Nu hemm' wi ok Klima-Ikonen

vun Behrend Böckmann


In't hellenistisch Athen harr man för 'n Bild orrer 'n bildhaft Aflichtung dat Wurt "eikón" un låters wür ut dit Wurt dat Wurt "Ikone" för Hilligenbiller von Christenminschen, besonners bi dei orthodoxen Christen in'e byzantinischen Ostkarken. Christus-, Madonnen-, Erzengel- un anner Hilligenbiller mit Hilligenschien œwern Kopp warden tau Kultbiller. Dat deit bedüden, dat dei Hilligen nich blot anne Wand hängen orrer up dei Kommod' ståhn, sonnern nå bestimmte Rägeln verihrt warden.

Würn orrer warden Polletikers up disse Oort verihrt, denn schnacken wi von "Personenkult" — üm Franco, Hitler un Mussolini, üm Stalin, Mao un Enver Hodscha, üm Castro, Kim Jong-un, Gaddafi, Amin... Un üm Minschen, dei nu nich as Polletikers kultisch verihrt warden, hett uns hütig Gedsellschaft dat Wurt "Ikone" upgräpen un sett dordörch sotauseggen all 'n Hilligenschien up, dei nich in'n christlichen Globen tau finnen is. In uns niemoodsche Tiet sünd up eins dei Ieskunstlöperinnen Sonja Henie (11912-1969) ut Norwägen un Katarina Witt (Jahrgang 1965) ut Düütschland as mihrfache Olympiawinnerinnen Sportikonen, äbenso Steffi Graf as Tennisspälerin un Michael Schumacher as Rennfohrer. Coco Chanel un elegante Frugenslüd as Marlene Dietrich, Brigitte Bardot, Sophia Loren un noch anner warden tau Modeikonen; Freddie Mercury, Peter Kraus und John Lennon tau Rockikonen. Pippi Langstrumpf ward äbenso as Ikone hannelt as dei Marx-Nischel in Chemnitz. Un ganz nie gifft dat nu all dei Klima- un Weltredder-Ikonen Greta Thunberg (Jahrgang 2003) un Luisa Niebuer (Jahrgang 1996).

So as dunntomal Jean-Jaques Rousseau 'n Pries för sienen "Discours sur l'inégalité" kreech, so winnt Greta Thunbarg 2018 'n Schriefwettbewarf tau dei Ümweltpolletik. Dormit füng dei Klimarummel an einen Friedach in'n Austmånd 2018 mit 'n "Skolstrejk för Klimatet" in Stockholm an un wier dei Anfang vonne weltwiede "Fridays for Future"-Bewägung. Is Greta nu dat Wunnerkind för't Klima, as Mozart dat för dei Musik wier, wenn sei dei Mächtigen vörhöllt, dat s' blot œwer Geld un Wassdaum schnacken, œwer nich œwer dat, wo un woans Minschen starben un Ökosysteme tausåmenbräken? Wenn s' dei öllere Generatschon, dei ehr ierst dat komodig Läben mœglich måkt hett, mit eins vörhöllt "Du sechst, dat du dien Kinner leiw hest, un liekers måkst du ehr Taukunft vör ehr Ogen kaputt!"? Orrer wenn s' dei Mächtigen tauröppt "Wat föllt Sei in?" un so von't Ledder treckt as Reformator Luther dat mit den Seelenköper Johann Tetzel däd. Donald Trump finnt för disse Räd von Greta vör'n UN-Klimagipfel 2019 blot dei venienschen Wür' "Ik holl's för 'n glücklich junget Mäten, dat sik up 'n wunnerbore Taukunft freuden deit." Ståhn ehr Öllern un anner Minschen in düstern Achtergrund, dei nu disse Bewägung stüern un dorför sorgen, dat mit Greta ornlich Wind üm't Klima un dei Klimakris' ok düchtig Geld måkt ward? Woans künn wull süss 'n Mäten von 15 Johr in'n September 2019 inne Sägelyacht "Malizia II" œwer'n groten Diek taun UN-Klimagipfel in New York schäpern un up'n Katamaran taurüch kåmen?

Un dor kümmt doch dei Fråch up, wecker dat nödige Geld berappen deit, wenn Greta as Klimaikone up Reisen geiht. Twors hett ehr Mudder all versöcht, för Schweden taun ESC in Moskau tau singen, un dei Vadder hett as Künstler äbenso gaut verdeint un harr mit Bäuker œwer sien twei Döchter mit dat Asberger-Syndrom gaude Innåhmen; liekers kosten dei Reisen nå Katowice, Davos, New York un Brüssel, nå London, Rom un Montréal... doch bäten Geld. Hemm' dei Öllern würklich so väl up'e hoge Kant orrer sünd anner spendabel — as dei schwed'sche PR-Berader Ingmar Rentzhoff von't Nettwark "We don't have time", dei Rothschilds, dei Fürst von Monaco...? Vadder Thunberg kann von sik seggen, dat hei allens richtig måkt hett, denn Dochter Greta kreech 2020 denn "Alternativen Nobelpries" un künn up eine Milljon schwed'sche Kronen stolt sien. Greta leet all dörchblicken, dat disse Pries ok all dei Kinner gellt, dei ehr Bewägung "Fridays for Future" ünnerstütt't hemm'. Wat dei Kinner von't Priesgeld würklich afkriegen, dat wür noch nich bekannt gäben.

