Dei Vulkan von La Palma

vun Behrend Böckmann


As man däd't Kolosseum bugen,
dor künn man nich sien Ogen trugen,
denn düster Rok schwäwte an'n Häben,
wurmœglich harr't 'n Unglück gäben?
Un dor löppt all von Mund tau Mund
hen nå Rom dei Schreckenskund,
dat dei Vesuv as Füerbütt
gläunig Asch taun Häben schütt.

Wiethen is in't Land tau seihn,
wat bi Neapel wier gescheihn,
un man wier sik bald ok wiss,
dat nicks mihr so as vördem is,
denn Glaut un Asch, dei rünnerkeem,
nich mål up Minschen Rücksicht nähm:
Ein 25-Meter-Ascheschicht
œwer denn Urt Pompeji licht
un ok Herculaneum licht
ünner ein dick Ascheschicht —
un so hemm' in wenig Stunnen
fiefdusend Lüd den Dod dor funnen.

Söss Johr nå nägenteihnhunnert
hett dei Barch von Niegen dunnert
un Dode geef dat wedder mål,
fiefhunnert wiern't nu anne Tåhl,
un von den Barch, dat Pulverfatt,
wür sieder nu dat Füergatt:
tweihunnert Meter würn afdrågen
dörch dit schwatt-rod gräsig Dågen*.
Hüt noch kœnen Nieg'lich seih'n,
wat dunnemåls is dor gescheih'n.

La Palma as Kanarenland
is ok dörch sien Vulkaans bekannt;
hunnerttwinnig Krater tellt
'n Barchrügg up dees Inselwelt
un väl Besäuker wannern
von den einen tau den annern,
will'n mål kieken up den Grund,
deip nå ünnen in den Schlund —
väl is doch son'n Blick wull wiert
taun Middelpunkt von unse Ierd.
Un up eins is denn passiert,
dat up Palma wat mallürt,
dat in'n Barchrügg, noch åhn Nåmen
'n Krater is hentau nu kåmen.

Musingstill wier't föftig Johr
un ünnern Häben sünnenklor,
hett nie nich einer doran dacht,
dat Poseidon hett son'n Macht,
un mit all sien Willenskraft
dat Binnelste nå Buten schafft,
wat dei Fachmann Utbruch nennt
un von'n Vesuv her all kennt.

Sösshunnert Meter sticht nå båben
gläunig Tüch ut dissen Åben:
Mit dusend Gråd Magma upsticht,
dei weit wie dull an'n Häben lücht,
kümmt taurüch un löppt as ümmer
von den Barch as Lava rünner
un billt son'n Oort von Sirupschicht,
dei meterdick up allens licht
un sachtens so nå ünnen löppt,
bet's up kollet Wåder dröppt,
wo't zischt un dampt un schüümt un kracht,
so as Poseidon dat harr dacht —
un so deit sik nå sienen Willen
'n nieget Bimsstein-Eiland billen
von föftig Fautballfeller grot,
up dat nu spält Gevadder Dod.
Denn wo Lava leep nå ünnen,
is kein Läben mihr tau finnen,
up dusend Hektar wassen hier
Bananen nu mit eins nich mihr,
un Hüs, dei in den Wech hemm' ståhn,
sünd inne Lava ünnergåhn,
so as Pompeji hett't beläwt,
as dei Vesuv harr einstens bäwt.

Doch keinein is üm't Läben kåmen,
denn tiedig nauch wür Rietut nåhmen,
man hett dei bösen Teiken truucht
un wür up disse Oort wohrschuucht,
doch 'n Enn' is nich in Sicht.
Un ok op Java fangt dat an:
Slamm un Asch spiet dei Vulkan...

Höllt Poseidon hier Gericht
un lött up siene Oort vergåhn,
wat dörch den Urknall is't entståhn?
Hett Poseidon dat in'n Sinn
un lüert so den Endknall in?


* Dågen = Nebelschwaden, Pl. von Dåk = Nebel
5.12.2021


na baven