Quadratisch, praktisch, — äh: Wolfgang Kubik, äh, Kubicki

Kubicki kann allns: Hans Damp, Schlemihl, Tüderbüdel…

Vun Jens-Peter Bey

Nee, nich schon wedder. Düsse Blau-Geelen bringt mien ganze Agenda dörcheenanner. So heet op vörnehm de List, op de ik mienen Dag indeelen do. Wat hüüt op mien Agenda stünn? Eerst Rundstücken haln, Koffi drinken, dat tweete Mal Tähn bösten un mi denn Stegner vörnehmen, een vun de nervigsten Rappelsnuten in'n Landdag vun Sleswig-Holsteen. Stegner is hüüt ganz lütt mit Hoot un Fleeg. De Staatsanwalt un de Mackers ut Stegners SPD, de sik geern mal Genossen nömt, hebbt em jüst op'n Kieker. Gifft veel to vertellen öber düssen Rambo-Sozi.

Wolfgang Kubigel: Ik bün al wedder dor!

Un nu dat. De anner Kieler Koddersnut Kubicki hett em op mien Agenda den Rang aflopen. Is jüst so as bi den Wettloop vun Haas un Swienegel. "Ick bün all dor", seggt Kubicki, wenn't um de schönsten Swienegeleen geiht. Düttmal siedenlang in't Wuchenblatt. So veel Tied mutt sien.

Du kennst Kubicki nich? Dor mutt ik een lütt beten uthalen. Ik weet, dat Bild is scheef: Kubicki is en bunten Vagel un hett liekers alltied en witte West as Affkaat, Affordneter, Affallexperte. Aff vun Hoff lopen is he 1993 as Vörsitter vun de Sleswig-Holsteen-FDP un eere Landdagsfraktschon. Worüm? He harr vör Gericht to veel Arger mit uns Navers in MeckPomm. De Mekelnborgers wulln de Schönbarger Schietkuhl verköpen. Se weern in'n Kapitalismus ankamen un harrn mit Kubickis Hölp so'n lüttje Lehrstünn in Eegennutz und Gemeensinn kregen. Alleen dat is schon 'n Barg Geld wert, dach sik Kubicki un hett de Hand opholn. He weer sik nich to schaad, inne Schiet to kleien un dorbi en poor Groschen to verdeenen. En poor Groschen to veel, dachen de Meckelnborgers un weern bannig vergrellt. Vör Gericht weer nix unrechts to bewiesen. Un Kubicki keem as Phönix ut den Schönbarg-Schiet rut. Nu dreiht he wedder dat grote Rad in Politik un Weertschop. Aff un an as Immobilien-Aal . För'n Hai reckt dat noch nich. Kubicki is mit en "Waterkant"-GmbH an de Hörn-Bustell in Kiel togang. Nu denk man nich glieks an Waterkant-Gate, dat is en anner Geschicht ut den sleswig-holsteenschen Swienstall. Aber en lütt beten slechte Luft vun Pleiten, Pech un Pannen stiggt di liekers in de Näs.

Politik Kubik: Hans Damp x Tüderbüdel x Schlemihl = dösig³!

Wolfgang Kanicki, äh, Kubase: Is nich al dor, avers kümmt unweigerlich to Oostern! Wohrschuug!

Is to bewunnern, wat Kubicki sik all utdenkt, üm siene Frünn in Partei un Koalitschon to beglücken. Aschermittwoch in Passau is lang vörbi. Liekers lött he de Muskeln un dat Muulwark speelen: De Kanzlersch schall sik warm antrecken, na de Wahlen in NRW brukt se en Winterjack. De Drievjagd is oplaten un de CSU in't Visier. Generalsekretär Dobrindt schall afschoten warrn: "Füer frie!" Mit veel Inföhlungsvermögen meent Kubicki, dat in Seehofers Familienplanung wat scheef lopen is un he nix mit de "Kopp-Pauschale" antofangen weet. Heel froh is Kubicki, dat he sülm nich de ganze Tied in Berlin togang sien mutt. Sünst weer noch en Suupkopp oder Hurenbock ut em woorn. Ach ja, noch wat: De Kollegen in'n FDP-Vörstand hebbt keen Moors inne Büx. So richtig charmant is dat nich, wenn he ok Fru Pieper dormit meent. De Generalsekretär vun de CSU weet Bescheed: Quartalsspinner Kubicki hett Swiensgripp in'n Bregen. Anners kann man sik düssen Rundslag nich tosamenriemeln. — Wölfchen, mak halflang. Enter dien Turboschipp "Liberty", nimm di eenen groten Roden to Bost ut de Sülverbeeker an Bord, bretter an'n Landdag vörbi un stell di vör, dat de Schuum vörn Bug mal 'ne Westerwelle weer. Du bist un blivst de Grötste. Grötter noch as "Riesenstaatsmann Mümmelmann". Nu tofreeden?