Maat Jan speelt...

Hessisch Roulette

Op mien ole Schooltasch har ick'n Bulten Stickers. Dat weer in mien Schootied so "in", un dorbi weer ok een vun Alf, een quasselnden Hoorbulten ut'n Weltall, de dormols in TV to sehn weer. Op mien Sticker seggt Alf een för em typischen Satz: "To'n Swiegen fehlt mi de rechten Wöör." An dissen Sticker har ick jüss wedder denken müßt, as ick den SPD-Chef Beck up sin Pressekonferenz över de Linke schnacken hört hebb.

Un dat nich bloß wegen de butere Ähnlichkeet twischen Beck un Alf. Ok Beck har dütlich nor de rechten Wöör söcht, üm nix to seggen. So veele lütte "Äh"s har nich mol Edmund Stoiber to sin beste Tied inbuen kunnt.

Dorbi is Beck man ok in en missliche Laag. Up eenmol gifft dat dor een Partei up'n linken Rand, de em de Stimmen wegnimmt. Wenn so en Problem op mol updökt, denn wart ok en stevigen Kerl as Beck fix wedder to en lütten Jung: Oogen tohollen, Luft anhollen un töven, dat dat Problem wedder weggeiht. Wenn dat Problem nich vun sülvs weggeiht, ward dat to en Tabu erklärt: Linke is bäh, mit de speel ick nich mehr. Wenn dat Problem nu jümmers noch nich weggeiht, denn wart he fix mol eben krank un lött de annern en Lösung finnen.

Ober dor wasst Beck över sick rut: In en vertroliche Runde lött he dörblicken, dat de SPD in Hessen sick jo veellicht doch vun de Linke wählen lött. Dumm weer bloß, dat bi de lütte Runde ok Reporter bi wesen sünd, de dat fix utposaunt. Fix schriegt de annern Parteien "Woortbruch", opmol har jeder inne SPD en wichtige Meenung dorto, de he unbedingt in irgendeen Zeitung loswarrn müss. Op End gifft de SPD-Kandidatin, de eegentlich bi de Wohl wunnen het, op, un Roland Koch, de eegentlich bi de Wohl verloren het, blifft in'n Amt.

So har Beck een groden Erfolg för sin Partei jüst eben noch verhinnert. Un nich bloß een: Ok in Hamborg har sick Naumann al "op de Överholspur" föhlt, dor kummt up een Mol een LKW mit Mainzer Kennteken as Geisterfohrer op de linke Spur op em to. Un eh dat he sick versüht, stunn he op de Standspur. Un "us Ole" braust op de rechte Spur an em vörbi. — Kort dorop woor Beck krank un hett de Stimm verloren. Villicht een Glück! So kunn he nich noch mehr Lüüd üm Kopp un Kragen sabbeln.

So veel Führungskompetenz dreept een anners bloß noch bi de Dütsche Bohn. Dor weer jo um een Hoor en nede Striek losgohn, ehrdat wi öberhaupt merkt harrn, dat de erste Striek vörbi weer. An de Pünktlichkeet vun de Töög merks dat jedenfalls nich. Ober dit Mol har de Bohn vörsorgt un al en Notfohrplan utorbeit. Un denn harn se sick — woll mehr ut Versehen — doch noch mit de Gewerkschaften eenigt. "Och nee", seggt dor de heele Bohnvörstand, "wat mokt wi nu mit usen schönen Notfohrplan?" Un se hebt sick seggt: "Wat schall't, Striek oder nich, de Notfohrplan möt ween!" Dorum föhrt hüüt de Intercitys nich, de ok bi Striek nich fohrn, ofschoonst gor keen Striek is un se eegentlich fohrn kunn. De Regionaltöög fohrt, sowiet de ok bi Striek föhrt wärn. Un de ICE föhrt eenfach bloß alle twee Stunnen, egol ob Striek oder nich. Allns klor?

Wekeen dor noch dörstiggt un meent, so süht godes Krisenmanagement ut, de kunn sick op een opneegst free warden Spitzenposten bi een grode dütsche Volkspartei bewarben, meent

Maat Jan

P. S.: Dat mit den "Woortbruch" schient mol wedder Mode to warrn in de Politik. Vör'n poor Johr har use hüdige Wirtschaftsminister noch meent, mit de "Ökostalinisten" (=Gröne) kun dat kien Tosomenorbeit geven. Sin Chefin un "us Ole" straft em nu Lögen. Dor wull nu ok de FDP, jümmers Experten för gezieltes Ümfallen, nich bisiet stohn un kunn sick op mol doch wat anners vörstellen as jümmers bloß swatt-geel. As de Dominosteen: Wenneer een ümfallt, ritt he all mit. Bloß dat dat bi'n Domino stüert aflöppt, un in de Politik stürt dat kieneen. En unstürte Kettenreaktion givt dat woanners ok: to'n Bispeel in en Atombombe. Dor schall use Chefphysikerin Merkel mol över nordenken, meen ik man bloß.