Na, wecker grillt hier wen?

Dat Grillfest

vun Behrend Böckmann

Ex unitate vires — Einigkeit macht stark — Œwereinsien gifft Kråsch! Nå disse Devise keemen dei drei rod-schwatten Frakschonsspitzen in Würzborg tauhop, üm denn för Düütschland den Wech uttaumålen, dei modern, gerecht un säker is. Un dormit sik nu all dei ollen un välen niegen 328 schwatt-roden Maten in'n Bundsdach up dissen Wech instellen, wür disser Dåch in'n Gorn gägenœwer von'n Rieksdach nå 100 Dåch schwatt-rode Koalitschon taun "Grillfest för 'n Fräden" trummelt. An'n 17.9. wier't so wied. Bi 'n Smooltok (Smalltalk) süllen sik all bäten neeger kåmen un up den "Harst mit Reformen" instellt warden. Un so wür denn wull ok œwer dei Rente un dei Sükenhusreform, Wehrplicht un Bunker, dei Hülp för dei Ukrain un Israel, dei Carolabrügg in Dresden un dei låhme Iesenbåhn twüschen Hamborg un Berlin, œwer Stüern rupp orrer leiwers noch mihr Schullen måken usw. schnackt. Un dat blifft wull ok nich ut, dat 'n denn an son'n Åbend œwer Philipp Amthor un sien Fründin orrer Julia Klöckner mit ehrn Niegen tuschelt. Un denn keem villicht doch noch einer up den Infall, dissen wunnerschönen Grillåbend mit den Kinnerhunger in Gaza tau verglieken un dat Thema Palästina antauspräken.

Na! Wecker will dor woll sienen Semp dortaugeven?!

Ne, ok dor möt 'n œwerein sien, so as Frankriek un Kanada Palästina as Staat anerkennen, dat geiht för Düütschland nich. Ne, dor hett dei Kanzler doch Recht, wenn hei secht, dat Netanjahuh för uns "dei Drecksarbeit" in'n Kampf gägen "radikalisierte Islamisten" måkt un wi em dorför mit Waffen danken möten. Kundgäbungen för Palästina kœnen nienich Deil von uns Demokratie sien. Un so kümmt man mit Demokratie bi dei Brandmuer an. Is dei noch tau hollen, wenn binåh jeder drüdde Börger dei Blågen wählt? — Un denn sünd dor noch por Lüd, dei so as dei rode Stegner 'n bäten anner Sicht up den bösen Russen Putin hemm'. Hei weit wull, dat dei Asow-Brigaden un ehr Scheiterie af 2014 dei Anfang vonne hüt so trurig Geschicht sünd. Œwer dei miehrsten vergäten dei Geschicht, so as sei ok vergäten, dat ümmer noch Westdüütsche in Ostdüütschland dat Seggen hemm'. Un ganz rechte Christen willen sogor russ'sche Kampfjets von'n Häben hålen, wenn's œwer dei Ostsee dor fleigen, wo's nå ehr Meinen nich fleigen süllen. Disse Ort von Maten hemm' inne Schaul wull schlåpen, as œwer dei Schüsse von Sarajewo 1914 un dei Schüsse von Gleiwitz 1939 schnackt wür.

Dor blifft wierder nix, as tau seggen: Ex unitate vires — Einigkeit macht stark — Œwereinsien gifft Kråsch!

Ok Würstchen måken stark — mit Semp!