Dat geiht bargdal

Nu dörv dat nich mehr wieder rünner gahn. De Europawahl hett de SPD den Rest geven!

Aver de Bundeskanzler wackelt nich, he verdeffendeert siene ‚Reformpolitik’. Is dat Moot oder hett he keene annere Wahl?

De Bifall un de Tospraak vun'n "Bundesverband der Deutschen Industrie" bedüdt al so een Dreih üm hunnertachtig Grad. De Naam ‚Genosse der Bosse’ kümmt jo nich vun alleen!

To Anfang weer de Partei bannig stolt op em, dat he, de ut "povere Verhältnisse" keem, vun de "Elite" respektert warrt. Aver nich, wenn't mit de Perzenten bargdal geiht!

He alleen hett jo keene Schuld. Wenn Politiker vun sik vertellen, hebbt se all een 20-Stünnen-Dag.

Keen Wunner, dat dat mehrste Unsinn is, wenn se den Mund opmaakt, bi veer Stünnen Slaap!

Dat de ‚Agenda 2010’ keen Wettstriet, so'ne Oort Olympiade in't Jahr 2010 is, hett jedereen an'n egen Lief — also en'n egen Geldbüdel — to weten kregen. ‚Münte’ seggt doch: „De Lüüd wüllt Reformen, we möten se bloots beter verköpen!“ Ja, wi Lüüd sünd even dösig, wi kapeert nich, wat se sik för schöne Reformen för uns utdacht hebbt!

Oskar ut'n Saarland hett sik ok wedder meldt: „Wenn man den Sozialabbau will, dann soll man das sagen und nicht in Werbebotschaften verstecken.“ — Werbebotschaften? Ik kenne bloots eene: "Geiz ist geil!"

Ik bün jo so froh, dat Bertha sik nich för Politik intressert. Avends kiekt se de Europameisterschaft un hangt an'e Lippen vun Günter Netzer. Aver gistern fraag se bilöpig: „Dor is doch opletzt disse Herr Köhler wählt worrn. Wann övernimmt he sien Amt as Kanzler?“

„Dat is de 1. Juli“, heff ik antert. „Aver de warrt doch Präsident!“

Dor seggt se doch glatt: „Al wedder 'n Präsident för de Bundesbank?“