Ward bannig Tiet ...

vun Friedrich Ehlbeck

Ward bannig Tiet, bald uptowaken:
Wi mööt wat för dat Klima maken.
Dat gifft al lang so'n groten Plan;
man hett uck praktisch al wat daan.
Dat hett veel Resultaten geben,
de ward sogor an Heben schräben,
krüüz un quer in lange Striepen.
So is dat beter to begriepen.
Jümmer woller gau un frisch —
un uck woller gau verwischt.

Jümmer woller is Alarm,
de Welt ward eenfach veel to warm,
wiel doch al de Nordpol schmüllt
un so de Nordsee öberfüllt.
Altohoop, de Kerls un Froon
mööt all wat för dat Klima doon.
De Politik will dor för streben,
jedereen schall dorna leben.
To Wiehnachtstied dor mol an denken,
warm Tüch to köpen un to schenken
un mit Licht un Heizung sporn.
Dat helpt dat Klima mit de Johrn.
Dat Osterfüer makt so ganz krank.
De Fienstoffnerven liggt al blank.
De Fienstoff, wat man weten mutt,
makt up de Welt so veel kaputt,
wat mit keen Pilotenstreik
wedder uttoglieken geiht.
Männich Minschen seggt jo stuur,
de Klimmawannel is Natur!!!?
Fudder ward normal doch kaut,
dordörch ward dat goot verdaut,
aber ward dat tweemol kaut,
denn ward dat Klima so versaut.

Liesen puupt de Koh in't Gahn,
un achterut, dor kümmt Methan!

Dat markt man richtig bös
ganz düütlich inne Näs.
Wedderkauers fräät veel Gras
un dorvun makt se Drievhuusgas.
Dat is wat nich in't Klima passt.
Dat is ganz gefährlich stark
in den Serengeti-Park.

In'n Serengeti graast dat Gnu.
Dat Deert brukt nümsnich — etwa du?

Dor sünd veel Massenwedderkauers binnen,
de mööt möglichst bald verswinnen.
Sünd goot in Kiekschapp antosehn,
aber bruken deit man keen.
Bi Rind un Schaap kann man verlangen,
dat Drievhuusgas doch intofangen.
Dat Wedderkauerrülpsproblem
is de Natur nich angenehm.
Deswegen is nu uck al lang
de Wetenschaff dormit togang.
Keen Fleesch, blot's noch vegetorisch leben,
dat hett' in Krieg so faken geben.
Dat is, as Politik dat seggt,
för prima Klima gor nich slecht.
Wat Politik seggt, ward woll stimmen,
den Klimakrieg ward se woll winnen,
kann glieks in Ökoheben flegen.
De Natur hett nix dorgegen.

Politik kummt sachs mit selten Fimmel
glattweg in söövten Ökohimmel.
Laat us man up'n Teppich blieben,
uck mit Natur nix öberdrieben.