Maat Jan stellt vör:

Rode Bröders

Wild is de Westen, schwor is de Beruf! Dat weet wi al siet de foftiger Johrn, un dat möt ok Gerhard Schröder disse Daag wedder faststellen. Dör'n Tofall bün ick letzt an een Schrieven komen, wo dat Programm för den Sünnerparteidog vun'ne SPD beschreven ward. Heel inneressant funn ick vör allen: "Is de Soziolstoot noch betohlbor? Een Impulsreferat vun Karl Mai."

Vun Karl Mai! Dor is mi eeniget klor worn! Kieneen anners har dat al so spannend un phantasieriek erfinnen kunn. De eene lütte Bookstaav ("i" för "y") is man bloß een halfhartige Tarnung. Un de ole Meesterverteller is ok wedder up de Höcht vun sien Talent:

Wi sünn al mitten in dat Aventüür: De roden Bröders sün op'n Kriegspadd! Man hüüt is dat al 'n beten anners, as dat fröher weer. Statt gegen den Öölprinz vun'n Irak to kämpen, kabbelt sick de roden Krieger gegensietig. Sogor eern Häuptling wüllt se nich mehr pareern. Dor kunn em ok sien Bloodsbroder Old Schüttelhand nich wieter helpen. Un een Genosse, de noch achter sien Kanzler steiht, mach sick mitünner vörkomen as de letzte Mohikaner — oh, dor sünd wi jo bi'n totol verkehrten Schriever. Man dat nützt nix, ok he kriggt för sien orthopädischen Ledderstrumpf keen Cent mehr vun'ne Kasse.

Dor helpt bloß no eens: De Schatz in'n Silbersee! Dorum is Karl Mai ok jüst de rechte Mann för dissen Sünnerparteidog. He brukt nich lang schnacken, man bloß fix vertellen, wo he den Schatz bunkert hett. Anners geiht em dat as veele Bleekgesichter tovör: He kann gohn, man sien Kopphuut blievt dor.

Hugh! Ick hebb sproken!

Maat Jan