Kuddel,
Schauermann ut Hamborg, stinkt dat:
Har(t)zer Kees
De
Streik in Sindelfingen un Bremen vun de Mitarbeiders bi Daimler-Chrysler
hett jo al wat brocht: De Vörstands-Etage will sik teihn Perzent
vun ehr Inkamen aftrecken laten.
De Vörsitter, Jürgen Schrempp, warrt op teihn, all tosamen
warrt se op veertig Millionen Euro taxert. Dormit spart dat Ünnernehme n
veer Millionen in't Jahr. Aver de Mitarbeiders schölen fiefhunnert
Millionen sparen. Trotz Milliarden-Lock in'n Utland dörch Övermoot
in Needüütsch Globalisierung , hebben se noch
dree Milliarden verdent in 2003. Se hebben managt ahn Risiko. Fehler,
de se makt hebbt, weern vun de Gesellschaft versekert. Denn is dat
Anbott vun teihn Perzent keen Signal, dat is Spott! Wenn Herr Schrempp
föfftig Perzent seggt harr, harr he jümmers noch 'n Inkamen
vun fief Millionen!
Bertha intressert sik jo nich för Politik. Aver hier un dor
snappt se wat op un bringt dat dörchenanner. As ik ehr dat vertellt
heff mit 'e Streik, hett se dacht, de Oorsaak weer dat Tosamenleggen
vun Arbeitslosen- un Sozialhilfe of Januar 2005. Ik weer bannig füünsch
op Bertha. Ne! De sünd erpresst worrn! Wenn
de fiefhunnert Millionen nich spart warrt, wüllt se sössdusend
Arbeitsplätze in't Utland verlagern.
Jo, dat meen ik doch! hett Bertha antert. De Sössdusend
warrt in Düütschland arbeitslos un möten een Andrag
stellen op Hartz-veer.
Du meenst Arbeitslosengeld twee na Hartz-veer!
![Hartz 4? Heet dat: 4 Delen Harzer...?](welt_biller/hartz3.gif)
Woso
Arbeitslosengeld twee un nich veer? hett se denn fraagt. Bertha
mutt männichmal en Brett vör'n Kopp hebben! Un denn heff
ik en vun Peerd vertellt: Wenn een arbeitslos warrt, kriggt
he üm un bi een Jahr Arbeitslosenunterstützung. Achterna
een Jahr Arbeitslosengeld twee. He dörv sien Huus oder siene
Egendomwahnung beholen un ok noch'n beten Geld. Wenn he achteran Arbeitslosengeld
dree hebben will, mutt he allens verköpen un verbruken un eene
lütte Wahnung meden.
Bertha nickköppt. Jo, un wat is Hartz-veer?
Arbeitslosengeld
veer! heff ik schreet. Denn warrt in't Winterhalfjahr
in Nootünnerkamen vun de Sozialbehörde övernachtet.
In't Sommerhalfjahr möten se op'n Campingplatz in't Telt kampieren!
Bertha weer ganz witt üm de Nees worrn. Dat is nich wohr!
Doch! Dat geiht noch wieder. De Regierung is an'n Nadenken
över Arbeitslosengeld fief! Ik fraag mi blots, as Root/Gröön
de Wahlen in 2006 winnen wüllen?
Bertha
smuustert, harr wedder 'ne frische Gesichtsfarv un antert: Dat
is doch keen Problem! Se möten blots Herrn Hartz to'n Kanzlerkandidaten
maken!
Af un an is Bertha ganz plietsch.
Martin Ripp
|