An't Ehrenmal 2010

vun Rudi Witzke



Ehrenmal. Quelle

Geiht allens verdwass un verdweer!

Dat weer in’n Sommer 1951. As alle Johr in Freden fierten wi Schäuler vun de Overschaul to’n Doom in Lübeck en „Kinnerfest“ in Israelsdörp. Un dat hörte denn dortau, dat de Oberprimaner hen na dat Ehrenmaal up den Burgtorfreedhof güngen un dor mit Fahn un en Kranz un Wöör de doden Mitschäuler de Ehr wiesten. Nahsten güngen de Schäuler mit ehr Liehrer hen na’t Twiehaus in Israelsdörp. Na de wilden Johren vun’n Krieg un dorna harrn wi 1951 en wedder upbuute Schaul. Dor wöör ok wedder dat Kinnerfest fiert.

Ik erinner, dat uns dit Dodenehren deip in’t Hart güng.

Later bün ik denn as Baas vun de DRK-Bereitschaft in Stockelsdörp mit all DRK-Maten an’n Volkstruurdag in Stockelsdörp in’n Gottsdeinst gahn, denn hebbt wi en Kranz an’t Ehrenmaal daallegt un poor erinnernd un iehrend Wöör seggt. So is dat all de Johren bleven.

Nu weer in Lübeck Volkstruurdag 2010.

In’t Blatt kunn ik nahsten lesen, dat de Stadtpräsidentin de Doden mit Kranz un Wöör iehrt hett. – Un 15 Minschen ut ganz Lübeck weeren ok to dat Dodeniehren kamen na den Burgtorfreedhoff kamen.

Wi denken an de Doden
vun de velen Kriege,
vun de Doden up de Flucht,
an de doden Verdrevenen, vun Bomben Tweireten’,
an de Doden vun de düvelsch Biesterie vun de Nazis,
an alle Doden vun Gewalt.

Wi willn mahnen, dat dat uphören deit in de Welt mit den Dööskrååm.

15 Minschen stahn mit de Stadtpräsidentin nadenkern vör dat Ehrenmaal in Lübeck.

Mi ritt dat de Welt twei.

Un jüst in disse Dagen kümmt mi en Woort in de Mööt, över dat ik bit nu noch nich lang nadacht heff, eigenlich nicht wüßt, wat dat bedüüdt: Hedonismus!


Digitaalbild: Rudi Witzke

Dor mutt ik mi klauk maken. „De Hedonismus is de ethsche Richt, welk sinnlich Lüsten un Höög, dat Vergnäugen, dat Geneten as Andriev, Teel vun dat sittlich Hanneln ansüht.

De Schriever sää denn, dat wi uns nich wunnern müßten, wenn jümmer miehr Minschen na solk Wiespahls ehr Leven inrichten. In Düütschland hett de Hedonismus de Överhand, bloots SPD, CSU und CDU hebbt noch annre Wörteln, annre Werte. Se seggt, dat uns Miteinanner upbuut sien schull up uns christlich jüdsches Herkommen, up dat jüdsche-christliche Funnement, ehre Wierte.

Ja, hei geiht so wiet un seggt, dat de Grönen solk Fundamenten nich hebbt. Över de Linken seggt hei nix. — Ik weer ornlich verbiestert, as ik dat leest harr.

Dat is nu maal so, de Minschen söökt na Weeg na dat gröttmöglichst Glück, un allens, wat dorbi in de Dweer kümmt, ward tominnst minnacht.

So verklaart sik dat ok, dat in de Stillen Dagen doch al hier un dor de Schaufinster de Lüüd mit Wiehnachts-Klimbim aflenken. De köönt dat nich af, vun’n Reformationsdaag bit hen na den Ewigkeitssünndag in sik to gahn. So wöör dat een lichte Saak, den Dag vun Buß un Beden aftoschaffen.

Wiehnachten is denn so as de Love Parade en Tiet, wo de Hedonist versöcht, sien Lüsten uttoleven. — Volkstruurdag?

15 Minschen röhrte de Volkstruurdag up den Burgtorfreedhof an’t Ehrenmaal an.


Loveparade Berlin. Bild: Arne Müseler/Wikimedia Commons


Halloween

Nu wunner ik mi nich miehr un maak keen klauke Wöör to Loveparade un Halloween. Ik gah aver so wiet, die Wiehnachtsmärkt in de Neegde vom hedonistisch Leven to bringen.


Wiehnachtsmarkt. Bild: Amel/Wikimedia Commons

Wat ik uns denn nu so wünschen schall, dat weit ik nich.

De Welt is tweireten, wenn ik dat tolaat.


18.11.2010


na baven