 |
 Kuddel,
Schauermann ut Hamborg, mutt insehn:
Bertha is dat schietegal! 
„Nu warrt dat woll nix mit de Redden vun Grekenland“, see Kuddel. „Minister Rösler warrt Recht behollen mit de Pleite!“ „Maakt doch nix!“, antert Bertha. „Wi geneet füdderhen jeden Avend unsen Rootspoon. Un de Reis weer doch schöön! Ahn de Nootlaag weern wi mien Leevdaag nich no Lesbos kamen!“ „Ja, du hest recht! Worüm maakt wi uns Sorgen? De Politikers sünd sik sülven nich enig över den Rettungsschirm. Minister Pofalla hett to sien Kolleeg Bosbach seggt, dat he mit disse Scheiße endlich ophören schall. Vun wegen Grundgesetz un Gewetensfrieheit. Harr he man op goot Plattdüütsch "Schiet" seggt! Man nee, da mööt de Herrn Politikers ehr groffes, ruges Hoochdüütsch snacken. He gung noch wieder: ‚Ik kann diene Fresse nich mehr sehn!’ Harr he man "Snuut" seggt, weer't halv so slimm west!“ Bertha lach. „Dat segg ik na tweeunveertig Ehjohren ja nich mal to di!“ Un nu eernsthaftig: „Wat is denn överhaupt disse Rettungsschirm? Ene Oort Fallschirm?“ „Ja, dat is en gode Vergliek! Vele hebbt Bammel, dat he nich opgeiht. Denn kummt de depe Fall un de doods Opslag. Denn heet dat: Goot Nacht, Europa!“
„Aver de FDP is doch dorgegen. Worüm hebbt de bi de Afstimmen de Kanzlermehrheit kregen?“ „Üm de Macht to behalen, helpt blot de Fraktionszwang. Geweten is denn för all en Frömdwoort! Orr eenfach: Scheiße!“ „Un de nöömt sik Volksvertreder!“ Bertha weer fuchtig. „Denn möt wi in Tokunft ut Protest de Piraten-Partei wählen!“ „Weetst du denn, wat de wüllt?“ „Wenn ik ut Protest dor mien Krüüz maak, speelt dat gor keene Rull!“ „Mit anner Wöör: Di is dat schietegal?“
Bertha müss smuustern. „Ja, so kannst dat ok segen!“ „Hest du keen Geweten?!“ „Gah mi af mit düsse Scheiße!“, pareer Bertha vergnöögt. „Nu mutt ik aver protestieren!“ Kuddel keem in Brass. „Dat sünd allens junge Lüüd, de in't Internet beter Bescheed weet as in't Leven! De ene Afordnete weer vun Menen, Berlin harr blot einige Millionen Schullen. De hett noch nix vun Milliarden höört! De kannst nicht wählen!“ „Worüm nich? Junge Lüüd köönt even nich mit Geld ümgahn! Un Internet is doch nich slecht. Wi Ollen möt mit de Tiet gahn!“ „De wüllt aver afsluut Frieheit in't Nett, sünd gegen dat Copyright un wüllt allens for notting rünnerladen! De hebbt sogor protestiert, as Ministerin von der Leyen Sieden mit Kinderpornografie sparren wull!“ „Dorüm is nu de Prozess gegen de Piraten?“ „Ne, dat hest du in verkehrten Hals kregen! Dat sünd de Piraten ut Somalia, de Scheep överfallen!“ „Dat harr ik nich dacht!“ Bertha weer baff. „Denn
gifft dat in Berlin rund negen Perzent Pädophile?!“ |
