vun Behrend Böckmann

Väle ünner uns besinnen sik up dei Tiet, as dat 'n Johresendprämie anne Städ von'n Wihnachtsgeld geef un Johresendflœgelfiguren dei Wihnachtsengel in'n Sozialismus wiern. Nu is dei Sozialismus ierst mål Geschicht un ut den besten Fründ von'n Sozialismus in'n Kreml is dei bidderböse Fiend von hüt worden. Ut dissen Grund möt Düütschland nu wedder kriegsdüchtig warden un Milljarden för dei Rüstung utgäben. Un so as einst Wihnachtsgeld un Engel sozialistische Utdrück wiern, is "Verteidigungsmarkt" nu dei marktwirtschaftlich Utdruck för Rüstungsindustrie, för dei Produkschon von Waffen, Waffensystemen, Munitschon, militär'sche Utrüstung dörch Ünnernähmen as Airbus Defence and Space, Rheinmetall, Thyssenkrupp Marine Systems, Heckler & Koch un noch anner... Dei Staat måkt Schullen œwer Schullen, hentau kåmen noch mihr as 70 Milljarden Euros für dei zivile un militärisch Ukrainerhülp un bummelig 34 Milljarden an Utgåben för Ukrainer, dei in Düütschland Tauflucht söcht hemm'.

Kriegsminister Boris Pistorius (SPD) un Bundsdachsmaat Roderich Kiesewetter (CDU) in Utschuss för Butenangelägenheiten gäben den Kanzler dullen Wind von achtern, dat Düütschland mit Frankriek, Polen un dat Vereinigt Königriek 'n willig Koalitschon von Gliekgesinnte billt un sei versäuken, dat Volk tau verkloren, dat disse välen Utgåwen nödig sünd, üm denn bösen Russen inne Ukrain un ok dei Hamas in'n Gazastriepen in'n Schach tau hollen. Ok wenn dei Kanzler utposaunt, dat Israel kein Waffen mihr kriegen sall, dei in'n Gazastriepen taun Insatz kåmen, so is dat wull mihr Stimmenfang as würklich Hanneln, denn Düütschland will Israel dat Raketenaffangsystem Iron Dome, dei "iesern Kuppel", afhanneln un vonne Ukrain in Såken Drohnenbu hentaulihrn.

Doch nich all Börger sünd insichtig, un so wasst dei Missmaut œwer dei Taustänn in't eigen Land. So wennt sik dei Burmeister von Hiddensee mit 'n Breif an'n Kanzler un hei schrifft: Sei pumpen Milljarden œwer Milljarden inne Rüstung, Uprüstung un Insätz in't Utland un wi vör Urt sorgen uns üm dat Œwerläben von uns soziale un kommunale Infrastruktur... In por Johr warden wi mihr för't Militär utgäben as för Bildung, Gesundheit un Wåhnungsbu... Uns Land brukt den politischen Maud, den Rüstungsirrsinn uptaugäben, denn dei Taukumst ward nich up't Schlachtfeld wunnen, sonnern sonnern in Schaulen un Wåhnungen, dei man sik leisten kann, dörch't Miteinanner inne Kommunen un up'e Spälplätz. Wenn dei Hunnerte Milljarden in dei nächsten Johr in dei Rüstung wannert, warrn all annern dat spören — dei Rentner, dei Kinner, dei Schaulen, dei Kranken, dei Hülpsempfängers, dei in prekäre Verhältniss' läwen daun — un von dei Ümwelt un dat Klima willn wi mal gor nich räden. Dor müssen dei Milljarden hin! Sünst wasst dei Missmaud miehr un miehr un ritt upletzt uns' Sellschap intwei in "Bäterverdeiners" un "Afhängte", dei na rechtsbuten afdriften daun.

Bet up'n Dach hemm' 17.000 unschullig Kinner in'n Gazastriepen dörch israelisch Waffen den Dod funnen. Dat duert por hunnert düütsche Künstler as Christiane Paul, Meret Becker, Benno Führmann, Jürgen Vogel, Daniel Brühl, Yvonne Catterfeld, Max Giesinger, Armin Rohde, Milan Peschel, Heike Makatsch, Annette Frier un väle anner sihr; sei sünd sik eins, dat dei Verbräken vonne Hamas mit nix tau entschulligen sünd, un verlangen doch wägen dat Kinnerälend von'n Kanzler, dei düütschen Waffenexporte nå Israel intaustellen. Dat "Manifest för den Fräden" von Sahra Wagenknecht un Alice Schwarzer fünn dusenfach Taustimmung, dat nich ümmer mihr Waffen inne Ukrain liewert warden, sonnern 'n Waffelstillstand un Frädensverhannlungen nödig sünd, dormit Dod un Vernichtung 'n Enn finnen. Un so keemen denn ok gaut 50.000 Minschen tau dei von't BSW un "Emma" an'n 25. Hornung (Februar) afhollen Frädenskundgäbung an't Bramborger Dur tauhop. För'n 13. Harfstmånd (September) låden dat BSW un dei einstig Russlandjounalistin Gabriele Krone-Schmalz, Promis as Peter Maffay un Dieter Hallervorden taun niege Demo in un warden verlangen, dat dat Ümmer-mihr-Waffen-Liewern för dei Ukrain uphürn möt un dei Völkermuurd in Gaza ennen deit. So wasst dei Missmaud, un villicht is bald von Niegen tau hürn: "Wi sünd dat Volk!" Wenn dat denn man gaud geiht...