Dörchsickert is œwer, dat Greta mit ehr 18 Johr nu 'n Vermögen von gaut twei Milljonen Euros besidden deit. Un nu is Greta ok noch 'n Modeikone, denn sei leet sik as "Topmodel" in "Second Hand"-Kledåschen mit Pierd för dei ierste schwed'sche Utgåf up den "Vogue Cover" aflichten. Nu möt 'n seggen, dat dat ok Woren ut tweite Hand gifft, dei nich ut'e Kleidersammlung von't Rode Krüz stammen, sonnern villicht einmål för'n roden Peddich köfft un so as Einmål-Gummihandschen blot einmål antreckt un denn in'n Tweite-Hand-Laden orrer Onleihnhannel wedder verhökert würn. So kann 'n denn bäten billiger tau Kledåschen von Cloé, Boss, Armani un Adidas, Kaschmirsåken von Alanui, Ledderworen von Chanel un Vuitton orrer sülfst taun Rolexklock kåmen un up sien eigen Oort dormit grotdaun. Dor helpt dat ok nich, den gräunen Knoop as "Greenwashing" vonne Modeindustrie hentaustell'n. Dei Deern verklort die Welt un sülben all drei Johr hendörch nicks Nieget, sonnern blot dat sei borchte Kledåschen orrer weck ut tweite Hand an'n Lief hett.

Luisa Niebuer is dei Dochter von Frauke Niebuer, dei ein Dochter von Dagmar Reemtsma is. Un Cousine Carla Reemtsma is dei Dochter von Frauke Niebuer ehrn Brauder Reemt Reemtsma. Sei beid sünd Kinner von Feiko Reemtsma (1926-1999) un Fru Dagmar (Johrgang 1933). Dörch Tschernobyl keem Oma Dagmar tau dei Insicht, dat 'n wat för dei Ümwelt daun möt, un füng an sik intaubringen. So hemm' sik dei Cousinen wull 'n Ogenspeigel an ehr Größing nåhmen un hemm' sik uk giern bi Größing Dagmar in ehr twei Villen in Hamborg-Altona uphollen. Luisa ehr Öllern, ehr Vadder is all dod, hemm' in Hamborg 'n Ollenheim vörståhn, un Carlas Vadder is Afkåt in Berlin. Wieldat disse beiden düütschen Klimaaktivistinnen un Klimaikonen sotauseggen Afkömmlinge von dat Zigarettenünnernähmen Reemtsma sünd, ok wenn dat up den iersten Blick nich so utsüht, kann 'n ok åhnen, woher dat nödige Geld kümmt. Dat Vermögen von dei drei Familienzweige wür 2017 up tausåmen 1,45 Milljarden Euros taxiert un 'n Deil dorvon steiht ok Mudder Frauke tau. So is nich blot Oma Dagmar noch Deilhebbersche von Immobilien- un Grundstücksverwaltungs- Gesellschaften un kümmt up disse Oort tau Vermögen, sonnern Mudder Frauke is ok Gesellschafterin vonne Reemtsma Grundbesitz GmbH, Gesellschafterin vonne Reemtsma KG un von Schifffohrtsgesellschaften. Wennihr man so tau Kapital kümmt un nich in'n Sozialwåhnung mit Harz IV utkåmen möt, denn is dat för Dochter Luisa as düütsche Greta ok licht wädern för 'n annern Klima- un 'n anner Ümweltpolletik.

Wenn sik beid ok nich ümmer ganz einig sünd, woans dei Klimakris' bitaukåmen is, so sünd sei sik einig, wenn't gägen dei Ollen geiht. So as Greta keem ok Luisa 2020 taun Weltwirtschaftsgipfel nå Davos. Dor wull's nu all wies måken, dat 2020 dat letzt Johr is, dei Ierderwarmung uptauhollen un gägen dei Klimakris vörtaugåhn. Doch Greta föll ehr damit in't Wurt, dat dat nich dat letzt Johr is, denn Klimaschutz süll ümmer wichtig sien. Bäten respektlos schmieten's dei öllere Generatschon vör, dat 's as "olle witte Männer" dörch ehr Daun uns Ierd gnådenlos inne Klimakris störten. Un man geef Kanzlersch Merkel tau verståhn, dat 'n up "klore un maudig Wür för nödige Dåten" von ehr luern däd. Sei süll as Physikerin iernsthaftig all verkloren, dat sei verståhn hett, wie iernst dei klimapolitisch un dormit ok dei wirtschaftlich Låch is. Ok tau dei Bundsdachswåhlen 2021 måkt dei FFF-Klimabewägung Stimmung un Greta as dei fieert Gast näumt vör't Kanzleramt Düütschland einen Schurk un höllt so nicks von Merkel ehr drei Wür "Wi schaffen dat".

Wurväl Mitlöper un Krawallmåker dorünner sünd, dat lött sik nich faststellen. Wiss is œwer, dat 'n Bewägung nich mihr tau hollen is, wenn Mitlöper von Bewägungen dat Stüer an sik rieten. Frågen möt 'n sik ok, ob denn Greta un dei düütschen Reemtsma-Enkeldöchter würkliche Ikonen sünd, wenn's ünner Polizeischutz gägen dei Klimapolletik vonne Kanzlerkannedaten Scholz un Laschet wädern.



25.9.2021


na baven