vun Behrend Böckmann

Christoph B. Schiltz (Johrgang 1963) is 'n Journalist un schrifft för "Die Welt" ut Brüssel un mellt ünner annern: "Europa hett wedder einen Föhrer!" Hei meent dormit Fiete Merz.

Dat hei dat mit dat Wurt Föhrer nich so iernst nimmt, dat kümmt wull dorher, dat hei äbenso as Butenminister Wadephul (Johrgang 1963) un Kriegsminister Pistorius (Johrgang 1960) tau dei Babyboomer-Generatschon räkent ward, dei ja in Fräden un Riekdaum upwussen un ehr Läben nich mit dat Läben von uns Kriegskinner tau verglieken is, wenngliek wi ölleren Minschen as ik uns ok ierst so richtig anne Nåkriegstiet besinnen kœnen. Œwer hier un dor is lütt bäten Erinnerung an mien Läben in Hamborg-Volksdörp bläben.

So geef dat Wihnachten 45 von'n Inglänner Schokelor för uns lütten Kinner. Œwer dat wier Bitterschokelor un wull gor nich lickmünnen. Un för'n Wihnachtsbom harr Mudder por rode Äppel updräben un noch dei välen Figuren un sülfstlüchtend Phosphorstierns von't Winterhülpswark. Un ihrer wi denn in'n Juni 1947 nå Mäkelnborg utwannert sünd, hemm' wi af un an unsen Unkel Peter, den Einspänner (Junggesell), in sien Bergedörper Gornhus besöcht, denn hei wier utbombt. Un taun annern besöchten wi inne Hallerstråt Unkel Walter un Fomilie. Unkel Walter wier 'n Vedder tau mien Mudder, dei as sei dat glieke Öllernhus in Mäkelnborg harr. Dunnemåls wüsst ik noch nich, dat dei Hallerstråt up Föhrerorder in "Ostmarkstråt" ümdöft worden wür un nå'n Tausåmenbruch wedder dei Hallerstråt heiten däd. Un wenn Hamborg tau dei Tiet taun groten Deil in Schutt un Asch leech — dat Hus inne Hallerstråt, in dat Unkel Walter mit sien Fomilie wåhnen däd, dat harr nix afkrägen. Dor œwer dei Hamborger U-Båhn taun gröttsten Deil 'n Hochbåhn wier, künnen wi dei Trümmerlandschaft seihn un dormang inne Gorn un Graünanlagen dei Nissenhütten, dei taun gröttsten Deil vonne britisch Militärverwaltung stellt würn. Un wi harrn ok nich jederein uns eigen Kinnerstuf, dei mit Spältüch taumölt wier. Ne, ik wier taufräden mit 'n Schaukelpierd, dat 'n Bekannter von mien Öllern för mi bucht harr, mit mienen Plüschhund Flocki, den dei Holtwull all ut'n Lief keem, 'n Billerbauk mit 'n Håsen- un 'n Äselsgeschicht...

Doch mien leiwstes Spältüch wier wull Mudder ehrn Knopkasten. Un as mien lütter Brauder denn all bäten mitspälen künn, hemm' wi Räuwerhöhl ünnern Ätensdisch spält, un ümmer, wenn 'n Fleiger tau hürn wier, denn kröpen wi as gewennt noch ünner'n Schriefdisch, so as Mudder dat mit uns måkt hett, wenn dei inglischen Deipfleigers tau Kriegstieden an'n Häben burrten.

Dat allens kümmt in einen hoch un man ward hellhürig, wenn von'n Föhrer schnackt ward. Wi weiten twors, dat wi ok von Partei-, Oppositschons-, Frömden-, Hunn-, Späl-, Wort-, Fohrtüch- un Tochföhrer schnacken un up'n Föhrerschien stolt sünd, œwer dat Wurt Föhrer erinnert ümmer an Tieden, as dei NS-Föhrer Hitler mit Hülp von sien SS-Rottenföhrers Düütschland un dei Welt mit 60 Milljonen dode Soldaten un Zivilisten in't Älend stört hett. Hitler kreech all 1925 den Binåmen "Föhrer" un nich ierst 1939!

Föhrer Merz is — tauminnst in dei Laag opstunns — kein Russenfründ un hett Putin up'n Kieker. Natüürlich warrt Düütschland keinen Krieg anfangen, al gor nich mit dei desolate Bundswehr. Russland œwer föhlt sik von sien westliche Navers doch diffus bedrauht — nich so konkret, as einst Napoleon 1812 den russ'schen Zor Alexander I. un Hitler 1941 den Generalissimus Stalin bedrauht hemm, œwer sei verglieken uns' Tied dormit. Wi moeten Russland klår måken, dat Fiete Merz kein Eroberer is as Napoleon un Hitler. Wi moeten dei Angst ut dei Welt schaffen, ihrer kann't kein Fräden geven. Dor fråcht 'n sik: "Quo vadis Europaföhrer?" — Un dei ostelwigen Plattschnacker frågen "Wohen sall dat föhren, wenn Putin dei gröttst Fiend is?" un dei links vonne Elw frågen "Woneem mutt dat henföhren, wenn Netanjahu dei beste Fründ is?"