vun Behrend Böckmann

Stone Washing, dat kennt ji all —
Greenwashing is 'n anner Fall.

"Stone washing" gifft so'n Jeans den Schien, as hung s' al ewig op de Lien,
as wier s' nich nieg — denn oolt is schön. Dor much ik ok mål oolt utsehn!

Disse so klangvullen Nåmen
sünd ut Ingland tau uns kåmen:
Green steiht för Ümwelt un Natur
un Washing för 'n Remedur;
doch männig Minsch is sik nich wiss,
ob't würklich duerhaftig is.

De Jeans is greenwashed, oder? — Nee!
Greenwashing löppt an anner Stee!

Ünnernähmen gäben an,
wat 'n deit un wat 'n kann,
daun di dat Gefäuhl denn gäben,
dat Gräun is gaut för'n gaudet Läben
un in Tru un Globen nimmst du an,
dat man dei Ümwelt redden kann,
dat du deist dien Bestet gäben
för dei Ümwelt un uns Läben.

"Kööp mien Produkt! Denn büst du clean! Wi reddt den Regenwoold, sünd green!
Verpackung is recycelbor! Wi sünd de besten, is echt wohr!"

Greenwashing is so männig Siegel
up 'n Öko-Schoko-Riegel;
Greenwashing farft dei Packung gräun,
lött Blaumen noch väl grüner bläuhn,
sülfst bi'n Schlachter dat Strohschwien
künn von em gräun wuschen sein.

So'n beten Gröön an't Swien mutt sien! Wenn't Petersill is, is't ok "green"...

...man Avocados sünd to'n Spien! Dat Ding is echt en Ümwelt-Swien.

Oft ward Greenwashing vörgäben,
üm dei Wirtschaft tau beläben,
as gräun wuschen wird deklariert
männig Såk, dei dat nich wiert:
Worüm süll'n süss Minschen klågen
œwer ehren niegen Wågen?
Ümweltfründlich wull'n sei huschen:
dunn wier't 'n Diesel, dei gräun wuschen.

Oft ward ein duerhaftig Läben
för Disch un Stäuhl ut Teak angäben
un dei Höker wiest ganz stolt
up Såken ut den Jumfernholt*,
wo tau Unrecht Böm warn fällt,
wo kein Ümweltorder gellt.

För ümweltfründlich is bekannt
dei "Blåge Engel" in uns Land,
un plietsche Köper sünd sik wiss,
dat dat 'n gaudet Siegel is.

Dat Beste is för unse Welt,
wenn man en klåren Kopp behöllt,
nich mehr as nödig köfft un nimmt
un sik op't Einfache besinnt.
De bunten Waren narrn dien Oog!
Laat di nich tüschen, maak di klook!
Reklaam will nix as bloots Profit,
de Ümwelt scheert se meist en Schiet.