Maat Jan:

Kommissar in Käfighaltung

Moin alltohoop!

Mit de Seefohrt geiht dat nich vöran, dorum hebb ick nu en needen Job: In de Marketingafdeelung vun de Europäische Union. Dorüm schall ick hier nu över de gröttste Erfindung schrieven, de de EU je mookt hett:

de Glöhbeern!

Och nee, de hebbt wi jo verbaden. Nee, dat weer wat anneret:

de europäische Börgerinitiatiev!

Dormit kunn jedeen EU-Börger, as Se un ick, Gesetten maken. Se bruukt nix as bloots 1 Million Ünnerschriften ut söben Länder. Dat kriegt Se doch wiss fix tosamen.

Wenn Se de in een Johr tohoop kriegt, denn mutt de EU... Tööv mol, wat mutt denn nochmol de EU? Ach jo:

Se mutt gornix!

Se mutt sick bloots dorto "äußern", also wat dorto seggen. To'n Bispeel "Nee!"

Wenn se nich nee seggt, denn geiht dat wieter nor dat europäische Motto: Eerstmol wat seggen, denn över schnacken. To'n Bispeel gifft dat disse Daag en Initiative gegen Käfighaltung. De hett all Ünnerschriften tohoop, nu warrt doröver schnackt, wat de Folgen weern för de, de dorvun bedrapen sünd. Also för Aldi un Lidl.

"Äh, Momang — Aldi un Lidl sünd bedrapen? Äh, un wat sünd wi...? Unschüllig achter Trallen!"

Wenn dat beschnackt is, durt dat in'n besten Fall bloots noch een Johr, bit de EU-Kommission en Vörslag dorto mokt. De warrt denn besabbelt. Wenn all inverstahn sünd (also bloots theoretisch), kunn de Verordnung all fiev Johr loter in Kraft treden. Un 2027 geiht dat denn al los mit ...

... en Käfigverbot?

Nee!

... ene mehrjohrige Övergangstied!

"Och nee, so'n Swienkraam!"

Argerlich is man bloots: So oolt warrt keen Swien. Un eerst recht keen Hohn. Nich mol ne Koh. Wenn de Käfighaltung also wohraftig in europäische Hööchstgeswinnigkeit verbaden warrt, kriggt dat vun de hütigen Käfighöhner keeneen mit. Ok nich ehre Köken. In'n besten Fall ehre Ur-Ur-Urenkel.

För de EU-Kommissare is dat jo egol, de sünd sülvs bloots för fiev Johr wählt. Vun de Haltborkeit her is so en EU-Kommissar dat Käfighohn ünner de Politikers. Dat heet, he hett fiev Johr Tied, sick en komodig Nest in de private Weertschap to buun. Man ob he sick dor hüüt al en Kukucks-Ei rinleggen will — so as en Käfigverbot —, dor kann he nu fiev Johr lang in Roh över bröden.

Joon Maat Jan