Dat Geschenk

vun Behrend Böckmann


Hüt hemm' wi denn 25. Januar un in Kiew gåhn Glückwünsche taun 45. Geburtsdach von Wolodymyr Oleksandrowytsch Selenskyj in. Dat gröttst Geschenk keem ut Berlin, denn Bundskanzler Scholz hett nu tausecht, dat in Œwereinstimmung mit anner Partnerlänner "Leos" œwer dei Karpaten nå Kiew an'n Dnepr rullen un dor för den ukrain'schen Sieg œwer den russ'schen Gägner scheiten warden.
Dat ierste Batalljon mit 14 "Leos" sall bald up Reisen gåhn, 'n tweites Batalljon sall achteran kåmen.


"Ik? Mit 14 Mann hooch œwer dei Karpaten?! Sünd ji noch ganz dicht?"

Biden gifft bekannt, dat Amerika 30 bet 50 "Abrams-Panzer" an'n Dnepr schicken ward, Polen will ok 'n Batalljon "Leos" œwer Lemberg nå Kiew rullen låten. Dei Nedderlannen hemm' sotauseggen ehr "Leos" in Düütschland noch nich afstottert, willen nu œwer 28 dorvon in Richtung Ostfront in Marsch setten, un dei Finnen sünd noch nich inne NATO, spälen œwer mit un willen ok por "Leos" anne Ukrain afgäben.


"Och weetst du wat? Ik bliff tohuus..."

Dat UK will 14 "Challenger-Panzer" vonne Thems an'n Dnepr schäpern, Frankriek will sienen Kampfpanzer "Leclerk" up Reisen schicken un Tschechien kricht niege "Leos" as Utgliek för dei russ'schen Panzer, dei all inne Ukrain ehr Deinst daun.

Œwer so richtig taufräden is man mit dat Geschenk noch nich. Dei Weltredder in Kiew bruken "einige" hunnert Panzer, üm den Russen tau Räsong tau bringen! Dat kœnen gor nich nauch Panzer sien un schon kreiht Melnyk, einst ukrain'scher in Berlin, nu mit'n Posten in'e Ministerium för Butenangelägenheiten, — also Melnyk secht, dat dei Ukrain nich blot "Leos" nödig hett, un verlangt von den niegen Kriegsminister Pistorius, dat hei nu ok noch Kampfjets, Kriegsschiffe, Ünnerseeboote un dei dortauhürig Munitschon friegäben sall un dat Düütschland sik nich wiederhen so schanierlich taurüchhollen sall.

Œwer dat geef ja noch 'n Geschenk för den Präsidenten un Spälmann: dei Korrupschon inne eigen Reigen. Ward em sülben nåsecht, dat hei Breifkastenfirmen ünnerhöllt, lött hei nu dei Köpp rullen. Dei Stellverträder von'n Infrastrukturminister wür achter Trallen sett't, wieldat hei sik bi'n Ankop von Generatoren 400.000 $ inne eigen Tasch stäken hett, Lüd in't Verteidigungsministerium hemm' för Soldaten Läbensmiddel wiet œwer'n normalen Pries inköfft un möten mit 'n Stråf räken. Twei Stellverträder vonne Strukturminister möten den Haut nähmen, ok dei Stelli von Verteidigungsminister schmitt hen, dei Minister för't Binnelste kümmt mit 'n ganz Mannschaft bi'n Flœgenschruwerafsturt üm't Läben... Œwer dei "Leos" kåmen...

Un denn schwäwt dor noch wat inne Luft: amerikan'sche Luscher willen weiten, dat ukrain'sche Inschenöre in Nuurdkorea mit anne Atomwaffen von Kim Jong-un basteln...

Œwer dei EU un dei NATO daun allens, dat dat Füer bannig schürt ward, un versäkern dat Volk ümmer wedder, nie nich Kriegspartei tau warden. Kœnen's mit Satelliten so allerlei œwerwåken, so kœnen's doch nich dei Grappen in'n Kopp von Putin utlüchten!


26.1.2023


na baven