vun Behrend Böckmann

Milljarden würn in twinnig Johr ümsüss utgäben, üm dei liberale Demokratie, uns abendlännisch Verständnis von'n Läben in Frieheit an'n Hindukusch in staatlich Hanneln ümtausetten. Un man hett ok Helpers vör Urt funnen. Dor is taun Bispill Hamid Karsai (Johrgang 1957), dei as Präsident von Afghanistan von Amerika un dei NATO-Bräuder fiert un anne Macht hollen wür un låters "Al Capone von Kandahar" näumt wür. Hei ward dorbi vergläken mit Alphonse Capone (1899-1947), dei tau sien Tiet Baas vonne Ünnerwelt in Chicago un dor dei gröttst Kriminell wier. Un Karsai sien Nåfolger Mohammad Ghani (Johrgang 1949) wür äbenso von Amerika upfaudert, bet denn nå twinnig Johr "Demokratie un Frieheit" an'n Hindukusch nich mihr tau hollen un allens wedder bi'n Ollen wier.

Un liekers hemm' erfinnerische Minschen, dei nich dei Raketen un dei Splettung von Atomen erfunnen hemm', üm in't All tau fleigen orrer Atomstrom tau måken, sonnern üm in'n Kriegsfall dei Näs vörn tau hemm', ok wedder wat dortau lihrnt. So wür't schafft, inne Höhlen an'n Hindukusch Gotteskrieger mit Drohnen ümtauleggen, dei dörch Knopdruck von Rammstein ut stüert würn.

Fernlenkung von dei bewaffneten Drohnen. Bild wikimedia commons

Un nu läs ik wat von Drohnen, dei so as einst Kamikaze-Fleigers un Einmann-Torpedos erfunnen würn, hüt in't Schwatte Meer vonne Ukrain gägen dei russ'schen Marineschäpen åhn dodesmaudige Soldaten insett't warden. Un dörch den plietschen Ringtuuschinfall warden dei NATO-Staaten nu all dei arwten Ostblockwaffen as Hülp för dei Ukrain in'n Kampf gägen den russ'schen Imperialismus los. Dei niege Produkschon löppt: Raketenwerfer un Panzerhaubitzen, Hyperschallraketen, Drohnen un "Cyberwaffen"... Afrüsten is 'n Droomwurt worn.

Un so höllt 'n taun einen truuch tau Amerika as dat Pierd vör'n NATO-Karrn un schnackt taun annern von'n Rüsttungssolidarität ünner dei NATO-Europäer un stellt in Utsicht, wenn dat denn so kåmen süll, dat dat kein Mihrwiertstüer up Rüstungsgäuder gäben süll. Un dor fråch ik mi, wat hemm' uns Poletikers ut twinnig vergäblich Johr an'n Hindukusch eentlich lihrnt? Un nu is dei Maless bäten dichter vör dei Husdör rückt. Gliek achter dei Karpaten hett man in Selenskyj den ukrain'schen Karsai funnen, dei as bester Fründ von uns liberale Demokratie Upnåhm inne EU un den nödigen NATO-Bistand finnen deit, üm dei Welt vör den russ'schen Imperialismus nå Putin sien Oort tau redden. Un Amerika is hülpriek, wenn Selenskyj up 'n digitalen Wech verkünnen deit, dat hei dei Russen noch bäder schassen künn, wenn hei noch mihr Waffen kriegen wür. Upleiwst harr hei dat sogor, wenn dei NATO mal vörsorglich poor Atomslääg op dei russ'sche Armee landen wür. Hett hei ehrgüstern seggt. Sien Spreker harr gewaltig Möhgde, den Sprook wedder "intofangen", as dei Medienwelt dat näumt.

Drohn mit Rakeet. Foto Brigadier Lance Mans/wikimedia commons

Rakete "Höllenfeuer" von ein Drohn hett dat Teel drapen.
PD-LAYOUT PS US-GOV/wikimedia commons

Dei franzöös'sche linke Sozialist un Jounalist André Damon, Spezialist för geopolitsche un ökonomische Studien, ünnersöcht dei Fründschaft twüschen Amerika un dei Ukrain, twüschen Joe Biden un Wolodymyr Selenskyj, un kümmt dorhen, dat Putin nich seihn hett un wull ok nich seihen künn, wat sik Amerika ünner Joe Biden un dei europä'schen NATO-Länner in Verbinnung mit ehrn ukrain'schen Handlanger Selenskyj utdacht hemm', üm Russland as Grotmacht lütt tau måken. Damon weit tau berichten, dat Amerika inne Ukrain dei Finger in't Späl hett un dat dei ukrainsche Verteidigungsminister Oleksij Resnikow sien Land as 'n "Testgelände" för US-Rüstungsünnernähmen ansüht, dat pangschonierte US-Offiziere dei ukrain'schen Kriegsaktivitäten gägen Russland stüern un all von ganz bläudige Schlachten schnacken. Resnikow sall würklich secht hemm': "Wi låden dei Waffenfabrikanten in, hier niege Produkte tau testen." So nähmen Selenskyj un dei amerikan'schen Achtermänner ok in Kop, dat up beid Sieden Minschenläben tau beklågen sünd, un sei verlangen nå ümmer mihr Waffen, an dei sik dei amerikan'sche Rüstungsindustrie dumm un dœmlich verdeint un dei dei NATO-Partner in Europa gliekfalls mit 'n gauden Gewinn noch uprüsten deit. Dei Biden-Administration bestimmt, woans un wurväl junge Ukrainers mit 'n Waff inne Hand in'n Dod lopen möten. Up dei russ'sche Siet bestimmt dat natüürlich Putin.

So wiet dei Meinung von Damon. Un nich blot dat, denn Amerika hett dat ok henkrägen, dat kein Gas mihr dörch dei Nuurdstream-Leitungen in Düütschland ankümmt. Dei Oostsee-Pipelines kunnen dei USA ja vun Anfang an nich verknusen, un nu weit wi, woso: Sei köönt nu sülben as Gaslieferant väl Geld måken. Europa tåhlt den teihnfachen Pries in'n Vergliek tau't Gas ut Russland! Un so kümmt dat, dat nå Damon sien Ünnersäukungen ExxonMobil 'n Rekordgewinn von 17,85 Mrd. US-Dollar un Chevron 'n Rekordgewinn von 11,62 Mrd. Dollar insträken hett. — Na wenn dat kein Övergewinne sünd! Dei in dei USA natüürlich nich extra bestüert warrn.

Nich tauletzt grippt Damon 'n Satz vonne amerikan'sche Botschafterin Marie Louise Yovanovitch (Johrgang 1958) up, dei von 2016-2019 as Botschafterin in Kiew wier un all wiessecht harr, dat dei Ukrain dat "Schlachtfeld för den Wettkampf vonne Grotmächt" ward.

Düütsche Poletik hett sik up dissen Wettstriet inlåten un dei Devis "Wannel dörch Hannel" orrer "Åhn Waffen Fräden schaffen" gellt hüt nich mihr. Un dormit dat in'n Winter nich tau kolt ward, süllen dit Johr dei Festlüchten tau Wihnachten in't Schapp blieben un all Börger sik ünner'n einzigsten Wihnachtsbom in'n Urt infinnen — un wenn't denn tau kolt ward, dei Upwarmstuf in't Rathus upsäuken un dor tausåmen "White Christmas" singen.