Maat Jan ut BremenDüsse Text is us per Flaschenpost vun Maat Jan tospöölt woorn. Dorwegen is he ok nich mehr so ganz aktuell. Man ünnergahn is de Flaschenpost nich, un dorüm schall ok düsse Text nich ünnergahn:

(De) Made in Jamaika


Schode! Dat is nix wurn. Ick hebb mi al heel freit to disse neede "Jamaika-Koalition". Dor hett sick de CDU mol wat infallen loten, so'n büschen Jamaika-feeling is jüs, wat wi in Dütschland bruken. Ick wull mi al as Sachverstännigen to Verfügung stellen. Jamaika kenn ick as min Seesack, ick bün dor al foken vor Anker gohn. Frog bloß mol de Deerns in irgendeene Kaschemme in Kingston...

Ober nu is dat jo nix wurn, de Grönen wullen nich. Un jüs as dat heet, wi brükt een grode Koalition, is Hennig Scherf op mol torücktreden. De is ok en Sachverstännigen, denn

1. he kunn mit jedeen un ümarm jedeen,
2. he kunn sogor Geld verschludern, ohn dat he Geld harr,
3. he mokt al lang een grode Koalition.

Bremen hett jo kien Jamaika-, sonnern ene Speckflagge (rood-witt). Nor de Tierchen, de gern in Speck leven, möt dat also "Maden-Koalition" heeten. Dorum is ok in dat heele Bunnesland Bremen bannig de Wurm in.

Wat gevt noch för Möglichkeeten? Schleswig-Holstein hett jo blaag-witt-rood in ehr Flagg. Holland ok. Un sogor Frankriek is blaag-witt-rood. Ober politisch kunn Blaag-witt-rood bloß noch de SPD in Bayern ween, un de steiht bekanntlich ünner Artenschutz.

Un Düütschland? Wi hebben jo ene Nationalflagge, de is swatt-rood-geel. Dat heet, wi bruken egentlich en grode Koalition, wo ok noch de FDP mit bi is. Un Nanu? Swatt-rood un liekers Jamaika? Dat geiht also doch?!wenn de kummt, denn heet dat bloß noch Segel setten un utwannern! Op't Best nor Jamaika!

Meent
Maat Jan



na baven