Looptied, Jod un Loriot

Vun Jens-Peter Bey

Op'n Staat is Verlaat. Wenn de Swiensgripp grasseern deit, bunkert he Serum op Dübel komm mal rut. Bös Pech, dat de Lüüd sik nich sprütten laten wüllt. Dat schöne Serum is nu för de Katt. Liekers hebbt se bi Gläxo, Smitt & Lütt danzt as de Biba-Butzemann. Ehr Kniep weer prallvull. All'ns vun uns Stüergroschen betalt. För nix.

Op'n Staat is Verlaat. Wenn de Atomwahn grasseern deit, bunkert he Pillen mit Jod op Dübel komm mal rut. Wat'n Glück, dat se de Looptied vun de Meilers verlängert hebbt. Denn sünd de Pillen viellicht doch nich för de Katt. Bi Vattenfall & Consorten danzt se as de Biba-Butzemann. Ehr Kniep warrt prallvull. All'ns mit de Stromreken to betalen. För de Brüüch in en Tokunft mit Strom ut Wind un Sünn.

Du schüttköppst? Bangbüx. Nich immer den Dübel an de Wand malen! Tschernobyl is lang her un wiet weg. Wenn in Krümmel de Karn vun den Reakter smölten deit, is dat för uns en besünneren GAU. De Uranschiet verkrümmelt sik slankweg dörch den Eerdball un kümmt op de anner Siet ungefähr in Peking op'n Platz för'n Himmlischen Freeden wedder rut. Wiel Peking in China liggt, nömt man dat ok "China-Syndrom". Geev mal enen feinen Film dorvon. Hollywood hett en Atommeiler wackeln laten, dor stünn di in't Kino de Sweet op de Steern. Wenn bi uns de Schell vun en Elv-Atom-Ei "in echt" anfangt to bröckeln, hebbt wi hier ok uns Himmlischen Freeden. Hest du aber dien Jod-Pill to Hand, is dat all halv so leeg. Jüst dor liggt aber en lütt Problem.

De meisten Jod-Pillen för Norddütschland sünd meern in Holsteen in Niemünster bunkert. 5,5 Milljonen Jod-Pillen luert dor goot tempereert op ehren schönsten Dag.

In Niemünster in Holsteen lagert de Pillen för ganz Noorddüütschland

Tja, da sitt mal wedder de Düwel in't Detail!

In twölf Stunnen schüllt se gerecht verdeelt ünner de Lüüd bracht warrn. Poor Stünnen later speelt de Schilddrüüs nich mehr mit. Dat mit de Gerechtigkeit is nich so enfach bi 2,8 Milljonen Sleswig-Holsteener, 1,8 Milljonen Hamborger, 1,6 Milljonen Mekelnborger un 8 Milljonen Neddersassen. Ik stell mi dat ganz praktisch vör. All de Schacheln oprieten un gerecht portschoneern. Ob dor nuch Tablettenkniepers sünd? Dat is 'ne Heidenarbeit. Un denn noch gau nuch in Norddütschland verdeelen. Am enfachsten mit so'n Quirlfleeger. Aber de sünd nich immer glieks to Hand, wenn dor Opregung in't Land is. All de Kameralüüd mütt ok rümkutscheert warrn, egal ob de strahlenden Minschen noch in'n Kasten kieken mögt. "Brennpunkt" mit'n Fohrrad-Mega-Stau op de Autobahnen bi Buddikate un Brokenlann un vörn Elvtunnel. De Blechkutschen kommt nich mehr vör un trüch. Dor is ok för lütte Jod-Pillen-"Sprinter" keen Dörchkamen.

Dat Bunnsamt för Strahlenschutz kann ok reken. Dormit de Jod-Tabletten reckt, hebbt se 'n lütt beten indeelt, keen Jod kriegen dörf: Kinner, junge Lüüd bit 18, Fruunslüüd mit'n Baby in'n Buk oder an de Bost künnt sik dat in de Grundscholen oder in ehr Wahllokal afhalen, wenn se nich mehr as 100 Kilometers vun den Havaristen weg wahnen dot. Düt Selekteern is een Schandaal! Dor hölpt blots eens: Privatiseern! Mit McJod, JodKing, Jodbucks as lütte Dochterfirmen funktschoneert dat Todeelen op't best. Bingo! — Du denkst, nu hebbt se mi in'n Bregen scheten oder 'n poor ole Tschernobyl-Beckerellis hebbt mienen Kupp dörcheenanner bröcht? Wenn du mi nich glövst, kannst du di hier mal ankieken, woans dat regelt is, wenn de Strahlenwulk öber dien Hus trecken deit.

Nu bist du bedeent? Wisst vun Atomstrom nix mehr weeten? Dat is veel to vörielig. Eerst musst di klok maken! Hör nipp to, wat Loriot sien Bello all in de 70er-Johrn to vertelln harr! Hett de eenzig Hund, de snacken kunn, domals dozeert: "Otto Mohl fühlt sich unwohl am Pol ohne Jod?" Nee!! He hett as Experten-Meen in de Welt huhlt: "Otto Mohl fühlt sich unwohl am Pol ohne Atomstrom!" Sühst wohl!

Wenn wi düt Dierten-Niwo bi't Diskureern hüttodags holen künnt, sünd all fein rut. Un denn fehlt nich mehr veel un mien Idee mit dat Privatiseern hett eernsthaftig Tokunft. Ok för dat Endlagern vun Strahlenschiet. En afhalfterte Bunnskanzlersche kunn sik denn 'n Groschen toverdeenen för den "Schacht Angela".