vun Silke Frakstein Ik mag geern Lüüd bekieken. Ne, nich de an de Elv, de dor langstolzeert as de Hohn op'n Messhupen. Ik sett mi hier in Neendörp in dat Gehege. Fein kommodig in de Sünn.
Duert nich lang, denn trippelt de nächste üm de Eck. Ik glööv, de weer mol bi't Ballett. Huch, huch, huch un hoch den Foot. Ober em geiht dat goot dorbi, he lacht mi to.
Egentlich ward dat Tiet för... jawoll dor kümmt se: Speedy Gonzales. De löppt jeden Dag. Egol, wo ik grood bün, Speedy kümmt üm de Eck. De is sowat von spiddelig, dor heuer ik dat Klappern von de Knoken al von wieden. Villicht schall se den lütten Dicken wat afgeven, de dor nu anjachelt kümmt. Mien Handy heff ik praat för den Dokter. Ober nee, noch höllt he sik op de Been un plumpst üm de Eck. Eins zwei, eins zwei: "Habe ich dir schon von dem neuen Jogakurs
erzählt?"
Schiet ok, nu ward dat luut, twölf Wuffis seggt sik "Goden Dag". Ik segg Adschüs un goh nu Middageeten. Gänsekeule in Sauer
mit Bratkartoffeln. Na Silke Fraksteins Homepage |