vun Behrend Böckmann

Hausten plåcht väl Kinner sihr,
doch Haustensaft gifft dat nich mihr;
in Burten, wo hei eins hett ståhn,
is hier un dor dei Saft utgåhn.
Ok männig Pillen, dat is wohr,
sind up eins nu nich mihr dor,
nå dei Wenn' mit Weltenwannel
verännert sik nu ok dei Hannel
un wi Düütschen warden wies,
disse Wannel hett sien'n Pries.

Düütschland geiht, so gaut dat kann,
in Europa dull vöran,
wull denn bösen Fiend uphollen,
is dorbi up'e Schnut nu follen,
schürt noch düchtig mit in't Füer,
Bodder, Melk un Kees sünd düer,
in'n Apteik sall't nich dat gäben,
wat dei Kranke brukt taun Läben,
un so geiht dat allenmål
ümmer wieder Barch hendål!

Wat einstens wür mål ordoniert
un in Apteiken kontrolliert,
sall man sik nu sülfst besorgen
orrer ok von'n Nåwern borgen,
denn dei Böbelsten daun räden
von dei langen Liewerkäden,
dat 'n nich wiesseggen kann,
wennihr dei Såken kåmen ran,
doch all sünd sik dor båben wiss,
wat in denn Fall tau måken is:
Kein Apteiker süll sik schämen,
taun Ogenspeigel sik tau nähmen
sonne Oort von Flohmarkthannel
in Tieden von'n groten Wannel.

Dor künn man Woren noch verkopen,
wo't MHD is all aflopen,
Pillen ut 'nen Oltbestand
un Haustensaft ut tweite Hand,
wenn dei Höker denn befünn,
dat disse Wor noch helpen künn.
Un Äskulap möt mit anseihn
wat tau Tiedenwenn' gescheihn!

P.S.

De ganze Kraam is unverständlich.
Wenn ik as Kind mal Fieber kreeg
un dat woor so richtig leeg,
denn möken miene Öllern endlich
mi Wadenwickel üm de Been.
Kennt dat hüüt noch jichenseen?
Vun Fiebersaft wüss dormals wohl
noch nüms wat. Paracetamol
för Kinner?! Keem doch nich in Fraag!
— Kann jichenseen mal düsse Daag
de olen Wiesen nieg beleben?
Denn wöör dat minner Mangel geven
un minner Kosten. Un de Kinner
weern bi so'n Praxis ok gesünner.

Marlou Lessing