Kuddel sien Bertha leest Avendblatt:

Nich to gloven!

Kuddel

"Dat weer en Fehler, dat Blatt wedder to bestellen!", schimp Bertha un smeet dat in de Eck. "Dor kannst ja gliek dat Flaggschipp vun Springer köpen! Nix vun seriös, jüst so buhleward as de Blöd-Zeitung!"

"Woso? Dat heff ik doch mehrstendeels för mi abbonnomiert!", antert Kuddel. "Du kickst doch blot no den Wederbericht un versökst dat Radel to lösen!"

"Du muttst nich ümmer so gemeen sien! Dat ik nix vun Politik weet, geev ik ja to. Allens annere, mal afsehn vun Sport, lees ik!"

"Nu kaam op'n Punkt! Wat stinkt di?"

"Op de erst Siet steiht an'n Rand: ‚Ex-Banker wollte Ehefrau mit Elektroschocker töten. Weiter Seite sieben. Dor schrifft se aver, dat he IT-Spezialist ist un se sik 2001 in ene Bank kennenlehrt hebben. De wullen doch blot wedder de Woot op de Inwestmanbanker anhitten, dat de sogor vör Moord nich torüchschrecken! Glöv doch nich, wenn du mi'n Hoordröger inne Baadwanne smeeten harrst, dat de schreven harrn: ‚Ex-Hafenarbeiter wollte Ehefrau mit Föhn töten'!"


En mörderische IT-Spezialist mit Waffe

"Aver de hebbt doch recht, wenn he IT-Spezialist ist. Dat is doch de Afkörten för en Investmentbanker."

"Dat ik nich lache! Dat weet ik ja sogor! Dat is en Infro-, en Informa-, na, so'n Ticker. So'n Computerminsch!"

"Segg ik doch! De informiert de Anleggers ehr Geld to'm Nütten för de Bank antoleggen."

Bertha schüddkoppt. "Du muttst ümmer recht hebben!"

Kuddel müss grienen. "Wat is denn noch to nömen?"

"Ach ja, dat harr ik bald vergeten: Dor schölen dusendst Renten falsch berekent worrn sien. Wi köönt uns Rentenbedrag doch ok nakieken laten. Villicht hebben de mi de Tiet för dat Kinnerkriegen un achterna nich richtigt anrekend. Un du hest doch na de School glieks in'n Haven anfungen. Dor möten se di doch ok ene Lehrtiet anerkennen, de hebben di doch anlehrt. — Weer doch schöön, wenn wi 'ne dicke Nabetahlen kriegen. Denn köönt wi op uns ole Daag noch 'ne Krüüzfohrt op de Queen Mary maken!"

"Ja, Bertha, dat is en gode Idee. Dat köönt wi versöken." Kuddel sweeg en Ogenblick un seggt denn nadenkern: "Intressant is dat för de veelen ‚Aufstocker'. Wenn de 'ne höger Rent kriegen kunnen, bruken de keen Toschuss vun't Sozialamt."

"Woso, dat is doch blot en Wegschuven vun een Amt to'n annern. De bekamen dadörch doch nich mehr Geld!"

"Dat is aver wat för dat Sülvstweertgeföhl, wenn du vun diene Rent leven kannst!"

"Vun miene Rent kann nüms leven, dat weest du nau, un mien Sülvstweertdingsda schast geern mal kennenlehren", see Bertha. "Un denn heff ik noch leest, dat de Bonzen, de ehr Swartgeld in'n Utland harrn, nu ut Bang för de opdeckte CD sik sülven angeven harrn. Binnen twee Jahren schölen eene Milliarde fiefhunnertdusend Euro inne Staatskass kamen sien. An Stüer! Dat is för mi sensatschoonell! Stell di mal vör, wo veel, na, ik meen, wo dick de swarte Söög sien mutt, de so veel Farken smitt!"

"För mi is dat paradox! De Koop vun de CD schall kriminell sien, un de Stüerbedreger warrt noch bewunnert, wa plietsch se sünd. Un vun de Justiz warrt dat rünnerspeelt as Kavaliersdelikt! — Wenn gahn de Lüüd op de Barrikaden?!"

"Du snackst da so lichtfarig vun", see Bertha, un mit eenmal witt üm de Nees: "Kuddel, hest du keen Bammel, dat se di as Stüerbedreger opdeckt?"

"Wat is dat denn für 'ne blööd Fraag?"

"Nadem du in Rent büst, heff ik nie nich en Stüerformular sehn! Du bringst doch nix heimlich op de Siet?"

"Wi bruken doch keene Stüer betahlen. Wi sünd ünner de Bemessungsgrenz."

"Wat, wi sünd ünner de Armootsgrenz?! Dat is ja ——. Sogoor dat Finanzamt kiekt us nich mal mit'n Moors an?!" Bertha snuuv. "De wull ik ehr Armootsgrenz wiesen! Woso hest du denn nix heimlich op de Siet bröcht, as du noch good verdeent hest?!"



na baven