vun Behrend Böckmann

Dei Samen un Lappen as dei Urinwåhners in'n Nuurden von Europa un dei Inuits as dei Urinwåhners in'n Nuurden von'n amerikan'schen Kontinent würn in Düütschland un wull ok in anner Länner "Eskimos" näumt. Un dat Wurt Eskimo sall ut'e Språk von den Algonkins-Urinwåhnerstamm kåmen un soväl as "Fleischfräter" orrer "Schneischauhflechter" bedüden. Vör bummelig 4500 Johr hem' taun iersten Mål Inuits von't hütig Kanada ut versöcht, up Grönland tau siedeln, den tweiten Anloop geef dat tweidusend Johr låters, un vör dusend Johr keemen all dei Inuits nå Grönland, dei as dei Åhnen vonne hütigen Grönlänner gellen — ut wecker denn dei Norweger Hans Egede (1186-1758) as luth'rischer Missionar ut't dän'sche Königriek nå sien Ankunft in Grönland in'n Juli 1721 bet 1736 Christen måken wull.

Rügen — kein Wunner, dat dei Dänenkönig sowat Schööns hebben wull!

Grönland geiht dat hüt nich nich anners as Rügen, denn 1168 föll dei dän'sche König Waldemar I. un sien Bischoff œwer Rügen her, üm dei Ranen as 'n slawischen Stamm von ehrn heidnischen Gott Swatevit aftaubringen, dei Ranen up den biblischen Gott ümtaustimmen un Rügen taun dän'schet Fürstendaum tau måken. Dei Dänenherrschaft up Rügen fünn denn 1325 'n Enn un Dänmark höll Utschu nå anner Inseln: Island, Faröer, Grönland... œwerall wier Dänisch dei Amtsspråk, doch dei Einheim'schen harrn denn irgendwenn dei Schnut vull, sei böhmen sik up un warden so as Island 'n eigen Land orrer son'n Oort Provinz von't Mudderland. — Villicht geiht dat disse dän'schen Lännerien äbenso as dei franzöös'schen Rebeits Réunion in'n Indischen Ozean orrer Martinique inne Karibik.

Un nu sall nu nå'n Infall von Donald Trump, so as Hawaii 'n amerikan'scher Militärstützpunkt in'n Pazifik is, Grönland dat Hawaii in Arktischen Ozean rund üm den Nuurdpol spälen. Blot dei Grönlänner kåmen in't 21. Johrhunnert mit Dänmark klor un willen nich dei Kronen gägen den Dollar utwesseln. Sei willen gor nich Hawaii in't Nuurdmeer warden.

Villicht will Donald Trump Grönland as dei gröttst Insel vonne Welt tau 51. Bundsstaat måken, as 47. Präsident so as 1898 dei Republikaner William McKinley (hei wier von 1897 bit 1901 dei 25. Präsident vonne Staaten) Hawaii taun 50. Staat in'n amerikan'schen Staatenbund måkt hett. Dorbi künn Donald nu doch dorœwer nåssinnen, ob nich Hawaii mit knapp 1,5 Milljonen Inwåhner 'n Land mit Sitz un Stimm inne UNO warden künn orrer tauminnst 'n bestimmmte Oort von Sülfstännigkeit kricht, so as wi dat von Kiribati (135.000 Inwahners), dei Marshallinseln (38.000), Nauru (12.000), Palau 18.000), dei Salomonen (820.000), Samoa (218.000), Tonga (1105.000), Tuvalu (knapp 10.000) un Vanuatu (330.000) orrer Fidschi (920.000 Inwåhners) kennen.

Ja, wenig Inwahners — œwer jede Menge Schlädenhunnen!

Œwer ne, Grönland — söss Mål grötter as Düütschland mit weniger Inwåhners as Pirmasens in Rhinland-Pfalz — sall dei amerikan'sche Militärbasis warden, üm dei Russen un Chinesen dorvon aftauhollen, Grönland mit ehr Ünnerseeflott antaugnågen un klammheimlich ünner't Ies dat ruttauhålen, wat as selten gellt un för dei Technik von hüt nödig is. Dei EU is in Upruhr, dei NATO vör'n Kollaps... Wenn Grönland, also Dänmark, von dei USA angrepen warrt un as NATO-Liddmaat den Verteidigungsfall nå Artikel 5 utröppt, möten denn all NATO-Liddmaten, ok dei USA, Dänmark gägen dei USA verdeffendeeren? Keinein weit Bescheid, all sünd s' konfus.

Ik bell op Däänsch! Un op Kalaallisut!

Ward Donald Trump noch insichtig un ward hei dat mit Grönland nich so måken, as Dänmark dat in't Middelöller mit Rügen un dei slawischen Ranen vörmåkt hett? Ward Donald Trump wiederhen up dat Middelöllerspäl "Wecker hett dei best Kråsch?" setten, orrer besinnt hei sik up dat, wat sien Kollegen ut Europa "rägelbasierte Weltordnung" näumen, un gifft sien Infäll von'n niege Weltordnung up?

Menhire up Rügen. Wat warrt vun dei US-Militärbasen maleis nåblieven?