Maat Jan will de...

Ampel inböten

Tätäää: Dat niede Böteree-Gesett — vulgo: Heizungsgesetz — is dor. Un ick, Maat Jan, heff stantepe mienen Volksvertreder in'n Bundsdag anropen, em to grateleeren.

Maat Jan: Moin leve Afordnete X! Dor hebbt Se jo gewaltig wat hinleggt. Hartlichen Glückwunsch to dissen revolutionären Spood!

Afordnete X: Veelen Dank, man dat mit de Revolution laat Se man beter weg, dat much anners de Bevölkerung verunseekern.

Maat Jan: Immerhin brukt nu all niede Hüüs en to twee Drüttel klimafründlich Böteree. Dat gifft en Boom för Wärmepumpen.

Afordnete X: Dor bün ick nich so wiss. Na all de Kretelee is dat Woort "Wärmepumpe" jüst so beleevt as "Weltkrieg" un "Wurzelbehandlung".

Maat Jan: Aver wosaken schallt niede Hüüs denn anners noch buut warrn?

Afordnete X: Wohrschienlich gor nich. Dor warrt eenfach noch weniger but as nu al.

Maat Jan: Wat?! De Regeern löppt doch nu al ehre Teele achterher. Statt 400.000 Wohnungen sünd letzt Johr blots 290.000 buut woorn.

Afordnete X: Denn warrt dat düt Johr wohl blots noch 200.000.

Maat Jan: Woans wüllt ji as Regeern denn dor an ehr Teelen rankamen?

Afordnete X: Na gor nich, as ick segg. Wi mööt sowieso veel nahaltiger mit Teele ümgahn. Wenn wie en Teel schafft hebbt — also wenn! —, denn köönt wi dat Teel jo praktisch wegschmieten — un bruukt foorts en niedet. So en Aaserie köönt wi us nich mehr leisten!! Een kunn doch veel länger mit de glieken Teelen utkamen.
Nehmt wi to'n Bispeel de Milleniumsziele vun de UNO ut't Johr 2000: Entwicklung, Gesundheit, Klima, Drütte Welt un so wieder. De harrn wi 2015 al meist tofaat. Denn avers hebbt wi fix umstüert un sünd hüüt wedder en grodet Stück dorvun weg. So köönt wi de olen Teelen wieder nütten! Un mennig Teelen, de wi al fröher mal faatkregen harrn, köönt wi sogor recyceln — wenn wi gesellschaplich dorachter trüchfallt.

Maat Jan: In'n Eernst?

Afordnete X: Woso nich? De sünd doch allesamt noch good.

Maat Jan: Dat Bötereegesett gellt aver doch af nu glieks.

Afordnete X: Af 2024. Un ok denn passeert eerstmol nix. En intakte Gasböteree blifft.

Maat Jan: Un en nich ganz so intakte...?

Afordnete X: Warrt repareert.

Maat Jan: Wat warrt denn överhaupt anners?!

Afordnete X: Eersmol mutt de Kommune en Wärmeplaan upstelln. Dat freit de Börgermeester, nu hebbt se den swatten Peter. Man se hebben jo bit 2028 Tied. Hild hebben brukt dat keeneen.

Maat Jan: Un wenn en Gemeende en Waterstoffnetz kriggt…

Afordnete X: Denn kann se ehre Gasböteree behollen.

Maat Jan: Un wenn nich?

Afordnete X: Denn ok. Se mööt blots to 15% mit "grönet Gas" lopen, also Biogas un Waterstoff. Vun 2040 an mit 60%.

Maat Jan: 60% grönet Gas? Woneem gifft't dat denn?

Afordnete X: Villicht op't Land un nehgbi bi de nieden Flüssiggas-Terminals. Also in Oostfreesland un MeckPomm. So warrt de Gasböteree en leevtallig pleegte Bruukwies, as Schunkeln un Schuhplatteln bi de Bayern. Orr as uns Plattdüütsch.

Maat Jan: Schunkeln belast nich de Ümwelt, un Plattdüütsch al gor nich!

Afordnete X: Hm, för Platt mag dat stimmen, avers vunwegen dat Schunkeln, dor kennt se de rheinischen Karnevalsleeder slecht. 300 m Ümkrink üm so'n Karnevalssellschap sünd en Todeszone. — Wer denn noch en niede Gasböteree wull, mutt sick vörher beroden loten.

Maat Jan: Een Berodensplicht? Gifft dat doch sünst blots bi Afdrieven...? Meent Se nich, dat dat de Lüüd suur opstött?

Afordnete X: Na klor warrt se dat nich smecken. Ünner us, wi as free Demokraten hangt us dor fix mit ran. As Opposition vun binnen. Wi kunnen de Woot vun Jan un allemann düchtig inböten.

Maat Jan: Mit Biogas?

Afordnete X: Haha, heel witzig. Wi maakt dor en gewaltige Kampagne ut, na dat Motto "Mien Böötketel höört mi to!"

Maat Jan: Un de Ampel?

Afordnete X: Steiht denn op Geel!

Maat Jan: Ick meen de Regeern.

Afordnete X: Och, för de seh ick swatt.

Maat Jan: Un ick för dat Klima. Veelen Dank ok för den Snack.