Maat Jan ut BremenMaat Jan:

Schandaal: Charles mördert söte lütte Kattekers!


 

 

 

Ja, Kroon un Klunker un en Mantel ut dat edle Winterfell vun Hermeline, so sitt he dor, de ole niege Monarch. En Bild as ut de Tied vun Jack the Ripper — de angeevlich ja ok en Blaublüter weer. — Bloots Schauermärken?! Liekso Gresiges bargt de öllerhaftige Keerl ünner sien Hermelinspitzen: Sien Mudder weer noch nich mol ünner de Eer, dor hett ehr afoordige Bengel al sien wohret Gesicht wiest: Reporters hebbt rutfunnen, dat „König“ Charles op siene Ländereen en mörderische Jagd op griese Kattekers veranstaltet. Un dat nu al siet acht Johr.


"De Keerl is en Killer! Wohr di!"

Swatte Knoopogen kiekt di an, de buschige Steert wippt op und al: Se sünd so sööt, de lütten Grieshörnchen. Man nich mehr lang.


"Wosaken kannst mit mi keen Sympathie hebben?!"

Denn nu is in England en Mann op'n Thron komen, de ehr afgrunddeep hasst un gnadenlos keulen un dotscheeten lett: Charles III. kennt keen Barmen mit de lütten Gnager. Un dat bloots wegen ehre Farv. Is dat etwa nich Rassismus – orr wat?!
Griese Kattekers, meent he, höört nor Nordamerika. Dor sünd se vör 150 Johr utbüxt un to us komen. Sietdat staht se ünner Verdacht, dat se de roden Kattekers verdrängt. Dorbi weer dat dat eerste Mol, dat en englischen König Sympathie för Rode hett.

Good, de Griesen hebt en Pockenvirus in sik, de ehr nix deit, man för de Roden döödlich is. Un good, se buddelt ok geern de vun de Roden versteken Nööt ut un mokt dormit de Rode ehre Levengrundlaag kaputt.

Man kennt wi dat nich vun jichenswo her?

So hunnert Johr ehrdat de Grieshöörnchen to us komen sünd, sünd wi nämlich to ehr komen – na Amerika. Un wat hebbt wi jüm dor Fienes mitbröcht?
Jüst dat: de Pocken! Dorto Grippe, Dörfall un annere fiese Viren, de us nich veel utmokt, man de „Rothäute“ (sic!) to Hunnertdusende ümbröcht hebbt.

Denn  hebbt wi noch de Wälder afhaugt un de Bisons utrott‘t, also ehre Levensgrundlaag kaputtmokt.


"Och... dat överlegg ik mi nochmol!"

Jichenswie hebbt se dormols vergaten, angelsächsische Inwannerers konsequent to keulen. So hebbt de sik breed mokt un sünd en Plaag worn, de noch hüüt ünner den Naam „Commonwealth“ wied n sied besteiht. Un ganz boven steiht wekeen? Jüst! Charles III.

Also, leve rode Kattekers: Mokt dat jüst so. Mokt en Griesen to joen Anföhrer un schenkt em af un to en poor Nööt. Bloots ut Dankborkeit, dat he jo noch nich heel un deel utrott‘t hett. So as wi, wi intelligente Minschen.

Dat meent

Maat Jan.



11.5.2023

 


na baven