De ehrbore Koopmann

vun Heinz Tiekötter


Heurt sik dat nich wunnerbor an, wenn een Liddmoot in den Vereen vun den "Ehrboren Koopmann" is un dat steiht in sien Visitenkoort. As ik noch in'n Hoben arbeit heff, weer mien olen Boos un Seniorchef ok in den Vereen. He weer sotoseggen en "Grandsinjöör" an de Küst; een mit allerbesten Roop. Vun uns hett he bloots lütte Bedrägereen verlangt. As Tallyvörmann kunnst du di bi em 'n goden Nomen moken, wenn du jümmers 'n poor Lüüd in de Bank harrst. Dat heet, du müss mehr Lüüd bereken, as an de Luken arbeit hebbt. Düsse "imaginären" Mitarbeiters sünd "Horst Wessel-Lüüd" nöömt worrn; se sünd "im Geiste mitmarschiert". Üm dat mol to verklorn: An Luuk dree vun een Damper weern twee Gäng an'n Löschen; een an de Vörkannt un een achtern. De Tallymann an de Luuk kreeg twee Tallyslips (Löschzettel) un he müss tellen un opschrieben, wat de Gäng an Hieven löscht hebbt. Dat achterran den Reeder twee Tallylüüd — elkeen för jeden Gang — berekent worrn sünd, dat weer de Düchtigkeit vun den Tallyvörmann antoreken. Harr he düsse Fähigkeiten nich, denn weer he keen goden Vörmann un harr keen sünnerliche Tokunft. Ik geev to, ik heff to de Düchtigen geheurt un dorüm goot verdeent.

Twintig Johr loter harr ik 'n Bohnsche as Verkoopstrainer. Ik müss den Butendeenst vun een grote Verseekerung wat öber Immobiljen to'n Stüüersporn bibringen. Wenn de ehre Kunnen för so'n Anlogeobjekt begeistern kunnen, müssen de dat mit een nee Versekerung afbetolen. Dorop leep dat egentlich rut. Uns Direkter weer Liddmoot bi den Vereen vun de "Ehrborn Hamborger Koopslüüd".

Hein sien olen Wogen mookt dat nich mehr lang mit. He ruckelt, wenn Hein Gas gifft, un kümmt nich in Gang, wenn dat buten ünner null Grod is. He mutt nu weg. Wenn du siene Anzeige leest, kunnst du gläuben, dat hannelt sik üm en neen Wogen. Öber dat dorchrosten Lock an de Ünnersiet hett Hein Hansaplast kleevt un denn allens mit Farv ut de Spröhbüx lackeert. In'n Koopverdrag steiht "ohn Garantie"! Is dat nich ehrlich? Wat se em villicht ok bi den Vereen vun de "Ehrborn Kooplüüd" opnehmt?


19.1.2020


na baven