Dei Lopbüx ihren
— taun Joggingbüxendach an'n 21. Januar —

vun Behrend Böckmann


Uns Vöröllern hemm' all so orrer so dorvon sungen, dat Marie, wenn's nich danzen kann, 'n langen Kleedrock, 'n Schleppkleed orrer 'n Pumpbüx ankricht. Doch hüt is dat wull anners, denn Korl Lagerfeld sall mal vör korten secht hemm': "Wecker 'n Joggingbüx antreckt, dei hett dei Kontrull oewer sien Läben verlurn." För em is disse komodig Büx för't Sofa un'n Goorn, för Sport un Späl nix, ok wenn man licht rin- un rutwutschen kann un man sei af un an blot mal waschen möt.

Ja, wat dei spanschen Pumphosen in't 17. Johrhunndert wiern, sünd hüt dei Jogging- orrer Jerseybüxen, ok wenn man nich in'n Lopbüx oewer Hinnelsten inne Oper gahn orrer ünner 'n Dannenbom sitten süll. Nix is kommodiger as 'n Joggingbüx, sei treckt sik na'n Lief, man moet's nie nich pletten, sei lött dei Luft dörch un hett wull noch anner Vördeil in'n Vergliek mit dei gaude olle Antochbüx.

Dat disse Büx so beleiwt is, licht ok an den Stoff. Dei ward nich wäwt, sonnern up'n Knüttmaschin' makt. Un dat wier wull tauierst up'e Kanalinsel Jersey un so is disse Stoff tau sienen Namen "Jersey" kamen. In't Franzöö'sche heit disse Stoff Tricot, wat von tricoler (= stricken) kümmt, un dorut wür denn in Düütschland dat Trikot för 'n Sporthemd ut dei Stoff för dei Jerseyünnerwäsch. Denn würn ut disse Oort Stoff dei Trainings- orrer Sportantöch un denn ok dei Jogging- orrer Lopbüxen un mit dei Hiphopkultur inne 70er Johren würn ut dei Joggingbüxen dei "Baggy Pants", so ganz wiede Büxen, dei as Kleedung förn Breekdanz (Breakdance) un den Spräkgesang (Rap) as utbuult Säck up'e Hüften seeten un dei Schritt bet inne Kneikählen rünnerhüng. Dat keem nich ümmer gaut an. Dei Joggingbüx wür inne Eck stellt un ehr 'n Stempel "schlapprig, schluderig un ordinär" updrückt.

Doch dat süll nich so blieben, un so keemen Gymnasiasten an'n 21. Januar 2009 in Österriek up den Infall, in Joggingbüxen inne Schaul tau gåhn. Dat wier dei Anfang von'n Internatschonalen Joggingbüxendach. In'n Momang sallen all in föftig Länner an dissen Dach väle Minschen in Joggingbüxen inne Schaul, in't Kontur un in'n Hörsaal sitten. Un so is dei Joggingbüx dorbi, för den Hinnelsten dat tau warden, wat dei Schauh all lang för dei Fäut sünd. Puma, FILA, Lacoste, Reebok, Adidas... — sei all hemm' Lopbüxen in't Programm, ünner hunnerte von Modellen kann man in'n Onleihnhannel utwählen un hier un dor gifft dat an'n 21. Januar as Besonnerheit sogor 'n Joggingbüxen-Party.

Ja, in de Dinger kannst meddewiel allens maken. Man bloots een Saak gifft dat, de wi tomeist nich maakt, wenn wi in düsse komodigen Büxen steken:

Joggen.


21.1.2022


na baven