vun Behrend Böckmann

Nancy Pelosi

Pelosi, Nancy — Biden, Joe:
wat sünd disse beiden froh,
dat sei sik demokratisch gäben
un doch gerontokratisch läben,
dat ehr Ollendiktatur
dat afsüht up'n Weltenkur
un so spälen's giern mit Füer,
wat den annern kümmt oft düer.

Joe Biden

Twinnig Milljonen Indiåner
wiern wull mål dei Urinwåhner
in'n Rebeit, dat jeder kennt
un sik hüt 'Merika nennt.
Dei "First Americans" hemm' wunnert
as denn kort nå sössteihnhunnert
Frömde tau Besäuk sünd kåmen
un hemm' sik dat Land denn nåhmen,
un in gaut vierhunnert Johr
wiern bald vierdig Milljonen dor,
doch blot ganz wenig 'Merikaner
hemm' as Öllern Indianer.

Wohrschuug:
'keen hüüt noch "Indianer" secht, is kulturell passé un slecht!
Hüüt heet dat, de sünd "indigen". (Dat gellt ok för Fred Feuersteen,
man nich för Tarzan oder Jane. Ok Old Shatterhand is keen!
Indigen sünd ik un du. In USA is't Winnetou,
aver nich dei Witte Mann, denn dei käm eerst väl later an.)

Dei Hillig Stauhl harr all in Rom
hensett't denn groten Petersdom,
dunn grünnt dei Petrus Stuyvesant
dei Kolonie Nie-Nedderland
up 'n Insel, as man weit,
dei ümmer noch Manhattan heit,
wo hüt mank Wulkenkratzer dicht
dei berühmte Wall Street licht.

Denn sünd Inglänner ankåmen
hemm' Nie Nedderland sik nåhmen,
mit Indianer fien anbannelt
un mit Bäwerfellen hannelt
un mit åbendlännisch Plie
grünnt jeder dor sien Kolonie.
Denn kriegen sei sik inne Plünnen
un warden niege Staaten grünnen:
Nie-Ingland würn dei USA,
Nie-Frankriek wür denn Kanada,
un Land, dat in'n Süden lägen
hemm' denn dei Iberos krägen,
sei hemm' dor as niege Macht
œwer Indios blot lacht,
un as dei "pau brasil"* wür funnen,
geef dat Holt för rieke Kunnen.
Dei hemm' den Brasilbom utkåkt
un sik so rode Farwen måkt
un't Land, von wo dei Böm sünd kåmen,
kreech "Brasiljen" denn as Nåmen.

Dei Vöröllern von Joe, den Ollen,
wiern in Irland nich tau hollen.
Sei wannerten mit väl Hurra
nå dei Niege Welt Amerika,
doch nie nich hemm' sei doran dacht,
dat Joe mit sien so grote Macht
ward einst dei ganze Welt regiern
un wedderböstig malträtiern.

Ut't Land, wo dei Zitronen bläuhn,
Oliven wassen, schwatt un gräun,
sünd Nancy ehr Vöröllern kåmen
un måken fix sik einen Nåmen.
Sei versäuken ehr grot Glück
mit amerikan'sche Poletik
un sülfst Nancy güng denn all
mit twölf taun fienen Åbendball,
un sei knickste wunnerfien
vör Kennedy sien Fru Jacqueline.
(Sei harr villicht all dunn den Splien
olt tau warden as dei Queen.)

Süht dei Aadler nich dörchut so'n beten as Joe Biden ut?

Joe un Nancy harrn in'n Sinn,
in't Kapitol, dor möt 'n rin,
un drömen all so liesing still
von'n Palast up'n "Capitol Hill".
Amerika, Amerika —
dreifach gellt di uns Hurra,
uns Kapitol inne Niege Welt
as dat Allergröttste gellt.

So lang dei Minsch all denken kann,
up Huckels füng Geschichte an:
von Golgatha, as jeder weit,
güng üm uns Welt dei Christenheit,
up'n Tempelbarch Akropolis
wiern sik dei niegen Denker wiss:
dat allerbest Tausåmenläben
sall't in ein Demokratie gäben.
Un up den röm'schen Palatin
lücht't Capitol in Sünnenschien,
wo denn würn dei Wöddeln lecht
för't hüt noch güllig Börgerrecht.

Düsse Aadler sett sik lever op den Kopp vun'n armen Bever.
De Bever bitt sien Tähn in Qual; de Aadler denkt: "De kann mi mal!"
Hach ja, wat harrn de Indigen'n doch oft för komische Ideen!

So seech man mit einen Mål
in't Åbendland dat Ideal:
Ut't Kapitol ward Order gäben
woans Amerika sall läben,
un wecker Order ümmer gellt
as Wiespåhl för dei friee Welt.
Amerika ward grot un prächtig,
gifft sik gor tau œwermächtig,
un beiern Klocken mål Alarm,
kümmt furtsens an dei Weltschandarm.
Oll Joe lött sik in Polen seihn,
will hürn, wat vör Urt gescheihn
un gifft Selenskyj dat Verspräken,
ümmer kann hei mit em räken,
denn wo Frieheit in Gefohr,
is 'Merika mit Waffen dor
un Joe hett ok ganz lud denn dacht:
"Dei Putin hürt nich anne Macht!"
Un Nancy, dei noch bäten öller,
drifft dat inne Welt noch döller
un gifft Peking tau verståhn:
Taiwan, dat is un blifft Taiwan!

Dat, dücht mi, is licht intosehn. Wat schall Taiwan ok anners ween?
De Frieheit hett ehrn egen Wert. Ik höp, dat China dat kapeert!

In Afrika 'n Schnack besecht:
"Dei Ollen hemm' doch ümmer Recht!"
Dat hemm' ok Joe un Nancy dacht
un hollen sik so anne Macht.
As witte Fru, as witter Mann
raupen's all nu achteran:
"Wi kåmen giern in jedet Land,
as einst tau uns keem Stuyvesant,
warden jede Hülp juch gäben,
wenn ji willt in Frieheit läben!"

Du denkst, ik snack vun Mafia-Paten?
Doch liekers nöömt s' sik Demokraten,
doch, dücht mi, nich ganz lupenrein.
(Laut Schröder is ok Putin ein'n...)
Doch wat uns vun dei Rechten drauht,
is leider ganz un gor nich gaud.
O nee, dor poort sik Taliban
mit Middelöller-Faschowahn.
— Hüüt hest du in de USA
dei Wahl mang Pest un Cholera!

* "pau brasil" (Caesalpinia echinata), ein Baum, der wegen seiner roten Farbe zur Farbstoffgewinnung fast ausgerottet wurde und seit 1978 als Nationalbaum Brasiliens unter Schutz steht.