ESC un Hartpien*
*künnst ok "Leiweskummer" seggen

vun Behrend Böckmann

Wat 1956 as "Grand Prix Eurovision de la Chanson" as Schlagerwettstriet mit Gesang ut sœben Länner (Schwiez, Düütschland, Nedderlann'n, Belgien, Frankriek, Luxemborg un Italjen) sienen Anfang nähm, dat wür 1992 dei "Eurovision Song Contest" (ESC) un hett sik so tau dat weltwiet gröttst Musikspektakel mausert. Den Haut hett all dei Johren dei Europäisch Rundfunkunion (EBU) up, un so dörpen ok Israel as EBU-Maat un Australien mit Verbinnungen taun EBU bi'n ESC mitmåken.

Männigein von uns Ollen seihn noch Conny Frobœss, dei 1962 mit "Twei lütte Italjener..." Platz söss, Katja Ebstein, dei 1970 mit "Wunner gifft dat ümmer wedder...." Platz drei un Nicole, dei 1982 mit "Ein bisschen Frieden..." den 1. Platz för Düütschland belecht hemm'. Un all hemm' ehr Lieder up Düütsch mit 'n Schnurmikro up'n Späldäl in'n hålich Dekoratschon sungen, solang, bet denn dat Mikrofon åhn Kawel upkeem, mihr un mihr Pop-Songs, dramatisch Balladen orrer harter Rock up inglisch mit Rook un Näwel, mit Füerwark, bunte Lichtstråhlen, Lasershow, in'n bizarre Kostüms un ümgäben von'n hüppende Gestalten "performt" würn. Ja, as ole ESC-Fan geev ik tau: Dor krich ik bäten Hartpien bi.

Œwer up disse niege Oort von Strietgesang keem Lena Meyer-Landrut 2010 mit ehrn Popgesang "Satellite" up 'n iersten Platz. Un sei süng dorvon, dat s' so as 'n Satellit üm ehrn Leiwsten kreisen deit, för em sogor blåge Ünnerwäsch an'n Lief drächt un sik för em dei Tehnnœgels anmålt hett. Un Michael Schulte lannt 2018 mit dei Ballade "You let Me Walk Alone" (Du hest mi allein gahn låten) up Platz vier, un hei süng dorvon, wat hei so fäuhlt hett, as sien Vadder an'n Hilligabend dod bleef, as hei man gråd vierteihn Johr olt wier. — Den Vågel schütt denn 2024 dei Schwiezer Nemo mit den Gesang von "The Code" (Erkennungsteiken) af, dei as Clownfisch performt un dörch sienen Gesang dei Welt nu mitdeilen deit, dat hei nich Mann un nich Fru is, dat hei kein Erkennungsteiken in 'n Henblick up dat Geschecht hett, denn hei is äben "nonbinär". Dei Rägenbågengesellschaft jubelt em tau, as hei 2025 in Basel as Winner ut't verläden Johr singen deit un nu in'n Glitzerbody un Hackenschauh sienen Gesang "Unexplainable" (Nich tau verkloorn) performt un all weiten lött, dat hei nich so recht weit, wat in sienen Kopp passiert, œwer wenn hei inschlöppt, denn drömt hei ümmer dorvon, dat hei 'n Fru is.

Minschen, dei nich för dei Rägenbågensellschaft up'e Stråt gåhn, frågen sik, ob dat dei niege Männlichkeit is un ob einer as disse Clown Nemo sien Land würklich nich bäder blamiern kann. Noch anner, dei ok nich vonne Jubelantenhaud sünd, willen sik den "Dreck" gor nich mihr anseihn. Ob sei dorbi ok an dei verrückten Faslåmskleider von Barbara Schöneberger in't Kiekschapp denken? — Natüürlich is dat nich dat Slimmst, œwer dei olen Fans missen den olen Wettstried mit richtige Lieder! Un dei niege Stil is leider enorm schanierlich — un 120% nervig. Mennichmål weitst nich, wo du henkieken schallst bi dei ESC-Shows. Wohr is allerdings: Jümmer, wenn ein Land sik "repräsentiern" lett, is dor ein Risiko, dat dat tau'n Blamaasch kümmt. Denk an Sportlers, dei ierst stolt mit dei Flagg von ehr Land triumphiert — un denn sluukohrig un verschåmt Doping geståhn un ehr Medalljen wedder afgäven mœten. Denk an korrupte Politikers, dei dat Anseihn von ehr Land ruiniern. An Armeen, dei Kriegsverbräken begåhn.

