Maat Jan:

Angies Truppe

Ulla von der Leyen hett veel to doon disse Daag. „Dat is en swore Upgaav, man ick hebb mi dor intensiv op vörbereitet“, seggt se. Wat is dat för en swore Upgaav? Waffen för de Bundswehr beschopen, Ukraine, Nato-Manöver?

Uschi riedt! Warrt de Riedpietsch nu de Standardwaff vun de Bundswehr? In een Johr heet dat denn: Schandaal! De Riedpietschen vun Heckler un Koch knallt gor nich richtig!

Nee, nix dorvun. Se möt nor Aachen un de Reit-EM eröffnen.

In de Tied rost de Utstattung bi'n Bund wieder freedlich vör sick hen. Een Drohne, de 670 Millioonen kost hett un to nix good is – mookt nix, Ulla hett fix en neede Drohne bestellt, de wedder so veel kost un, bit se fertig is, wohrschienlich ok nix mehr döögt. Good, dat wi jüst keen Fiend hebben, anners weer de veellicht so gemeen un bestellt siene Drohnen eenfach bi'n Media-Markt. De sünd ruck-zuck dor!

Wo heet noch dat bekannte Musical? "Uschi get your Gun!" Oder?

Dorför hebt wi nu en fixe Ingreeptruppe. De grippt veellicht fix in, man se greept in't Lerrige: Se hett keen Materiaal un möt sick allns bi annere Kasernen utborgen. Un wenn se Gewehre hebbt, denn bloß solk, de nix drapen doot. Dat G36 is so en hooch empfindlich Gerät, dat kunn keen Hitt af. Klor, heet jo ok „Stormgewehr“, dreept also bloß bi Schietwedder. Anners hebbt de Taliban eenfach mol Hitzefree. Dat hett sogor kort mol Knaatsch geven in de Regeerung. Ulla hett seggt „Dat Gewehr is Schiet!“, de Maizière hett seggt „Dat Gewehr is good!“ Dorup Ulla: „Ick hebb desülvige Meenung as Herr de Maizière.“ Dat Gewehr is also: gode Schiet! Un Ulla is en Fro, de weet, wat se will: An de Macht blieven. En Bundswehr-Manöver is as Lotto speelen: „As jümmers ohne Gew(e)ähr“. Op End schickt Ulla ehre Soldaten noch to'n Betteln in de Footgängerzone: „Hes du mol 'ne Knarre?“ So börgernah is de Truppe wohrlich al lang nich mehr ween.

Dorum möt Ulla ok nor Aachen to de Rieders. Wekeen weet, wenn dat mit de maroden Fleegtüüch, Heevschruvers un Panzer so wiedergeiht, brukt wi op End noch mol de gode olde Kavallerie.

Anners givt dat natürlich keenen Knaatsch in de Regeerung. Över wat ok? De Ministers mokt bloß noch Deenst nor Vörschrift. Wenn een wat will, heet dat fix „Dat steiht nich in'n Koalitionsverdrag“, un dormit is de Saak erledigt. Pech för de Minschen, de op ehr Flucht ut Krieg un Verdrievung jüst nor Düütschland koomt. Se stunnen nu mol nich in'n Koalitionsvertrag. Dorum köönt wi ok nix för se moken. Wi mokt jo al mehr as de annern, tominnest mehr as de, de gor nix mokt. Ohn Schleuser schafft dat sowieso keeneen to us, un de mit Schleuser koomt, steckt wi eersmol in'n Knast dorför, dat se so wiet komen sind. Un denn rüümt Merkel eenes Dags ehre Waschmaschine ut un markt „Wat! Överall Flüchtlinge. Wo koomt de bloß her? Ick heb doch gistern noch allns dörwischt. Nehm ick veellicht nich dat rechte Flüchtlingsbekämpfungsmittel? Wat wirkt mehr, Meister Klopper vun NPD oder dat AfD-Produkt: de weiße Fiese?“ Keen Wunner nich, dat en lütt Deern to weenen anfüng, wenn Merkel ehre Politik to verkloren versökt. Wat möt een för en Hass op Kinners hebben, disse Fro „Mutti“ to nömen!

Man as Drohmittel funktioneert se wunnerbor: „Wenn du nich glieks ruhig bist, denn haalt di de Hosenantoog!“ Givt jo ok Kinners, för de Kommunikation ers bi 99 Dezibel losgoht. Wenn ick so en Gör drap, denk ick jümmers „Di schall de Angela holen.“

Un Drohmittel sünd ok anschienend de eenzige Spraak, de disse Flüchtlinge verstohn. Wiss hebt se ok en Spraak, man de verstaht wi nich. Dorum snackt us Politiker nu al vun „Flüchtlingsbekämpfung“ (Merkel), „Afschreckung“ (de Maiziere) un „Afwehr“ (Kiesewetter, CDU-MdB). Dorför dreiht se sogor de Tied trüch. Över 2000 Johr nor de Erfindung vun Geld schallen de Flüchtlinge wedder „Sachleistungen“ kriegen. Bruukte Kledaasch, verfuulte Levensmittel, all dat, wat wi nich mehr hebben wullt. Un för de Hüüs, wo Flüchtlinge in ünnerbröcht sünd, kunnen wi ok mol us buurechtliche Standards son beten bisiet loten, meent de Ex-Weinkönigin Julia Klöckner, nu Chefin vun de CDU Rheinland-Pfalz. Klor, wat schallt wi us ok groot Möh geven mit de Flüchtlingsheime, wenn de sowieso glieks wedder afbrennt warrt? De Lüüd bruukt doch keen Brandschutz, de schallt sick doch bi us as tohuus föhlen. Dat Geld, dat wi so inspoort, brukt wi för de lütten Filmchen, wo wi de Flüchtlinge verkloren, worum se us överall willkamen sünd, bloß nich in Düütschland. Dormit de Pakistanis weet, dat se in ehre Heimat jümmers noch sekerer wohnt as in en düütschet Flüchtlingsheim. Dorbi fehlt use Wirtschap an alle Enden de Fachkräft. Man de fehlt nargens mehr as in de Regeerung.

Een gode Idee het dit eene Mol de NPD hatt. Se wull in'n Lager. Dor höört se för mi jo al lang hen. Ersmol wullen se dor bloß as Besökers hen, sick mol ümkieken. Man dat is jo al en Anfang. Un wenn se ers mol dor binn sünd, slot sick still un heimlich dat Tor un denn... Over dor is wohl jüst mien Fantasie mit mi dörgohn.

Torsten Albig. Hett sien Friseur nich ganze Arbeit daan? So een brukt de SPD!

Over anners gift dat wohrlich keen Grund, sick to strieten. Un wiel dat keen Knaatsch gift un se sick al so wunnerbor leev hebbt in de grode Koalition, dorüm mach ok keeneen an de Wohl 2017 denken. Siet Hannelore Kraft seggt hett, se wull nich de Ersatz-Merkel moken, is de Wohl sowieso so good as lopen. Ob de SPD nu Sigmar Gabriel, Doris Köpf oder den Ex-Friseur vun Gerhard Schröder as Kandidaten opstellt, is doch ok al schietegol. Vun mi ut ok den Friseur vun Torsten Albig.

Is bloß so'n Vörslag vun

Maat Jan