Guernica, Lidice, Oradour, Gaza

vun Behrend Böckmann

Wecker harr denn wüsst, wat in Sodom un Gomorrha passiert is, wenn nich in't Olle Testament nåtauläsen wier, dat Gott dei Sodomiter inne Urten Sodom un Gomorrha an't Äuwer von't Dode Meer stråfen wull wägen ehr sünnig Läben? Denn sei kröpen blot ut puret Vergnäugen lustvull un jökig inne Puuch un harrn nie nich dei Afsicht, Kinner inne Welt tau setten. (Hüt hett "Sodomie" dei Bedüdung von "Sex mit Dierten"). Wier dörch den Sünnenfall för Adam un Eva dat paradiesisch Läben tau Enn', so hett Gottvadder dei sünnigen Sodomiter dormit stråft, dat hei Sodom un Gomorrha den Ierdboden gliek måkt hett. Dat burrt mi ümmer dörch 'n Kopp, wenn ik an Guernica, Lidice, Oradour un Gaza denken möt.

Un denn kümmt mi Guernica in'n Sinn, un twors nich blot dat Bild von Pablo Picasso, dat den Krieg anklåcht, sonnern dei span'sche Börgerkrieg von 1936 bet 1939, in den dei Faschist Franco gägen dei wählte Regierung vörgeiht, dei düütsche Legion Condor un italjen'sche Fleiger tau Hülp hålt, un an'n 26. Prilmånd 1937 œwer dei Lüttstadt Guernica inne Neech von Bilbao in't Baskenland mit 'n militärisch Operatschon dat Bombenschmieten äuwt un schätzungswies 'n Drüddel von 6000 Inwåhners dat nich œwerläwt. Doch ierst 1997 keem Bundspräsident Roman Herzog up den Infall, Spanien offiziell in Nåmen von Düütschland um Vergäbung tau bidden.

Un mien Gedanken wannern nå Lidice, 'n Dörp in'n Afstand von 20 km von Prag, dat an'n 10. Rosenmånd (Juni) 1942 up Wiesung von denn düütsche SS-Reichsprotektor Karl Frank in Prag in Schutt un Asche lecht wür, dei 173 Mannslüd ut't Dörp up'e Stell dodschåten un dei Frugens un Kinner in KZ schickt würn. Dat süll as Rache för den Anschlåch up Reinhard Heidrich, den Schlächter von Prag gellen, dei as SS-Mann "stellvertretender Reichsprotektor in Böhmen und Mähren" wier un up den dei tschechoslowakisch Afwehr dat afseihn harr un em ümleggen wull. An'n 27. Maimånd 1942 wür Heidrich upluert, angräpen un so blessiert, dat hei an'n 4. Rosenmånd den Kuckucksraup nich mihr hüren künn.

Un von Lidice wannern dei Gedanken nå Oradour, 'n lüttet Dörp inne Midd von Frankriek. Inwåhners un Frömde in 'n Urt glöwten dor säker tau läben, taumål an'n 6. Rosenmånd dei Amerikaner un mit sei Verbünnte inne Normandie an Land güngen un dörch dei tweite Front dei Krieg ennen süll. Dei franzöös'sche "Resistance" is sik mit dei Soldaten ut Œwersee œwerein un dei von'n Osten nå Frankiek verlechte 2. SS-Panzer-Division "Das Reich" ward nu dei Franzosen dorför stråfen. So föllt disse Einheit vonne Waffen-SS an'n 10. Rosenmånd œwer denn Urt her, lecht in körtest Tiet 643 Börger üm, marodiert as wild in Urt, lecht Füer an 328 Hüs un up 15 ha Land blifft wieder nix as Schutt un Asch taurüch.

Un denn schäper ik œwer't Middelmeer un lann an't Äuwer von'n Gazastriepen, wo 2,3 Milljonen Minschen up 365 km² läben (in'n Vergliek: München hett 'n Grött von 310 km² mit 1,6 Milljonen Inwåhners), dei af 1987 von vernarrte Muslimsbräuder, dei sik gägen Israel upböhmen un sik vonne weltlich instellte palästinensisch Fatah-Regierung mit Sitz in Ramallah in't Westjordanland afwennen. Dei Hamas-Adepten sünd all Middel Recht, üm Israel tau vernichten un mit Hülp von spendable arab'sche Frünn, dei ok nich gaut up Israel tau spräken sünd, bugen 's den Mullwörm gliek 'n militärisch Tunnelsystem ünner dei Gaza-Ierd.

Un denn kümmt dei 7. Saatmånd (Oktober) 2023. Wat för 'n Nacht. Dei Hamas schicken twüschen 2500 un 3000 Raketen nå Israel rœwer, rieten mit Bulldozer grote Löcker in den Grenztun — un an'n Morgen gägen Klock söss knaddern twüschen twei- un dreidusend Hamas-Kämper up Motorrö' in'n Kibbuz Beeri, anner Kibbuzim un Siedlungen, schmieten Handgranaten inne Hüs un Schutzrüm, scheiten wild üm sik un binnen Korten finnen knapp 1300 friedlich Börger den Dod. Allein 360 Besäuker von't Universo-Paralello-Festival inne Neech von'n südisrael'schen Kibbuz Re'im œwerläben dissen Dach nich. Un dat gifft nich blot Murd un Dodschlach, ne, so an 200 Minschen von 'n Baby bet taun Greis warden as Geiseln in't Hamas-Tunnelsystem von Gaza verschleppt, un wecker sitten dor bet hüt noch fast.

Dat lött sik Israel nich gefallen un schlöcht taurüch un will dei Hamas vernichten un bi dei Jacht up dei Hamas mit allens, wat dei israelisch Armee vörhollen kann, blifft kein Stein up 'n annern un in 'n Wüst von Schutt un Asch versäuken von Hunger plåchte Minschen tau œwerläben. Rund 55.000 unschullig Minschen hemm' bet hüt dei israelisch Jacht up dei Hamasbräuder mit 'n Dod betåhlt, hentau kåmen 125.000 Blessierte. Un 'n Enn' is nich aftauseihn...

'n lütt Diern hett Burtsdag — in Gaza