Dei Fuud (Food)-Bloggersch

vun Behrend Böckmann

Zhanna Samsonowa wier ein russische Bloggerin, dei vegane Rohkost ut tropische Frücht propagieren dä. Vonwägen dei Frücht is sei na Thailand un Malaysia reist un dor op den veganen Tripp nå rohe Tropenfrücht doodbläven. Ob Hunger dei Uursåk wier, is nich künnig.

'N Bloggersch, dei schrifft allemål
ehre Tekste digitål,
schrifft up, wat sei för nödig höllt
för dei mächtig Onleihnwelt,
un œwer'n Schirm sei denn verkünnt,
wat man in ehr Dåchbauk finnt:
So warden Tipps för't Reisen gäben
orrer för't vegane Läben,
för Äten, wat 'n so nich kennt
un dat, wat sik denn Mode nennt,
woans ümgåhn mit Katt un Kind,
wenn Minschen mål up Reisen sünd —
œwer allens, wat passiert,
ward jedermann hüt informiert
un möt sik nich grot besinnen,
üm dei Websied fix tau finnen.

Vegan is nu in Mode kåmen,
man finnt ok gliek por niege Nåmen:
as Alnatura, Grien Kwisien,
dat gifft sogor veganen Wien,
un deit 'n up' n Lepptopp skrollen
(dei Musklick is wat för dei Ollen!),
denn geiht männig Finster up
von Tofu bet 'n Schmuusi-Supp,
vegane Kost, dei nich ward kåkt,
dei blot ut rohe Såken måkt,
ut Biofrücht, dei wassen fien
in'n Rägenwald bi Sünnenschien.

Dat hürte ok dei Russin Shanna*
— up gaud düütsch heit s' wull Johanna —
un as Christenminsch man weit,
wat dei Nåm bedüden deit,
un so is sik ok Shanna wiss,
dat ehr Gott ehr gnädig is,
wenn's as Bloggersch nu vertellt,
dat Rohkost ut'e Tropenwelt
dei nödig Energie ehr gifft
un ehr Geist väl klorer blifft.
För 'n schiere Hut un starke Knåken
sall man Plantenkost nich kåken,
Naturkost äten, so as wussen,
wier gesund för alle Russen!
Gaut för den, dei't glöben mach,
doch för Shanna keem dei Dach,
dat dörch dei rohe Plantenkost
ehr Hart in ehr so junge Bost
nich mihr ornlich schlågen künn
von Rohkost ünner Tropensünn —
vegane Rohkost bröcht ehr Not,
un denn wier dei Truer grot.
Sei künn von Rohkost nich gesunnen
un so hett sik dei Dod infunnen!

Väl "Posts" tau dat vegane Läben
hett dat von dees Bloggersch gäben,
doch männig Minsch is sik nu wiss,
dat disse Rohkost wull dat is,
dei nich ward so gaut verdrågen
von'n veganen Minschenmågen —
un wecker dat deit Shanna gliek,
dei kümmt ganz fix in't Himmelriek.

"Woso willn dei kein Insekten oder Körns freten, versteihst du dat?" "Nö!"