Whatever it takes orrer „Wat mutt, dat mutt!“

Dei Euroreddungsschirm reddt dei Euros!

vun Behrend Böckmann

„Whatever it takes“ (egaal wat nödig is – wat mutt dat mutt), verkünnt dei italjen'sche Poletiker un Bänker Mario Draghi (Johrgang 1947) 2012 in London, dei œwer't röm'sch Finanzministerium un dei Weltbank 2011 Präsident vonne Europäisch Zentralbank wür.  Hei süll, wull orrer mösst den Euro inne Kris‘ redden, as dei Finanzwelt dörch dei Lehman-Pleite kort vör 'n Tausåmenfall stünn un so in't Trudeln keem, dat œwerall dat Geld utgüng un dat dat blot uptauhollen wier, wenn as Reddungsschirm nieget Geld upbröcht ward. Dei EU-Staaten hemm' 800 Milljarden Euros as Reddung för dei Banken un dormit ok för dei Wirtschaft in Ümlop bröcht. So hett dei Reddung klappt, wi hemm' ümmer noch den Euro, ok wenn 'n Streuselschnick hüt bi'n Deichknäder so anne twei Euros kosten deit.

Fiete Merz brukt natüürlich ein schwatten Reddungsschirm!

Un dat gifft ümmer wedder wat tau redden. Selenskyj höllt sik för 'n Redder von uns liberale åbendlännisch Demokratie, dei Gräunen sünd dei Klimaredder un Kanzlerkannedat Fiete Merz will Europa vör Putin un Trump redden. Un Redden kost ümmer wat. Sülwst wenn dei Füerwehr 'n Katt ut'n hogen Bom redden deit, geiht dat in't Geld.

"Hett Selenskiy mi ut den gresigen Boom reddt? Denn is hei mien Held!"

Un nu, wo Trump dei Korden nie mischt, gifft dat wedder wat orrer sogor ganz väl tau redden. Nå dei Devis „Amerika tauierst!“ will hei internatschonale Organisatschonen nich mihr so spendabel ünnerstütten un wat dei NATO angeiht, blot noch för Europa inståhn, wenn dei Europäer mihr as twei Purzent von't BIP för dei Verdeffendierung utgäben. Dei USA ünner Trump sall nich mihr dei Netto-Tåhler  för dei Nato sien, so as Düütschland dei Netto-Tåler för dei EU is. Un denn schickt Trump den Duz-Brauder Wolodymyr Selenskiy as'n natten Köter nå Hus un dreiht em einen Håhn nå den annern tau. Rokrükels sünd inne Luft. Wat is, wat ward un wat ward sien, wenn hei Ramstein dicht måkt un 37.000 amerikan'sche Soldaten in Düütschland vun 78.000  in Europa nå Hus hålt, so as dat nå 1990 mit dei russ'schen Soldaten ut'e einstig DDR måkt wür? Un denn schnackt Nochkanzler Olaf von Bedachtsåmkeit un Besunnenheit un rückt nich mål drei Milljarden Euros för dei Ukrain rut, wo dei doch nu noch väl mihr Geld brukt. Dat kann nich angåhn!

Un dor Fiete Merz den Rat von'n chines'schen Europakenner un Perfesser Jiang Feng för europäisch Studien ut Shanghai up'e Säkerheitskonferenz tau München nich annimmt, dat dei Brandmuer gägen dei demokratisch wählte AfD „schwer tau verdeffendieren“ (schwer zu verteidigen) is, blifft em kein anner Wåhl as nå dei Devis „Inne Not frett dei Düwel Fleigen“ tau hanneln. Üm Düütschland vör dei Gräunen tau redden, blifft em blot noch, sik mit dei Roden tau verbünnen. Œwern 'n niege Groko sall‘t nich warden, sonnern 'n „Bündnis“, un man „sondiert“, üm denn tau koalieren.

Ünner den Reddungsschirm smusen dei Union un dei AfD...???

Wat vör dei Wåhl verspråken wür, dat gellt nå dei Wåhl nich mihr. Un bi't Sondiern kümmt man sik entgägen, einer brukt den annern, üm anne Macht tau blieben, un måkt tauallerierst 'n Finanzplan: 500 Milljarden Sonnervermögen för Brüggen, Stråten, Schaulen usw.  un dei Verännerungen vonne Schullenbrems in 't Grundgesetz, üm mihr Geld för die Bundswehr locker tau måken. Un denn ward all an'n „Union vonne willigen Europäer“ schmäd't. Von der Leyen stellt 800 Milljarden för dei europäisch Armee in Utsicht. „Wat mutt dat mutt“ orrer „Whatever it takes“.

Dei Ukrain kricht wat af von den Geldsegen — wenn dat nich al tau låt is

Ein anner Redensaart heit ja bekanntlich „In Gefohr un hööchste Noot bringt dei Middelwech den Dood“. Väle hemm secht, dat Düütschland bethertau bloß den Middelwech gahn is — Jein secht hett — Jein tau Digitaliseern, tau Europa, tau Taukunftsprojekte, Jein ok tau de Ukraine — ünnerstütten, oewer nich mit Taurus un anner Waffen, dei wirklich wat bringen... Villicht is dat ja ok bloß dei beropen "düütsche Konsensgesellschap". Klingt nostalgisch, is Vergangenheit. Wat schön wier doch dei Konsensgesellschap! Nee, Polariseern un Spalten is opstunns ansecht, un dei neien Slagwüür sünd „Totålverweigern“ orrer „All-in gahn“. In Såken Schullen gahn wi nu förwiss „All in“, dei Ukrain kricht nu amenn doch noch Taurus-Raketen, denn gahn wi dor ok „All in“. Un „Wat mutt dat mutt“ orrer „Whatever it takes“ kann sik noch rutstelln as „Mit Anloop in dei Katastroph“.

Okay, Schirm tauklappen!