Ramstein in Litauen?
Rudninkai un Rukla — dat düütsche Ramstein un Kaiserslautern in Litauen

vun Behrend Böckmann

In't Bundsland Rheinland-Pfalz läben gaut vier Milljonen Inwåhners un hentau kåmen dei rund 52.000 Amerikaner, dei as Soldaten, Reservisten un Zivile up'e US Air Force Inrichtung in Ramstein un inne Military Community Kaiserslautern läben. So bemöten sik up dei 20 km lange Strecke twüschen Ramstein un Kaiserslautern wull mihr Amerikaner as Düütsche, dei ok in Deinsten von'n Amerikaner ståhn.

Ramstein is dei gröttst amerikan'sche Militärinrichtung vonne US Air Force in't Utland, Ramstein is Dreih- un Angelpunkt för Truppen- un Frachttransporte, dor gifft dat 'n Lager för Atom- un anner Waffen un dat gröttst Lazarett butenhalf vonne Staaten. Boeing-, Lockheed-, Herculesfleiger un noch väl anner starten un lannen in Ramstein, dei NASA hett sik in Ramstein innist't, Ramstein is Sitz vonne NATO-Kommandobehörden un Insatzzentrale för't NATO-Rakentenafwehrsystem. Amerikan'sche Soldaten, dei in Europa Deinst måken, kåmen œwer Ramstein in Europa an, von Ramstein ut warden Drohnen in alle Welt stüert, åhn Ramstein in Düütschland künn Amerika sien Rull as Weltschandarm nich so gaut spälen.

Dor kann 'n blot vermauden, dat sik Boris Pistorius as Kriegsminister 'n Ogenspeigel an Ramstein nåhmen hett, üm dei Bundswehr "kriegstüchtig" tau måken. Hei is sik mit 'n Kanzler œwerein, dat Düütschland wedder vörangåhn möt un, wenn nödig mit Waffengewalt, dei frieheitlich-demokratisch Ordnung mit ehr abendlännisch Kultur verdeffendiern möt. Un in Litauen, wo dörch dei Neechte tau Russland — un dat Bispill Ukrain vör Ogen — dei Regierung den "Tyrannen Putin" nich œwer'n Wech trucht, söcht man Bistand in Düütschland, un uns Kriegsminister un sien Kanzler kåmen œwerein, åhn dat dat Kabinett un dei Bundsdach taustimmen, dat in drei Johr dei düütsche Litauen-Brigade as Läbensversäkerung för Litauen Gewehr bi Faut steiht. So'n Oort "Lütt Ramstein" sall bi di Urtschaften Rudninkai un Rukla inne Neech vonne beiden Grotstädt Vilnius un Kaunas entståhn. Litauen sülben gifft dorför ein Milljarde € ut un will 4 Purzent von den eigen Hushalt för't Militär utgäben. 1600 ha Holt sünd all rüümt, 30 km an Stråten buucht. Taun Vergliek: Tesla wull 154 ha Holt rümen un kreech dat gliek mit dei Gräunen tau daun. Ganz anners in Litauen, wo einst dei Memel dei Scher tau Düütschland wier un dei Stadt Memel bet 1920 as dei nüürdlichste düütsche Stadt in Ostprussen un dat Dur tau dei Kurisch Nehrung güll. Hüt heit Memel Klaipeda un hett n' groten litau'schen Håben.

Litauen: Uurole Festungen un Karken tügen von dei Kolonialisierung dörch Düütsche

Dat Rebeit üm Memel harr ok den Nåmen "Lüttlitauen" un is wull åhn dat, wat wi hüt Düütschland näumen, nich dat worden, wat dat hüt is. Üm 1200 siedeln Düütsche in't Baltikum, üm den christlichen Globen ünner dei Lüd tau bringen. 1255 ward Königsbarch un 1400 dei Tilsiter Borg grünnt. Mål harr dei König von Prussen un mål dei Kurfürst von Sassen as König von Polen dat Seggen. Litauen sülben wier mål Deil von Polen un denn wedder Deil von Russland; dörch dat Versailler Afkåmen von 1919 warden Polen un Litauen Natschonalstaaten. Litauen ward in Utsicht stellt, dat dat Memelland litauisch ward, wür œwer vörierst ünner Upsicht von Völkerbund stellt. Un denn kümmt dat anners: 1922 ward "Mittellitauen" mit dei hütige Haupstatdt Wilna polnisches Staatsrebeit, 1923 nimmt Littauen dat Memelrebeit in, denn kümmt dat 1926 in Litauen un ok in Polen taun Putsch — un dei parlementorisch Demokratie is an'n Enn'.

