"Dor moeten wi mål schön putzen!"

Œwer dei ukrain'sche Korrupschon

vun Behrend Böckmann

Dat gifft so'n komische psycholoogsche Falle: Wi Minschen denken licht, dat Opper alltied nette Minschen sien moeten, meisttau Engel, denn dei bösen Minschen sünd ja dei Täters. Licht un Schadden, Swatt un Witt, klår un eindüdig, nich?

Wat tau'n Bispill Wolodymyr Selenskyj Åbend för Åbend inne Welt utposaunt, dat måkt em taun Hilligen in't 21. Johrhunnert. Sien Land is eindüdig dat Opper von ein' Angriff. Sien besten Frünn' Joe un Olaf spendiern em ümmer wedder nich blot Bifall, sonnern ok Geld un Waffen, dormit hei as Redder vonne Frieheit un Demokratie ok dei Hilligspräkung verdeint. Un so hemm' sik dei Gottesbräuder Joe un Olaf mit'n Düwel verbünnt, üm mit sien Hülp Russland up'e Pell tau rücken un Putin dat Fell tau garwen. Un sei drömen all dorvon, 'n Aflegger von Rammstein inne Neech von Kiew as bütelsten Nato-Posten antausiedeln, un ok dorvon, woans dei Ukrain wedder upbläuhn künn, wenn's denn inne EU wier un Föddergeller ut Brüssel kreech.

Wieldat dei Frünn ok sülben nauch Schiet an'n Hacken hemm' — Olaf mit den Cum-Ex-Finanzskandal un Joe mit dei Stüerschwinnelien von sienen Sœhn Hunter —, seggen s' ok nix dortau, dat Selenskyj näben den Muskanten Elton John, Abdullah II., König von Jordanien orrer den Emir von Dubai inne Pandora-List ünner 35 Staatschefs tau finnen is, also as einer mit 'n Breifkastenfirma in'n Stüeroas', in'n Fall Selenkyj sünd dat Offshore-Konten up Zypern un Firmen up dei Brit'schen Jungferninseln. Ukrain'sche Filmemåker wull'n in'n Wienmånd (Oktober) 2021 mit den Film "Offshore 95" Licht in dit Düster bringen, doch dat wür von böbelster Stell ünnersecht. Dat Vermögen hett sik Selenskyj, so secht hei, mit sien Clownerie verdeint un nich as Präsident ünnern Någel räten.

"Dat givt ok Såken, dei wi bäter ünnern Teppich kiehren!"

Olaf un Joe kloppen Wolodymyr ok nich up dei Finger, wenn hei sik — as Juud — mit Banderisten (Anhänger von Bandera) verbünnt un den Banditen Bandera för'n Natschonalhelden utgifft, dei mit sien Lüd in Verbinnung mit Nazi-Düütschland in'n 2.Weltkrieg dorför sorcht hett, dat hunnertdusende ukrainsche Jüdinnen un Juden in't KZ transportiert un so in'n Dod schickt würn.

As Redder von uns abendlännisch Kultur schickt schickt Wolodymyr kriminelle Banden nå Russland, üm dor dei Minschen ümtauleggen, dei tau Russland hollen as Darja Dugina, dei dörtig Johr olle Dochter von den kremlfründlichen Politiker Alexander Dugin, dei 26-johrig Militär-Blogger Wladem Tatarski orrer dei russ'sche U-Boot-Kommandant Stanislaw Rschitzki, dei bi't Joggen ümlecht wür. Dei Burmeister Jewken Yunakow ut den Urt Welykyj Burlakwür as russ'scher Kollaboratör dodschåten, anner russisch schnackende Börger warden äbenso as Kollaboratöre schikaniert un malträtiert.

Immerhin deit Selenskiy un sien Regierung nu wat gägen dei Korrupschon, för dei ehr Land reinweg verropen is. Sei mœten dat, wenn sei dei Feernperspektive EU behollen willn. Dei Kampf gägen dei Korrupschon hett nu œwer ok wedder ein sünnerboren Smack: Ihor Kolomojskyj as einer vonne ganz rieken Ukrainer hett mit sien Geld utrekent den Wåhlkampf von Selenskyj finanziert un sitt nu as Dank up'e Anklåchbank wägen Bedreigerie un Geldwäsch von 5,5 Milljarden $. Œwer hei möt nich insitten, wenn hei 'n Kautschon von 12 Milljonen Euros berappen deit. Dor sik dat œwer üm Geller von Frünn hannelt, dei bi Kolomojskyj lannt sünd, möt dei einstig Fründ Wolodymyr dörchgriepen un ut em dat "Buernopfer" måken. Orr will hei hier einen lästigen Måten loswarrn, dei tau väl oewer em vertellen kunn?

"Ik poleer di mål dei Mattschiev!"

Œwer wi willn nich alltauhoop antwieveln, dat dei Kamp gägen dei Korrupschon eernst is. Mit den Korrupschoons-Vörwurf sünd ok anner afschåten worrn. As bi'n böbelsten ukrain'schen Richter 2,5 Milljonen Euros Bestäkungsgeld funnen würn, hett Selenskyj em ut't Amt schmäten. Ok sien Vize-Bürobaas Kyrylo Tymoschenko, dei einen ut't Utland för humanitäre Hülp spennten Wågen för sien Eigendom hollen hett, wür vör dei Dör sett't.

