kümmt de rode Hanschen nich vun links?!

Intressant is, dat Sarah ehr Uttritt de Linke in de Ümfrogen so good as gor nich schaden dä. Dat Volk hett al lang markt, dat se nich mehr links is.

Veel deeper kunn de Linke man ok nich mehr fallen. Se sünd nu keen Frakschion mehr, bloots en "Gruppe". Dat Woort passt ja ok veel beter to jüm. "Also dat mit de Sarah, dat mutt ick eerstmol utdiskuteeren in miene Gruppe..."

In Öösterriek hett sick in desülbe Tied en "Beer-Partei" gründt, un de sünd in Ümfrogen ok op'n Stutz op 12% kamen. Bannig stark för en Beer! Dorbi is Öösterriek eegentlich en Wienland; in Düütschland kunn en Beer-Partei villicht mit noch mehr reken. Tosomen harrn de twee Parteien al 24%. In Öösterriek heet BSW nich "Bündnis Sarah Wagenknecht", sünnern "Beer supen un wählen".

Man en Tosamensluss kümmt natürlich nich in Fraag. So lang as Sarah in ehre egene Partei nich de Chefin is, is de nächste Spaltung jo al aftosehn. Immerhin weet wi nu, wat dat bruukt, üm in de Politik Erfolg to hebben: en populäre Führungsfigur — un en groot Fass Freebeer!