Halloweenengel

vun Meike Balzer-Fraun

Is ja nu al wedder Wiehnachtstied, un mal nix nich oppen Zeddel.

Dorüm hefft wi güstern Middag so'n richtig kommodigen Spazeergang över'n Wiehnachtsmarkt maakt.
Dree-Gäng-Menü: Bratwust, Kantüffelpuffers mit Appelmoos, Leevkoken un hitten witten Ratskellerwien.

Kitsch un Grusel för 9,50 €

All dat Dekoratschoonsgedööns intresseert mi nich mehr. Heff ik noog vun. Man dörch'n Tofall kreeg ik düssen Halloweenengel to sehn, jüst as bi't Kinnerkarussel "Bald nun ist Weihnachtszeit…" speelt worr.
"Mit Apfel, Nuss und Mandelkern kannst heute auch keinem Kind mehr kommen", see mien Mann, un glieks fung dat in mien Kopp an to rötern:

"Un nu fiert en Engel al Halloween! Un wat hett sik bilütten nich noch allens ännert, un wo löppt dat op to?"

Bald nu is Wiehnachtstied, …

Jüst noch weer Halloween, gruliche Tiet.
Nu is dat Wiehnachtsfest gor nich mehr wiet.

Luuster na buten, dor steiht en vör Döör.
Is dat nich Amazon, gifft't en Malöör.

Nix warrt torüch schickt, dat Speeltüüch is goot.
Gau warrt dat fein inpackt, is allens in't Loot.

Appeln, Nööt, Mannelkarns, Fiegen un Krinth',
Um düssen Söötkraam scheert hüüt sik keen Kind.

De "Halloweenengel" is dat nie'e Modell 2024.
Mit em kannst tweemal dekoreren.
Kannst em ok glieks stahn laten.

Wokeen scheert sik dorüm?

Morgen is Nikolaus. De Sack för uns Kinner un Enkel is packt. Schokolaad un Gummibärchen för de Nikolauskinner ut uns Dörp liggt praat. (De Nööt un Fiegen eet wi al lang sülvst.)

Wat denn woll noch Kinner kaamt, ehr Riemels optoseggen?