Maat Jan ut BremenMaat Jan meent:

Dat Boot is vull!


Dat mutt nu mol seggt warrn:

Ick weet, dat veele Lüüd dat nich geern höörn doot. Ick weet ok, dat een dormit fix in de rechte Eck stellt warrt. Ick verstoh jo de Minschen, ick bün ok keen Rassist, man —

dat Boot is vull!

Wi köönt eenfach nich jümmers noch mehr Lüüd rinloten. Ok wenn mennigeen ut arme Länner kümmt un bloß en beter Leven för sick un sien Familie söcht: eenmol is Fierobend!

Veele wüllt sick woll integrieren, man op End sitt se bloß wedder mit ehre Lüüd tohoop. Dorvun kaamt all de Parallelgesellschapen, de Korruption un dat organiseerte Verbreken.

De Regeerung weer sowiet keen Hölp. Ok wenn se us vörher jümmers dat Gegendeel versproken hett — na jedeen Wahl sünd bloß noch mehr Lüüd rinkomen, de wi — up Düütsch seggt — dörfodern mööt. Op End leevt de jo all vun use Stüürgelder!

Vun wat is hier de Reed?

Ick schnack, heel klor, vun us düütschen Bundsdag.

Dor is dat Boot so vull, dat mennicheen Afordneten al op Stüürbord över de Reling hangt. Dat heet denn Överhangmandat, op Ingelsch hangover. Hangovers sünd foken en Problem bi Politikers. Mennicheen Afordneten hett in de Wahlnacht mehr Promille as Perzente.


Afordnete mit Överhangmandat

Klor, veele vun de kaamt ut Krisenrebetten (Meckelnburg, Ruhrpott, Bremerhaven,...), wo een all ut humanitäre Gründe nümsnich hen trüchschicken kann. Aver nu mutt mol en Slussstrich trocken warrn. So geiht't eenfach nich wieder!

Dorbi is de Lösung so eenfach: Jedeen Afordnete mit Överhangmandat mutt eenfach na siene Wahl de Partei wesseln. Denn warrt se ja na Tweetstimmenandeel op de annern Parteien verdeelt. So blifft dat Wahlergeevnis wohrt, de Bundsdag warrt nich grötter un all, de wählt sünd, sünd ok dorbinn.

Ministers goht mit goden Bispeel vöran

Tomehrst sünd dat jo Afordnete ut de Union. Vun de kunn mennicheen to de Grönen gohn. Dat liggt jo in'n Trend. Andi Scheuer to'n Bispeel kunn vun nu af an to al sien Pressetermine Robert Habeck mitnehmen. Habeck brukt nixnich doon, nixnich seggen, he mutt eenfach bloß dorween un plietsch kieken. Dormit steigert Scheuer sien Beleevtheit lichthannig üm över 1000 Perzent. Un ehrlich, blangen Andi Scheuer plietsch uttosehen is nu nich sooo swoor.


Bi de Pressekonferenz vun
Anja Karliczek

Een hett dormit sogor al anfungen: Anja Karliczek. De mööt Se nich kennen, is bloß use Ministersche för Bildung. Mennicheen hett sick jo in de Debatte üm Scholen, Digitalisierung un Corona fraagt, woneem se egentlich is. Man keen Bang, se hett sick nich versteken. Se hett op Inladen vun de Grönen en Waldorfschool besöcht. Dat hett ehr so good gefulln, dat se ehre Reden un Verordnungen in Tokumst nich mehr vörlesen will — sünnern vördanzen! Ick meen, se kann dat ruhig probeeren. Keen Bang! Kiekt sowieso nüms hen.

Wekeen leider nix, rein gor nix Grööns an sik hett, is Julia Klöckner, use Landweerschapsministersche. Man för ehr hett sick ok en Lösung funnen: Se kann vun nu an de Tweetstimmen vun de FDP mitbruken. In'n (Wien-)Geist vun Heiner Brüderle kunn se nu bit to'n Slechtwarrn en Lanze breken för frie Ünnernehmen as Tönnies un Nestlé. Mit dat Slechtwarrn geiht dat denn ok ganz fix.


Danz orr "Finale Rettungstritt" orr beid — gegen Klöckner

Ok ut Peter Altmeier warrt in düt Leven keen Grönen mehr. Dorför föhlt he sick nu ümso wohler bi'n Seeheimer Kreis in de SPD. De Peter is nu mol en Genosse för de Bosse. Mit sien Vörleev för grote Pläne, grote Portionen un grote Konzerne is he bi de gor nich so roden Bröder heel richtig. Ob nu bi't Stüertricks-Uttuuschen mit Olaf Scholz oder bi't all-you-can-eat mit Sigmar Gabriel: Altmeier is in sien Element. Un ick heff höört, bi Gasprom hett he ok al ankloppt. Een weet jo nienich...

Schall ick villicht ok mol moken, denkt sick

Joon Maat Jan


9.9.2020

 


na baven