Nu sall 'n Kyiv schrieben?

vun Behrend Böckmann

Dei Identitäts-Irrsinn, von den hier al mål dei Räd' wier, sleit niege Wellen. Dor kåmen nu dei düütsche Botschafter un 'n Schriewerling in Kiew up den Infall, man süll doch in Taukunft Kiew so schrieben, as dat up ukrain'sch Mod is: Kyiv. Korrekt is tauminnst Selenskyj in ukrain'sche Schriefwies; spekulativ is dat, wat œwer sien Milljarden-Vermögen, sien Jachten in England orrer dei gråd köffte Goebbels-Villa an'n Bågensee in'n Nuurden von Berlin utposaunt ward. Warüm kåmen denn disse düütschen Ideologen in Kiew nich dorup, dat 'n denn ünner annern ok von Bruxelles, Praha, København, Warszawa, Roma, Bucuresti, Genève usw. schnacken orrer schriewen möt? Mal ganz stilltauswiegen dorvun, wat wi uns europä'sche Mitbörgers mit uns düütsche Nåmen denn tomoden — von Niedersachsen bet Oberpfaffenhofen! Mutt jedeen dei Tungenbräkers von anner Språken wirklich plichtschülligst korrekt seggen?! Mi sülben wüür't recht sien, wenn dei Franzosen wiederhen Basse-saxe tau Niedersachsen seggen! Sünd bloots wi Düütschen so œwerkandidelt?

Dat is doch Unverstand, wat sik männig Minnerheiten in'n Ümgang mit uns Mudderspråk rutnähmen. Dor heff'k gråd läst, wat dei PETA-Aktivisten an uns Språk uttausetten hemm'. Disse Diertenfrünn hemm' ja all dei willen Dierten ut'n Zirkus verdräben, nu willen's Spräkwür "veganisieren": "ein Hühnchen rupfen" sall in "Wienbläder rullen", "zwei Fliegen mit einer Klappe schlagen" in "Arften up'e Gabel leggen" un "die Katze im Sack kaufen" in "dei vegane Calzone upschnieden" ümwannelt warden. Is dat nich sonnerbor? Wo sünd nu dei malligen Minschen, dei tau Paaschen up den Infall kåmen, dat nich dei Hås, sonnern dei Häsin dei Eier bringt orrer dat sik Bock un Zipp üm dei Eier kümmern un beid noch 'n Hülp (m/w/d) säuken?

Äh, Arften up'e Gabel leggen? Dei ganzen Schoten orrer etwa dei lütten pahlten Arften?!

Un denn kåmen noch dei feministischen Theologen in't Späl un verkloren ut dei biblisch Sicht, dat dat gor nich so klor is, dat dat blot 'n Gott-Vadder gifft, denn dat künn ja ok Gott-Mudder gäben, dei den Heiland an't Krüz leiden süht. Un äbenso hemm's Bedenken, ob dei grammatisch männlichen Engel würklich dei einzigen Engel sünd orrer ob dat villicht doch ok Engelinnen gifft.

Is dat würklich nödig, dat Minnerheiten uns düütsche Språk gägen all ehr gauden Rägeln so verrungeniern, dat 'n normaler Minsch sik scheniert, noch richtig düütsch tau schnacken? Orrer süllen wi bi Kiew, Charkow un Dnepr blieben, wenn wi vonne Ukrain schnacken?