Un dor sünd wi al bi dei iernsteren Themen. Denn nich blot Nemo sorcht för Stimmung; väle Sängerslüüd hemm' ok verlangt, Israel wägen den Gaza-Krieg tau Hus tau låten — un anner meinen mit Recht, wenn Israel dorbi sien dörp, denn mösst Russland ok dorbi sien. Un dor warrn wi wedder wies, dat wi jümmer op dünn Ies stahn, wenn ein Akschon ein heles Land repräsentiern schall — wat dat nu ein Sang oder ein Armee is — un besünners, wenn dat tausåmenstött. Ein Såk as dei ESC, so bewusst mallbüdelig, albern, afdreiht, mega-entspannt un lichthartig, kannst nich mit Krieg tausåmendenken oder mit ein Land, dat Krieg föhrt. Bäter wier dat, wenn sik bi den ESC von hüüt blots noch dei Rägenbågengemeinschap oder Rainbow-Community von ein Land repräsentiert. Un tauminnst dei Fråg nå Russland löst sik dormit, denn hüüttaudågs gifft dat dor kein Rainbow-Community. Dortau mœten dor anner Tieden kåmen. Un ganz egål, wat ein dei ESC geschmacklich gägen den Strich geiht: Entspanntere, lichthartigere un ok bäten alberne Tieden kannst Russland wirklich wünschen. Israel hett twors so'n Community, œwer måkt dat den gresigen Krieg bäter?!

Taurüch tau dei Hartpien! Düütschland wull 2025 endlich wedder grot rutkåmen, un dei düütschen ASC-Måker denken, wenn man in'n Popballad von't Fäuhlen bi'n Dod von'n Vadder orrer von'n Leiwsten as'n Satelliten singen kann, denn künn Hartpien nu eins dei Rönner warden. Un süh dor, man finnt in Österriek dat ut 'n musikalisch Fomilie stammend Geschwisterpor Abor un Tynna, sei winnen dei Vörutwåhl un warden för Düütschland nå Basel reisen. Abor gniedelt up'e Kneifidel un Tynna singt sogor up Düütsch von ehr Hartpien, dat hei ehr wechlopen is un sei in ehr Weltünnergangsstimmung Löcker inne Nacht ballert un dorbi dei Stierns up sei rünnerfall'n. Un sei "performen" ehrn Hartpien-Gesang un lannen denn up Platz 15. Platz 15 wier för'n anner Land ein Mallöhr, för Düütschland is dat noch "Wechkåmen mit'n blåges Ooch". Wie je œwer ok dumm lopen! Ballern hatt so väl anner Bedüdungen un wür nie nich mit Hartpien in Verbinnung bröcht, denn einen eine ballern wier bäten mihr as blot 'n Schlach in't Gesicht; wür 'n Dör tauballert, denn wier 'n luder Knall tau hürn; harrr einer düchtig einen ballert, denn harr hei as Schluckspecht tauväl Lütt un Lütt tau sik nåhmen; mit'n Billigfleiger flücht 'n in't "sœbenteihnste Bundsland", üm an'n Ballermann düchtig tau ballern. So ballert dat man blot so, un in'n hütig Språk vonne junge Lüd hett ballern ok dei Bedündung von Drogen naschen un Bikrupen. Tämlich ballaballa, so'n Text!

Un hier un dor wür wull ok düchtig ballert, as man sik dei Innåhmen bekeek. Ok wenn noch nich ganz so grot as bi'n Fautball, so is dei ESC ok 'n Geschäft. 60 Milljonen SF (knapp 65 Mio. €) hemm' dei Stadt Basel, dei Schwiezer Rundfunkgesellschaft un dei EBU för dat Spektakel upbröcht un süll dörch Innåhmen wedder inspält warden, denn Hunnertdusende hemm' sik inne St. Jakobshall un den St. Jacobs-Park amüsiert. 50.000 Nachtgäst würn tellt, väle Busse un Tööch hemm' dei Gäst rankutschiert. 1300 Polizisten wiern in'n Einsatz, dortau Rettungskräft, Füerwihr, Spezialisten vonne Armee, Grenzschützer, Cybersäkerheitsexperten un anner Organisatschonen, dei all för Ordnung un Säkerheit sorcht hemm'. Milljonen Taukiekers geef't weltwiet in't Puschenkino. So beseihn kann 'n resümiern, dat 175.000 Œwernachtungen un 780.000 Besäuker för 'n Wiertschöpfung von 60.000.000 € sorcht un dat Basel un dei Schwiez bi 162 Milljonen Taukiekers in't Kiekschapp an Anseihn wunnen hemm'.

Un sösstig Milljonen sünd doch ein Summ, dei dei Hartpien al'n bäten lindern kann, nich? Geevt dei olen Fans von den tradischonellen ESC sösstig Milljonen, denn beklågen wi uns ok nich miehr!