Dei Baas von't Militärrekrutierungsbüro in Odessa leistet sik mit sien Fomilie in Kriegstieden 'n Immobilienvermögen un Luxuswågen in'n Wiert von 4,5 Milljonen $ in Spanien. In anner Rekrutierungsbüros künnen sik Mannslüd von'n Wehrdienst frieköpen orrer gägen Geld tau Popieren kåmen, dei dei Utreis ut'e Ukrain mœglich måken, wenn s' 5000 bet 8000 Euros an'n Baas henblädert hemm'. Mœglich wiert ok, dat männigein von Militärdeinst frie keem un liekers "ut Fründschaft" sienen Sold kreech. Ok in't Ministerium von Kriegsminister Oleksij Resnikow keem't tau Unstimmigkeiten. Dor wür väl tau düer inköfft un dörch Verbinnungen inne Türkei Winteruniformen taun dreifachen Pries bestellt. Nu würn's all utwesselt as Kampf gägen dei Korrupschon. Resnikow sall Botschafter in Londen warden.

Mannslüd, dei kein Geld hemm', nähmen œwer dei gräune Scher nå Rumänien un Moldawien Rietut. Dortau möt 'n den Fluss Theiß dörchschwemmen — un männigein is nich an't Äuwer ankåmen. Anner hemm' versöcht, Rietut œwer dei Karpaten tau nähmen, un sünd denn den Dod dörch Küll storben. Noch anner versäuken, in Frugenskledåschen dat Land tau verlåten. So sallen sik 650.000 Mannslüd in'n Öller twüschen 16 un 64 Johr, dei dörch dei Mobilmåkungsorder dat Land nich verlåten dörpen, mit falsche Utreisepopieren orrer ok illegal afsett't hemm'. Von disse Utrieter würn gaut 20.000 affungen un tau Kanonenfauder in ein bläudig Schlacht schickt, dei bläudigste Schlacht in Europa nå Stalingrad. 500.000 Dode un Verletzte hett dat nå amerikan'sche Spekulatschonen all gäben. Wat noch kümmt, dat is nich aftauseihn!

"Dat hier is för dei ganz harten Fälle!"

För Wolodymyr Selenskiy is ok dei orthodoxe Kark nich koscher. So as dei Bolschewisten tau Tiet vonne Oktoberrevolutschon 1918 un 1937 dei Stalinisten mit dei orthodoxe Kark ümgüngen, so lecht hei sik hüt mit dei Kark an, höllt den orthodoxen Metropolit Pawel as Vörsteiher von't Kiewer Höhlenkloster (dat's Weltkulturarf) un dei dor läbenden 200 Kuttendräger un 400 Studenten för Moskauer Agenten un verlangt von all, dat Kloster furtsens tau verlåten. Sülfst dat orthodoxe Wihnachtsfest wür von'n 7. Hartung (Januar) up den 25. Julmånd (Dezember) vörverlecht. Tragisch: Mit allens Russ'sche willn dei Ukrainers nu heel un deel nix mehr tau daun hemm, liekers dei lange historische Verbinnung. Dat deit dei Krieg.

Dei rod-gräun-gäle Fortschrittskoalitschon süht den Fortschritt inne Afkiehr von 'n Frädenspolitik un dei Henwennung tau Wind- un Sünnenenergie; un uns Kanzler höllt sik för den Butt, dei den Fischer Wolodymyr ümmer niege un mihr Waffen spendiert. Dei Butt in't Märken deit dat œwer mit ümmer grimmigere Mien… In Momang beddelt dei Fischer üm Taurus-Raketen, mit wecker hei denn dei Krim taurücherobern will. Dei Butt is noch nich wedder ut dei Wellen opduukt…

Un denn läs ik so blangenbi, dat dat in Düütschland acht Lihrstäuhls för Kernenergie un 173 för Gennerforschung gifft. Dat is dei verspråken Fortschritt: Minnerheiten wiesen den Rest von Düütschland, wo't lang gåhn sall, un dor wunnert dat nich, dat blot noch 19 Purzent vonne Düütschen — äben ok 'n Minnerheit — noch Vertrugen inne Ampelregierung hemm.

"Wenn wi fein reinmåkt hemm, kåmen wi ja villicht ganz fix in dei EU!"

Un Gnåd di Gott, Olaf, wenn Trump noch eins dat Ruder inne Hänn' nähmen deit un du ümmer noch dei beste Fründ von Wolodymyr büst... Sall dei Krieg inne
Ukrain so as dei Vietnam-Kieg 20 Johr duern orrer süll man leiwers dat Lied "Where Have All the Flowers Gone" von den Amerikaner Pete Seeger (1919-2014) singen, dat 1955 rutkeem un 1962 von Marlene Dietrich (1901-1992) "Sech mi, wo dei Blaumen sünd..." up Düütsch sungen wür?

Doch wecker weit schon, dat Seeger dörch den Roman "Dei stille Don" von Nobelpriesdräger Michail Scholochow tau dit Antikriegslied keem, wo taun einen russ'sche Buersfrugens von'n Mäten singen, dei Blaumen plücken för dei, dei nich wedderkåmen sünd, un taun annern dat Kosakenlied "Kaloda Duda", dat inne russ'sch un ukrain'sche Sowjetunion sungen wür?
Dat Pentagon tellt 15.500-17.500 Dode inne Ukrain, dei Kreml schnackt von 61.000 dode Ukrainer un 6000 Russen un "Sech mi wo dei Gräwer sünd, wo sünd sei blot bläben?"