Arbeit? Nee danke!

vun Behrend Böckmann

Koalitschon un Oppositschon von links un rechts hemm' sik mål wedder dull inne Plünnen, denn dei Koalitschon will dat Börgergeld gägen 'n Grundsäkerung utschuddern, dei linke Oppositschon höllt dat för'n Verbräken un dei rechte Oppositschon geiht dat nich wiet nauch. Dei Linken meenen, wenn nu männig Minschen dei Grundsäkerung kriegen sallen, dat dat so is, as wenn Kanzler Merz von sien'n Privatfleiger up't Tweirad ümstiegen süll. Un dei vonne rechte Kant geiht dat nich wiet nauch, denn sei meenen, dat jeder, dei arbeiten kann, sik dörch eigen Arbeit den Läbensünnerhalt säkern süll.

Nå dei amtlich Statistik krägen 2025 rund 5,5 Milljonen Minschen Börgergeld, dorünner 3,95 Milljonen, dei 'n Arbeit någåhn künnen; 1,45 Milljonen sünd Upstocker, krank, hemm' lütte Kinner tau versorgen, qualifiziern sik... Dei Statistik wiest wiederhen ut, dat bummelig 2,8 Milljonen 'n düütschen Pass besidden un dei Rest noch Frömde sünd; so läben taun Bispill 'n half Milljon utwussen Ukrainer un dortau noch 200.000 Kinner un äbenso 485.000 Syrer von't Börgergeld. Ünner düsse (noch) nich inbörgerten Migranten höörn väle ok tau dei Gruppen Upstocker, krank, Kinner usw.

Nå uns Grundgesetz, Artikel 12, kann jederein 'n Arbeid någåhn kann, wenn hei denn will, œwer dat ok sien låten kann un nå dat "Recht up Fulheit" läben — ein Recht, dat Korl Marx sien Schwiegersœhn, dei Kubaner Paul Lafargue (1842-1911), in sien Schrift "Dat Recht up Fulheit" utposaunt un verkünnen däd, dat Fulheit för em dei gröttste Lust is, dat sik dei fule Arbeider mit Lust so väl as blot mœglich von den Exploatör (Ausbeuter) hålt! So sall dei Minsch läben!

Afwannelt deit dit "Recht up Fulheit" hüt bedüden, den Staat as 'n Wihnachtsgaus uttaunähmen. Un dat sall vörbi sien un all, dei nå disse Devis läben, dei süllen doch leiwers dörch eigen Arbeit so väl verdeinen, dat s' Vaddder Staat nich up'e Tasch liggen. Dat sallen dei niegen Rägeln œwer 'n Grundsäkerung bringen. Un so geiht dat wull mihr üm dei välen schwatten Schåp, dei dat Rumlungern un Fulenzen nich upgäben willen, dei leiwers inne Fautgängerstråt pråchern un ünner'n frieen Häben kampiern, as dat sei 'n Arbeit för nödig un notwennig hollen. Sei süllen leiwers up Gott sien Wurt "Du sasst mit Mäuh un Plåch dien Brot äten!" (Genesis 3:19, 2. Mose 20:9) hürn. Un wecker dat nich mit den Globen höllt, dei künn sik mit Fiete Engels (1820-1895) sien Schrift "Anteil der Arbeit an der Menschwerdung des Affen" befåten, in wecker hei dei Ideen von Charles Darwin (1809-1882) sien Evolutschonstheorie upgrippt un den Läser verklort, dat dat åhn Arbeid nie nich uns Minschen, so as wi dat hüt sünd, gäben harr.

Sünd düsse wenigen Minschen, dei sik dat in dei soschaale Hängematt inricht' hemm, wirklich so ein Problem? Wenn'n bloß dei Schmierbläder mit dei groten Baukståven lääst, denn ja. Wenn'n ok Statistiken läsen kann, weit ein, wat uns wirklich schaden deit: dei Stüerbedregers un "kreativen" Stüer"gestalters". Disse Minschen — nävenbi secht — arbeiden ok nich! För dei arbeiden annere.

Klick op tau'n Vergröttern!

Naklor bün ik füünsch up dei Hängemattenbewåhners, sei benähmen sik driest. Kann ok sien, dat den ein' oder annern ok dei Rieken up ehr Geldsäck sogor sympathisch sünd. Œwer dat is ganz gliek, up weckern ik füünsch bün un weckern ik mach — wenn'n den Staat wiederhelpen will, mutt'n dat grote Problem angahn, nich dat lütte. Nich so uns Regeern: Achter dei poor Minschen, dei Soschalgeld kassiern un nich arbeiten, sünd sei her as dei Düwel. Œwer dei groten Bedregers låten sei in Roh, sei pudern dei sogor noch den Mors! Hest du dacht, dorför brukt dat dei FDP? Dor hett'n Uul säten — dat måken s' all!

Mihr noch: Dei Poletikmåker in'n Bunds- un Landdach, dei uns düütsche Demokratie un uns Grundgesetz för't Allerbest inne Welt hollen, künnen dei Plicht tau arbeiden taun Gesetz måken, so as dat mit dei Schullenbrems orrer dat Sülfstbestimmungsgesetz måkt wür. Un ok dei Schaul künn wat dortau daun un wedder mihr Wiert up Läsen, Schrieben un Räken leggen; sei kunnen inseihn, dat nich all den glieken IQ in'n Kopp hemm', un dei jungen Minschen verkloren, dat nich blot dei Wittkittel, sonnern ok dei Blaumann 'n wunnerbore Arbeitskluft is.

DDR-Orden "Held von'e Arbeit"

Ok 'n Blick taurüch tåhlt sik ut: All, dei arbeiden künnen, mössten nå dei DDR-Verfåtung von 1968 'n Arbeit någåhn, un wenn's nich keemen, denn würn's von'n Päting afhålt. Un as dat mit dei DDR ut wier, hett dei niege Staat mit staatlich födderte ABM versöcht, dei välen Ostdüütschen, dei œwer Nacht kein Arbeit mihr harrn, dat Läben in Frieheit schmackhaft tau måken. Un so as dei §7 (1) Grunggesetz "Dat gesamte Schaulwäsen ünnerlicht dei Upsicht dörch den Staat" as Schaulplicht utlecht ward, so künn man näben dat Recht up Arbeid ok wat in'n § 12 von't GG tau dei Arbeidsplicht fasthollen.

Dei sellschåpliche Stimmung is so uphisst gägen dei Fuljacken, dat dei Politik glöövt, sei mutt in't glieke Huurn stötten, statt dei wohren Probleme antaugåhn. Dei Wahrschienlichkeit, dat sei ein Arbeitdsplicht måkt, is up jeden Fall väl höger as dei Wohrscheinlichkeit, dat dei Stüergesetten, dei dat al gifft, dörsett warrn. An dei båven Spitz von dei Pyramide warrn Rägeln afschafft, wieldess ünnen an'e Basis jümmer nie Plichten oplecht warrn. So wier dat leider alltied.

Dat gifft immer ein' Gördel tau'n Engerschnallen!