vun Behrend Böckmann

Peer Steinbrück (Johrgang 1947) wier von 2005-2009 Bundsfinanzminister un wull dornå SPD-Kanzler warden, doch CDU-Angie kreech mihr Stimmen. Doch em danken wi, dat dei all bekannte Schnack „Hätte, hätte, Fahradkette“ noch bekannter wür, denn as em Jounalisten fråchten, ob sien Wahlkampfmenätschment nich mitkrägen harr, dat 'n Leihfirma in Baden-Württembarch all lang dei Losung „Das Wir entscheidet“ verkünnen deit, dunn säd hei blot: „Hätte, hätte, Fahrradkette!“

Nu wier dat klor: wenn 'n Minsch wat nich taurüchdreihn kann orrer em dei Wünsch nich upgåhn, wenn wat passiert is, wat nich so passieren süll, wenn einer up't falsche Pierd sett't hett un dat Sinniern dorœwer keinen Sinn måkt, denn schnackt dei Hochdüütsche von „Konjunktiv-Spekulationen“, un wi Plattdüütschen seggen: „Ist't mœglich? Harr'k man.... orrer man süll, künn, mösst...“

Dei Inglänner seggen, wenn einer wat måkt hett, wat hei nich mihr taurüchnähmen kann: „shoulda, coulda, woulda — man sollte, man könnte, man müsste“ un dei Franzosen seggen kort: „devez, pouviez, auriez — man müsste, könnte, hätte“. Œwer ümmer hett disse Schnack ok dei Bedüdung, dat dei Minsch dörch Schåden klauk ward, dat dei Minsch achterher ümmer kläuker is, as hei dat vörher wier, dat 'n œwer ok nich noch grot nådenken möt, worüm dat so un so un nich anners kåmen is un doch so keem, dat dei Hund 'n Håsen krägen harr, wenn hei nich schäten harr.

In de Ukrain bläuht dei Landschap al — dei besten Ackerböden up dei Welt

Ob Peer Steibrück so ganz näbenbi af 'n Lentmånd 2015 dei „Agentur zur Modernisierung der Ukraine“ nå sien Devis „Hätte, hätte, Fahrradkette“ beråden hett, is nich nåtauwiesen. Œwer spekelieren kann man: Is't mœglich, dat hei nå't Bispill vonne Treuhand ut'e Ukrain ok 'n bläuhend Landschaft måken wull? Ut dit Grenzland lött sik väl ruthålen, taumål dei Minschen dor in't Johr blot twüschen 412 un 622 €uros un up'n Lann' in'n Schnitt bäten œwer 200 €uros verdeinen. Dat düütsche Int'ress anne Ukrain is grot, nich blot, üm wat för dei 33.000 düütschstämmigen Ukrainer tau daun, sonnern ok knapp 400 düütsche Ünnernähmen hemm' sik't innne Ukrain inricht un hålen rut, wat ruttauhålen is.

Un väle Minschen frågen sik: „Is't mœglich, dat dei Hülp achter dei Kaparten 'n annern Utgang nähmen ward as dei Hülp an'n Hindukusch?“

Un wenn denn Medien den Läser orrer Taukieker verkloren willen, wat inne Ukrain so vör sik geiht, denn sünd dat oft ok Spekulatschonen. Amerikan'sche Satelliten lichten kaputtschåten russ'sche Panzer af, dei inglische Geheimdeinst posaunt dei russ'schen Verluste ut, Präsident Selinskyj schasst korrupte Staatsdeiner un höllt Bachmut üm jeden Pries... Medien berichten: man glöwt un denkt, nimmt an un stellt sik vör, deit vermauden, kann nicks nåwiesen, spekeliert, man taxiert un wünscht, dei Chines süll sik nich inmischen un dei Ukrain künn siegen...

Un denn kümmt son'n lütter Nåsatz, denn dei Läser orrer Hürer mierstendeils nich läsen orrer hüren deit: „Unabhängig prüfen ließen sich die Angaben zunächst nicht!“ Un dat deit nicks anners bedüden, as dat all dat, wat mellt ward, nich ümmer wohr, sonnern ünner Ümstänn' mœglich is, dat „Hätte, hätte Fahradkette“ jeden tau Hülp kümmt, dei üm Uträden nich verlägen is.