Viktor Orban, dat "schreckliche Gör", is ganz unbestechlich! Binah...

vun Behrend Böckmann

Dei Utdruck „enfant terrible“ kümmt ut'e franzöös'sche Språk un hett dei Bedüdung „Kind taun Fürchten orrer Grugen“, dat is 'n ümmer böser Minsch, dat sik nich tau benähmen weit, sik anners verhöllt un dordörch dei eigen Lüd blamiert un as Fomilien- orrer Börgerschreck gellen deit. Dat geiht mi so dörch 'n Kopp, wenn ik ümmer wedder dei Klågen von EU-Maaten œwer Viktor Orban un dei Klågen von Maaten inne Linkspartei œwer Sahra Wagenknecht hür. Steiht Orban mihr rechts un Wagenknecht mihr links, so sünd sei beid „enfants terribles“. Beid schwemmen nich so, as dat dei EU von Orban orrer dei Linkspartei von Wagenknecht verlangen deit.

Orban ward Korrupschon vörhollen, un so warden dei för sien Land vörseihn 22 Milljarden Euros as Stütz för Ungarn taurüchhollen. Œwer Grund kann ok sien, dat Orban sik nich an dei amerikan'schen Vörgaben för dei Ukraine-Hülp mit Waffen un ümmer mihr Waffen ok dörch anner NATO-Staaten höllt. Hei denkt so, as väle ünner uns denken daun: „Åhn Geld un Waffen ut'e Staaten wier dei Krieg inne Ukrain gliek tau Enn'.“ Un hei denkt ok, dat 'n denn verhanneln künn, un twors so verhanneln möst, dat dei Ukrain as Natschon erhollen blifft.

Œwer dat passt nich in dat åbenlännisch Denkmuster von Frieheit un Demokratie, dei blot noch tau redden is, wenn wi dei Ukrain mit Waffen vullpumpen un Selenskyj Honnig üm'n Bort schmern, dei alle Welt wiesmåkt, dat dei Ukrainer ok in'n Düstern weiten, wohen sei scheiten möten, un wenn't ok stickendüster is, dei Ukrainer taueinanner finnen, sik fast inne Arms schluten un sik so åhn Heizung gägensiedig warmen warden. Mit deisülwig Spälmannsgåf spåßt hei bi sienen Amerika-Besäuk so in Kongress, dat Deputierte em 'n „undankboren Sozialschmarotzer“ schellen, dei giern „Schattenpräsident“ von'n 51. amerikan'schen Bundsstaat sien wull, un spälen so dorup an, dat 'n sik sülfst in Amerika nich wiss is, ob nich ok 'n Deil vonne Hülpsgeller up 'n Privatkonto lannen deit.

Nu tau dat linke „enfant terrible“ Sahra Wagenknecht, dei ja mit väle Maaten in ehr Partei nich œwerein kümmt. Por Genossen sünd sogor dorför, dei Wagenknecht ut'e Partei tau schmieten. Dorbi secht sei männig Wohrheit, dei ehr linken Lifestyle-Maaten nich giern hürn willen, Linke, dei dat Gennern un dat „Angrapschen“ bedüdungsvuller för dei Weltpoletik hollen. In ehr Bauk „Die Selbstgerechten“ räkent sei mit disse Oort von Maaten af. Un so schütt ehr ok nich in, dat dat Åbendland blot mit ümmer mihr Waffen för Selenskyj tau redden is. Ne, secht sei, denn wecker Waffen liewert, dei will Krieg – süss wür hei Diplomaten schicken. Dei Ampel möt åhn Vörbedingungen Frädensverhandlunen ansträben un nich ümmer wedder Öl in't Füer geiten. Is dat nich 'n vernünftig Ansicht?

Sahra Wagenknecht, dat "schreckliche Gör"

Victor Orban denkt up ungarisch, Sahra Wagenknecht up linkisch Oort un beid fallen bi ehr Böbelsten in Ungnåd, warden för „böswillig“ hollen, sünd dei „enfants terribles“, dei man ierst inne åbendlännisch Gesellschaft integrieren möt, dormit sei sik denn bäder benähmen as männig Radalierer inne Berliner Niejohrsnacht. Orrer sünd's mit Egon Bahr œwerein, dei mål secht hett: „Inne internatschonale Politik geiht dat nie nich üm Demokratie orrer Minschenrechte. Dat geiht ümmer üm Intressen von Staaten. Marken sik dat gaut un glöben's nich dat, wat 'n in Ünnerricht vertellt wür!“

"Waaat? Willn ji uns wiesmaken,
dat dei Welt sik nich tau'n Goden entwickelt?"