Maat Jan ut BremenMaat Jan kennt sik ut mit

Düütsche Froons un düütsche Mackers


Wat is dat bloß wedder för en Theoter bi de SPD! Dor hebbt se ungefähr to de glieke Tied as de Union ehrn Parteidag hatt, un wat för en Ünnerscheed: Hier Angie un ehr Fanclub, dor bloß Krach un Strieteree. Bloß 75% hebbt ehrn Vörsitter Sigmar Gabriel wedderwählt.

Klor, dat kunn passeeren, dat een ok mol en Wahl verleert. Ober Gabriel harr nich mol en Gegenkandidaten. Em ruttofordern, dat hett sick nüms truut. "Schall he man de Orbeit wiedermoken, wi rächt us lever achterüm!" So sett se em op ehrn Thron – un knallt em togliek links un rechts een vör'n Latz.

Dat weern de Mitglieder. As näächst harrn de Afordneten ut de Bundsdagsfraktion ehr Tuur. Gabriel harr in siene Noot versproken, de Mitglieder to frogen, ehrdat de Bundswehr in Syrien womöglich doch noch sülbs in'n Kampf ingriept. Nu seggen de Afordneten: Schiet di wat, de Mitglieder hebbt dor nix mit to doon, dat bestimmt wi.

Wenn de Genossen mol wedder ehr Leevlingsspeel „Hau den Vörsitter“ speelt, denn wüllt ok de Kinner mitspelen. Dorum mookt nu ok noch de Jusos mit. De Jusos sünd so en Mengels ut Kinnergoorn un Intrigantenstadl, wo Studenten so doot, as weern se grote Politiker. To seggen hebt se wieder nix, un dat is bi de mehrsten ok heel good so. Ober mennigeen kunn ok mit inbildte Macht nich umgohn. De Juso-Vörsittersche Johanna Uekermann hett Gabriel in en Interview en „veer minus“ as Schoolnote geven.

Dat de junge Deern meent, se kunn de richtigen Politiker Schoolnoten geven, is jo al drollig. Over Gabriel is bannig suur worrn. He hett sien Staatssekretär Machnig ut't Wirtschapsministerium vörschickt, un de hett bannig lospultert: De Juso-Johanna weer en „dösige Pute“, un överhaupt, dat junge Lüd Politikers eenfach benoten wulln, dat harrn se sick in siene Generation nich rutnohmen. — Wat ok wedder drollig is, denn dat Staatssekret is 55 Johr old, he weer also Juso to de Tied vun Kanzler Schmidt, wo de Strieteree twischen Jusos un Parteispitze noch veel luder ween is. Entweder Machnix hett sin egene Jöögd vergeten, oder he is dormols al en angepassten „Jo, Chef!“-Segger ween, jüst as hüüt.


Gabriel kann ok mal den Erzengel rutlaten!

Heel anners de Union mit ehr Krabbelgruppe, de Junge Union. De hett nu vörslogen, de Nationalhymne in dat Grundgesetz optonehmen. Dat is doch mol en moje Idee! Fragt sick bloß, an wecke Strophe de Jungmerkelianer dacht hebbt. Seker nich de eerste. De hebbt twoors bi dat „Wunner von Bern“ noch alle lut mitsungen, ober „över allens“, dat geiht hüttodags eenfach nich mehr. Ober worum nich de tweete? Gegen de is doch eegentlich nix to seggen. Ick wull to geern mien Grundgesetz opslagen un lesen:

„Artikel 1
Düütsche Froonslüd, düütsche Treue, düütsche Wien un düütsche Sang
schallen in de Welt behollen ehren olen, goden Klang.“


Hier sünd düütsche Wien un düütsche Sang in een Bild to sehn. De twee hangt sowiso teemlich tosamen. Düütsche Froonslüüd dorgegen neiht ut, wenn dat al so wiet kamen is as in dat Bild

Besünners goot gefallt mi de „gode Klang“. Denn kunnt wi endlich Heidi Klum (Froonslüd), Horst Seehofer (Treue) un Xavier Naidoo (Sang) as Verfassungsfienden verhaften. Vun Helene Fischer mol gor nich to snacken. Un de Lorelei. Froo, singt un hett mit Wien to don – wekeen över de noch Leeder singt, warrt forts insperrt! De CDU-Talkshow-Tante Julia Klöckner hört as Ex-Wienkönigin un konservative Quasseltante ok op de Liste. De fordert nämlich ene „Integrationsplicht per Gesett“, also en Gesett, wo in steiht, du schallst di an de Gesetten hollen. Super, dorop hebbt wi al so lang töövt!

Super sünd ok de praktischen Tipps, de Kölns Oberbörgermeestersche för annere Froons parat hett. In Köln sünd jo to Silvester veele Froons angrepen, beklaut un belästigt worrn. Dorum schall en Fro eenfach jümmers eene Armlängde Afstand to fremde Mannslü hollen. Denn passeert ehr ok nix. So eenfach is dat. Wo een dat in en Gewöhl vun Minschen so as vör'n Kölner Hauptbahnhof to Silvester moken schall, hett de Börgermeestersche nich seggt.


Fahndung: Düsse Mann drangsaleert en Fro (süh ünnen), dat se wat dorgegen doon schall, dat anner Froons drangsaleert warrt. Notorische Seriendeder, he drangsaleert düsse Fro anduernd! Südländische Typ, wohrschienlich Bayer.

Mennig Froons hebbt utseggt, dat se vun Mannslü, de arabisch oder nordafrikanisch utsehn hebben, belästigt worrn sünd. Un forts sünd dat wedder de Flüchtlinge ween, ok wenn wi noch kieneen identifiziert hebt. Dorbi gifft dat arabische Mannslü bi us al siet de 50er/60er Johr.

Wenn een dor nich schuld an is, denn de CSU. De weet ok, wo se de Flüchtlingskrise löst: Dör Nichbeachtung. 200.000 Flüchtlinge, ungefähr so veel as 2014, kunnen wi allerhöchstens upnehmen, meent se. Dat sietdem mennichwat passert is in de Welt, in Syrien, Irak un annerswo, dat interesseert se gor nich. Dat de tostännige Amtschef Weise 500.000 upnehmen wull, ok nich. Eenfach so doon, as wenn allns as fröher weer, denn gaht de Probleme vun sülbs irgendwann wech. Bloß bi 'n Mindstslohn, bi Werkverdrääg un bi Leihorbeit, dor möt wi nu allns anners moken – wegen bloß 200.000 Lüd?

De Kanzlersche wull un wull dat nich kapeeren. Dorüm hett Seehofer ehr nu noch mol en Frist sett, bit Ende vun dit Johr schall se de Flüchtlinge reduzeeren, anners wart Horst grantig. Dat mutt een sick mol vörstellen: De CSU sett de Bundskanzlersche en Frist, bit wenn se de Probleme lösen schall. Un se kuscht un lett sick dat jümmers wedder gefalln.


"Revanche nehm ik later. Dorop en düütschen Wien!"

Dat en Hupen besopen Keerls in Köln glöövt, se kunnen en Fro drangsaleern as se wulln, is al slimm. Man dat en nüchternen (?) CSU-Chef meent, he kunn de Chefin vun de Düütsche Bundsregeerung rumschubsen, as he wull, dat is vellicht noch jüst so en groden Schandol,

dat meent

Maat Jan




10.1.2016


na baven