Maat Jan hett...

Frohe Bott ut Schnitzelland

Ick bün nich depressiv!!

So, dat wull ick eerstmol klorstellen. Ick find bloß nu mol temlich veele Soken Schiet!

Den Summer to'n Bispeel. Mutt ick nich verkloren, oder? Summerschlager, Summerstau, Summerloch. Un siet körtens ok noch Dröögde.
De Fröhling is ok nich veel beter. De Winter geiht, wenn dor nich de Dezember mit Wiehnachten un Neejohr mit binn weer. Egentlich lett sick bloß disse Tied uthollen: De Harvst. Un de ok nich överall.

Dorför leev ick Öösterriek. Dor föhlt sick een as ick jümmers tohus. Dat Land wiest mi jümmers wedder: Du bist nich alleen. Een good Bispeel is de Anti-Flüchtlings-Kampagne vun Öösterrieks Binnenminister Karner. Dor steiht in grote Lettern un stückerwat Sproken:

Dat warrt nix mit di!

Disse frohe Bott is nich bloots mien neede Bildschirmschoner. Nee, disse Bott schickt dat Schnitzelland disse Daag up Facebook, Instagram un Google Ads an Minschen in acht Länder, de veellicht mol na Öösterreich utwannern wullen kunnen.

Ok schöön: Dat tweete Bild in disse Kampagne hett de Bott

Dat gifft keen Weg!

Noch schöner weer bloots noch en Bild vun Innenminister Karner persöönlich mit den Slogan

Hier waak ick!

So wull Karner "Schleppertransporte mit Booten" verhindern. Klor, wo so veele mit'n Boot na Öösterriek kaamt! Dor is de öösterrieksche K&K-Küstenwaak ja totaal överfordert...

Bit Enn Juli 2022 sünd 43.000 Minschen na Öösterriek kamen. Dormit "is de Belastensgrenze nu dor", meent Karner. Man komisch: An'n Grenzfluss Evro twüschen Grekenland un de Türkei hebbt se annerletzt 1500 Mischen an een Dag (!) fastnomen. Un dat sünd bloots de, de se faatkregen harrn. In de Türkei leevt alleen 3,7 Millionen Syrer.

Mien Bott an Öösterrieks Binnenminister is dorum akkurat de, de he op en drüttes Bild an möögliche Flüchtlinge schickt:

Du kunnst nich blieven!

Joon Maat Jan