Ut Bang vör Stalin paktiert man mit Düütschland un jubelt 1939 Adolf Hitler tau, as hei Memel besöcht. Denn kümmt dei Œwerfall up Polen, dei Juden vör Urt warden hellhürig un nähmen Rietut in Richtung von't noch friee Litauen, doch Stalin föllt œwer Ostpolen her un marschiert denn wieder un måkt ut Litauen 'n Rebeit vonne Sowjetunion. Doch denn marschiert 1941 dei düütsche Wehrmacht in Litauen in, schasst dei Rode Armee, un fix finnen sik litau'sche "Kollaborateure", dei ut Juden- un Kommunistenhass wihrend dei düütsche Besatzungstiet twüschen 1941 bet 1945 dei Nazis helpen, dei "Judenfråch" in'n besett'ten Deil von Litauen tau "lösen".

Dat is son'n bäten groff dei Geschicht, doch dei gifft uns tau verståhn, worüm Litauen leiwer mihr von Düütschland höllt as von dei Sowjetunion, sülfst wenn dei Russen up'e Potsdamer Konferenz in'n Austmånd 1945 taustimmen, dat dat einstig Rebeit Litauen mit 'n Deil von't düütsche Memelland dei Litauische Sowjetrepublik billen sall. Mit den Fall von'n Iesern Vörhang löst sik dei Sowjetunion sachtens up; noch gägen den Moskauer Willen reep dat litauisch Parlement an'n 11. Lentmånd (März) 1990 dei eigenstännig "Republik Litauen" ut, man secht sik los von Moskau un Moskau is nå eineinhalf Johr inverståhn un stimmt dei Unabhängigkeit tau. Ok wenn't noch olle Verbinnungen tau Moskau gifft: Litauen schuult nå'n Westen, nå dei EU un dei NATO. 2004 is dat Johr, in dat Litauen NATO- un EU-Maat ward un dei Schengen-Afmåkung för Litauen gellt; 2015 hett dei Litas as Währung utdeint un dei Litauer hemm' den Euro inne Kniep.

Litauen spält nu den Portjäh anne EU-Husdör un mücht giern uppassen, dat dei Russen nicht tau brösig warden. Un so deit Litauen allens, dat dei düütsche Litauen-Brigad all dat vörfinnen deit, wat nödig is an Wåhnungen für bummelig fiefdusend Militärs mit ehr Fomilien, œwer ok an Stabs- un Kompaniehüsung, Scheitbåhnen un wat noch so nödig is för 'n schwore Kampfbrigad'. Dat gröttst Ünnernähmen vonne Bundswehr butenhalf von Düütschland sall 2027 in Betrieb gåhn un näben dei militär'schen Inrichtungen sall dat allens gäben, wat för dat Läben vonne Fomilien nödig is: Spälschaulen, Schaulen, Diskaunter, Krankenhus, Kino un Theoter, Wirtschaften un Deinstleistungsünnernähmen... 'n Stadt in dei Grött von Ludwigslust sall in por Johr von'n Teikenbrett in Düütschland bi Rudninkai un Rukla in Litauen up 'n Rebeit entståhn, dat mit't Bombodrom inne Wittstock-Ruppiner Heid tau verglieken is.

Inne Ampel sünd sik all œwerein, dat 'n mit dei düütsche Litauenbrigad' den Düwel Putin uphollen möt, wiederhen den Fräden in Europa in Gefohr tau bringen. Un klammheimlich singen's all tausåmen: Wecker sall't betåhlen? Wecker hett't bestellt? Wecker hett väl Pinkepinke? Wecker hett väl Geld?