Läsen, Schrieben, Räken...

vun Behrend Böckmann

Knapp dei Hälft vonne Viertklässler kann nich richtig schrieben un jeder föfte Schäuler ünner dei Viertklässler kann nich so läsen un 'n Text verståhn un nich so räken, as dat dat för dit Schaulöller nödig is.

Schullig sall an dissen Taustand taun einen dei Coronapandemie sien, taun annern söcht man nå anner Grünn. Un dor gifft dat väle, dei in'n Ünnerricht un bi dei Lihrers inne Schaul un ok butenhalf vonne Schaul tau säuken sünd un doch beid ineinanner griepen. So sünd wi mit uns liberale Demokratie ok inne Schaul dorhen kåmen, dat Öllern un Kinner sik för kläuker hollen as ehr Lihrers, väle in den Globen läben, dat all dat „Abi“ måken un denn 'n gaude Wittkittelarbeit finnen, dat „Inklusion“ dat Heilmiddel dortau is un jederein so lihrn sall, as em gråd so is. Un weckern nich so is, dei geiht denn dorhen, wo dat œwer väle Johren henwech kein Zensuren gifft, dei Ünnerricht mit 'n Morgenkring anfangt un Eurythmie un Kattunplünnen dat Schäulerläben utmåken.

Un denn gifft dat den Schnack, dat dat Schäulers ut „bildungsferne“ orrer „bildungsnahe“ Öllernhüs gifft, dat dei einen mit Fidel un Klimperkasten upwassen un dei annern leiwers ströpern gåhn. Ach ja, un denn sünd dor dei Migratschonskinner — un dorünner gifft dat väle, die noch nie nich 'n Schaul von binnen seihn un beläwt hemm' — un dornäben dei œwerklauken Schäulers, dei den Lihrer mit 'n Afkåten kåmen, wenn hei för 'n Arbeit nich „nauch Punkte“ gäben hett.

Möt einer gliek Kapellmeister warden, wenn hei gaut fläuten kann? Dat dat nich so sien möt, beläben wi  inne Operette „Dei Zigeunerbaron“ von'n Walzerkönig Johann Strauß (Sœhn), wenn dei rieke Kálmán Zsupán dor singt „Ja, dat Schrieben un dat Läsen is för mi nie nich wat wäsen...“ un doch so plietsch wier, dat hei mit un dörch Schwien tau wat kåmen is.

Un as ik vör Johren in Afrika läwte, künn mien Autoschruwer as Analphabet mi nich dei för uns düütsche Bürokratie nödige Räknung schrieben — un wier liekers dei beste Fachmann vör Urt. Ik sülben bün vier Johr inne Holtentüffelschaul gåhn, ein Mäten un ik wiern dei würklichen Ierstklässler, denn dei annern acht wier Siddenblieber. Un achter uns teihn Schäulers inne ierste Reich seeten dei Schäulers vonne tweite bet sœbente Klass, un dei vonne achte Klass stünnen achter anne Wand. Ik kreech as Schäuler 'n Fläut un kann hüt noch „Morgen kümmt dei Wihnachtsmann“ spälen. Ik möst „Schönschreiben“ äuwen, künn dat lütte Einmåleins ut'n Kopp, por Riemels upseggen, künn Größing ut'e Tiedung  vörläsen, Ding- un  Dauwür bögen...

Mudder säd ofteins tau mi: „Jung, wat du in'n Kopp hest, dat kann di keinein nähmen!“ Un dormit harr's Recht. Blot dat mit den Adebor hett's mi nich biböcht. Un so wier ik tau dumm, üm mittaukriegen, woans Kinner inne Welt sett't würn, obgliek wi all — Vadder un Mudder un mien Brauder un ik — dei Nacht in ein Schlåpstuf taubröcht hemm'!

Uns Kindskinner sünd dor anners. Dat Lütte Einmåleins un Riemels upseggen,   Schönschrieben äuwen un ornlich läsen kœnen is oller Schnei ut'e analoge Welt. Hüt is allens digital, uns lütten Schäulers kœnen mit dei Knöp up' Lepptopp spälen, sei weiten, dat dat in uns queere Gesellschaft nich blot Minschen mit 'n Uterus orrer Minschen mit 'n Prostata gifft, dat 'n Mudder 'n „Gebärende“ is, dat in uns feministisch Welt gennert ward un inne Schul dei Schäuler un Lihrers gliekenmaßen „Lihrende“ sünd, woans hei sik orrer sei em 'n Lümmeltüt œwer'n Œdeldödel treckt orrer woans man merken deit, dat man in'n falschen Lief sitt.

Un för allens annere weiten s', woans sei dei KI fragen moeten!

So väl soziale un mediale Kompetenzen mögen hüt ja ok nödig un wichtig sien, œwer Läsen, Schrieben un Räken sünd äbenso wichtig, üm dörch't Läben tau kåmen. Un dorbi süll man ümmer seihn, dat twors all Minschen dei glieken Rechten, œwer doch nich all den glieken Verstand hemm' un nich all gliek klauk sünd. Wo keemen wi wull hen, wenn all Perfessor warden wullen un keinein mihr 'n Bessen inne Hand nähmen will, üm den Hoff tau fägen!

Dat gifft even Såken, dei nimmt di kein KI af. Hööchstens 'n arme Migrant. Dei is villicht plietscher as du, œwer even arm.